1Babiloniap mandacünin Nabucodonosormi Josiaspa chulin Sedequiasta Juda lädup mandacüninpä ćhulälun. Payñam Joacimpa chulin mandacü Jeconiaspa pudirnin mandacü cala.2Rey 24.17; 2Cro 36.10.
2Ñatac manamá uyalïtuculcälachu Sedequias, yanapänincuna, nï jinantin malcäpis willacünin Jeremiaswan Tayta Dios willacachimuśhanta.
3Chay mandacü Sedequiasmi Selemiaspa chulin Jucalta, Maasiaspa chulin sasirdüti Sofoniasta caćhälun willacü Jeremiasta caynu ninanpä: “Yaꞌacunapïta Tayta Diosninchicta mañacuy” nil.
4Canan chay timpu Jeremias librila cayalmi lluy nunacunäćhu puliyäla. Manalämi wićhachishalächu cala.
5Chay timpućhütacmi mandacü Faraonpa pilyänincuna Egiptopïta yalälälimula. Chayta Jerusalenpa muyülïninćhu cä Caldeo lädu cunćhaläcunaca yaćhälälilmi chaypi liculcäla.
6Chaymi willacünin Jeremiasta Tayta Dios nin:
7“Israelpa yaꞌa Tayta Diosninmi ní: Tapuchimäśhan Juda lädup mandacüninta niycamuy: ‘Faraoncäpa pilyänincuna yanapäśhunayquipä yalamücunaca Egipto malcanmanmi cuticulcan.
8Chaymi Caldeo läducunaca cay Jerusalen malcaman yaycapäcunanpä cutipämunꞌa; duyñuchacuyculmá cañaycälälinꞌa.
9“ ‘Yaꞌa Tayta Diosmi ní: Amari quiquiquicunacta ingañacuyalcaychu, “Caldeo läducunaca caypïta liculcanꞌañamá” nil. Paycuna manamari liculcanꞌachu.
10Masqui Caldeo lädu pilyäcunäta lluy llallïläliptiquipis, waquin dañäducüśha jamapäcuśhanćhu quïdäcunämá śhalcalcälil cay malcacta cañaycälälinꞌalä canpis’ ” nil.
11Ñatac Faraonpa pilyänincuna Jerusalenman śhamuśhanta yaćhälälilmi Caldeo lädu pilyäcunaca liculcäla.
12Chay timpu Jeremiasñatacmi Benjamin ayllućhu tücänincunacta aypunaculcänanpä Jerusalenpïta yalucuyäla.
13Ñatac Benjamin puncu nishanpa willacü Jeremias yaluyaptinmi pilyäcunap puydïnin Irias prïsucta chalälun: “Am, Caldeo läducunäman jucllachacümi licuyanqui” nil. Iriasꞌa cala Selemiaspa chulin, Hananiaspa willcanmi.
14Chayćhümi Jeremias nin: “Manam. Yaꞌa manamá Caldeo läducunäman jucllachacüchu liyá” nil.
Ñatac Iriasꞌa mana uyaliytuculmi Jeremiasta chalalcul puydïcunäman puśhacula.
15Chay puydïcunäñatacmi Jeremiaspä sumä piñacälälila. Chaymi allicta maꞌalcälil isquirbï Jonatanpa wasinman wićhälälila. Chay Jonatanpa wasintamari carsilman muyülächila.
16Chay wasip lulinćhu cä ućhcumanmá Jeremiasta wićhälälin. Chayćhümi achca muyuncuna wićhaläla.
17Mandacü Sedequiasñatacmi Jeremiasta palasyuman julalcachimul pacallap tapuycula: “¿Tayta Dios imallactapis yaꞌapä nishulanquichun?” nil.
Niptinmi Jeremias: “Aw, nimälam. Babiloniap mandacüninmanmá am ćhulaycuśha canqui” nil.
18Nilculmi mandacü Sedequiasta Jeremias nin: “Carsilman caynu wićhachimänayquipä, ¿ima mana allintamá ampa, nunayquicunap, malcayquip cuntran lulälá?
19¿Mayćhümá cayan: ‘Babiloniap mandacünin ampa cuntrayqui, nasyunpa cuntran manamá śhapämunꞌachu’ nil willacüniquicuna?
20Canan, mandacü taytallay, sumäta uyaliycallämay, ama chaynu caychu, mañacuylläta uyaliycallämay: Isquirbï Jonatanpa wasinman amañari cutichillämaychu. Chayćhu wañuyta manamá munächu” nil.
21Niptinmi mandacü Sedequias carsilpa patyunćhu cananpä nila. Jinaman Tanta Lantina cällipïta, cusäśha tantacta walan-walan uycunanpämari nilapis. Chaynu lulaycula chay malcaćhu tanta caśhancamamá. Chaynüpamá carsilpa patyunćhu Jeremias cala.
Who We AreWhat We EelieveWhat We Do
2025 by iamachristian.org,Inc All rights reserved.
