1Tayta Diosmi nin:
“¡Imanuylä canqui David yaćhaśhan Ariel malca!
Watan-watanmá fistachacuycunallaćhu cayalcanqui.
2Yaꞌañatacmi ichá chay malcaman ñacaycunacta
jicutaycuptí waꞌacuylla, llaquicuylla cacunꞌa.
Jerusalen malca uycuna patacćhu lupachisha cäcänümá caycunꞌa.
3Yaꞌañatacmi muyülïninman pilyänïcunawan
ćhulanacälälisha-cama capäcuśhä;
caśhpicunawanmá lluy muyülïninman inćhäśhä;
camacaycünäpämá ishpinacunacta śhalcächishä.
4Chayćha uyshulächisha canqui.
Cay allpap luli-lulinpïmi ayaycaćhamunqui;
chay luli-lulipïmi cundinädupnu limayniqui yalamunꞌa;
yanꞌa-yanꞌallam uyaliycuśhapis canqui.
5“Ñatac achca-achca ćhïnicüniquicunaca,
unꞌaypi mana pinsaśhayquićhümá
ñutuy-ñutuy pulbuman muyüchisha capäcunꞌa.
Cuntrayqui śhalcü achca-achca juyucunaca,
waywa apaśhan päśhanümá capäcunꞌa.
6Sumä munayniyu Tayta Diosmari räyucunawan,
pacha-cuyuycunawan, sumä-sumä suynaycunawan,
alli-alli waywacunawan, lücu tamyacunawan,
camacaycü nina walayäcunawan śhamunꞌa.
7“Ariel malcap cuntran pilyä achca-achca
malcacunaca muspaynüllamá canꞌa.
Sumä murällanta pampaman muyuchinanpä
jicutäcunaca muspaynüllamá chincaculcanꞌa.
8Maynümi micuypi wañuyäca suyñuyninćhüpis micuy-micuy cayan;
ñatac achicyäluptinꞌa jina micanäśhallatacmá achicälunpis.
Yacunäśha nunäpis yacu upyaypïmá muspapacun;
ñatac achicäluptinꞌa jina yacunäśhallatacmi achicälunpis.
Chaynümá Sion malcap cuntran pilyä
achca-achca malcacunäwanpis pasanꞌa” nil.
9¡Jinallalächun luclu cayalcanqui!
¡Jinallalächun imactapis mana lical apla cayalcanqui!
¡Jinallalächun masqui mana upyayalpis,
shincanu tanlicaćhayalcanqui!
10 Tayta Diosmari amcunaman caćhamula
wañuy-wañuy puñuylla aysapäcuśhunayquipä.
Willacücunäpa ñawintapis wićhälunmá;
licäcunäpa cärantapis śhucupächinmá.
11Chaymi śhamü timpućhu imacuna pasanantapis licachishuśhayquica amcunapä sumä pitwïsha librućhünu canꞌa. Lïgïta yaćhäcäman uycuptiquim: “Pitwïsham cayan, manamá lïgiyta atipapäcüchu” nipäcuśhunqui.
12Mana lïgiyta yaćhäcäman lïginanpä pitwïsha libructa uycuptiquiñatacmi ichá: “Lïgiyta manamá yaćhächu” nishunqui.
13Tayta Diosmi nin:
“Cay nunacunacá janä shimillanwanmi alawapäman.
Śhunꞌunñatacmi ichá calu-calućhu cayan.
Nunacuna yaćhachishallanmannümá
janä śhunꞌullanwan paycuna alawaycaćhapäman.
14Chaymi licapayllaman camana sumä jatun
lulaycunawan cay malcacta äśhalayäta caćhaycüśhä.
Yaćhayniyücunäpa yaćhaynin mana cämanmi muyunꞌa;
allin tantiayniyücunäpa tantiaynincunapis yanꞌalpämi canꞌa” nil.
15¡Imanuylä canꞌa Tayta Diospi pacacuycul lluy limanaculcäśhantapis,
tutapaycäćhu mana allin lulaśhantapis pacaycüca!
Nipäcunlämi canpis: “Mayanpis manamá licamanchicchu.
Ima pasaśhantapis manamá pipis yaćhanchu” nil.
16¿Pasaypi lucluñachun cayalcanqui imatá?
¿Wacuy luläca wacuycäwan chaynü-camallachun cayalcan imamá?
¿Wacuyca luläninta: “Amchu manamá lulamälanqui” ninmanchun imatá?
¿Wacuyca imayllapis: “Lulamänïca pasaypi luclum” nilachun imamá?
17Manaläpis unaytam Libano muntica
talpuna allin ćhaclaman muyunꞌa.
Talpuna allin ćhaclacunäñatacmi ichá
munti-muntiman muyunꞌa.
18Chay muyunćhümi mana uyalï upacunäpis
pitwïsha librunu cäcäćhu lïgishanta uyalipäcunꞌa.
Mana licä aplacunäpis
sumä tutapayćhu cayalpis licapäcunꞌam.
19Mana nunatucüśha cäcunaca
Tayta Diosćhu caśhanpïmi cushiculcanꞌa.
Sumä llaqui wacchacunäpis Israelpa
Chuya Tayta Diosninćhümá cushiculcanꞌa.
20Juyu nunacunaca chincächishañamari capäcunꞌa;
nunatucücunaca camacälunꞌañamari;
mana allincäta ashïcunäpis
camacaycüśhañamari capäcunꞌa.
21Chaynütacmi yanꞌalpïta nuna-masinta tumpäcunäpis camacanꞌa.
Quijaćhu cayal fiscunäta mana allinman iwïcunäpis chincanꞌañamá;
allin nunacta tumpäcunäpis manañamá canꞌañachu.
22Chaymi Abrahamta libraycü Tayta Dios Israelta caynu nin:
“Cananpïta puntaman Jacob
manañamá pinꞌayćhu canꞌañachu.
Manchacuypïta almanpis manañamá yalunꞌañachu.
23Milaynincuna malcanćhu imacunacta
lulaśhätapis licapäculmá Chuya Tayta Dios caśhäta lisipäcunꞌa.
Jacobpa Chuya Diosnin chuya caśhätamari yaćhaycälinꞌa,
Israelpa Diosnintamá manchacuywan licaycälinꞌa.
24Chaymi pintïsha cäcunaca tantiayniyu cayta yaćhapäcunꞌa;
jamuyäcunäñatacmi yaćhachicuynïta ćhasquipäcunꞌa” nil.
Who We AreWhat We EelieveWhat We Do
2025 by iamachristian.org,Inc All rights reserved.
