Isaias 48 - Old Testament Quechua Wanca（QVW）

Israeltam Tayta Dios anyapan

1“Jacobpa milaynincuna, Judapa caśhtancuna,

Israel śhuticta apäcuna,

Tayta Diospa śhutinta ćhulaycul limalicücuna,

Israelpa Diosninta mañacücuna uyalipäcuy;

rasuncällacta mana limal janä

śhunꞌullayquiwan nïcuna uyalipäcuy.

2Amcuna ‘Chuya malcapïtam cä’ nïcuna,

‘Israelpa sumä munayniyu Tayta Diosman

chalapaculcämi’ nïcuna caytari uyalipäcuy.

3Ima pasanantapis unay timpupïñamá yaꞌa willayculá.

Quiquïmi willacachilá; quiquïmi lluy yaćhaycachilá.

Chay nishämannümá unꞌaypi rasunpa lulaycuśha cala.

4Tuquictamá yaćhá pasaypi luclu caśhayquita,

cuncayquipis fïrrunu pasaypi caśhanta,

umayquipis brunsinu anä caśhanta.

5Chaymi unay timpupïña amcunacta nipäculac;

manaläpis pasayaptinmi nipäculac.

Chayurá manamá niyalcämanquimanñachu:

‘Llällacuśhá taytachäcunam caynu lulälun;

chullulcachil lulacuśhá taytachäcunamá wicta lulälun’ nil.

6Chaycunacta lluyñamari uyalipäculanqui, licapäculanqui.

¿Chaychun caycuna rasun caśhanta

mana willaculcanquimanchu?

Cananꞌa muśhü cäcunactamá willaycuśhayqui;

mana uyalishayqui pacaläcunactamá yaćhaycachishayqui.

7Caycuna canan lulaśhacunañamari cayan;

manamá unay cäcunachu.

Cayta canancama manalämi uyalilanquilächu.

Chayurá ‘uyaliläñamá’ nil manam niyanquimanchu.

8“Cayta manamá imaypis uyalilanquichu, nï lisilanquichu;

linliqui manalämá canancama quićhacaculachu.

Tuquictam lisiyac pasaypi ipanchä caśhayquita.

Chaymi nilac: ‘Mamayquip patanpi mana cäsucü’ nil.

9Ñatac śhutí altuman juluycuśha, cuyay caśhan-laycumari

piñacuynïta awantayculá;

manalämari camacayculacchu.

10Amta chuyanchayculacmi.

Ñatac illaytanüchu manamá chulluchilac.

Aśhwanpa ñacay urnućhümá chuyanchayculac.

11Quiquïta cuyacuynïwanmi caycunacta lulayculá.

¿Imanuypatá jalutacamänanta awniyäman?

Yaꞌa altuman juluycuśha caśhänuꞌa

manamá juc altuman juluycuśha canmanchu.

12“Jacob, uyalimay; aclacuśhá Israel uyalimay:

Yaꞌallamá Tayta Dios cayá.

Yaꞌallamá Allaycuycäpis Camacaycäpis cayá.

13Cay allpäta maquïwanmi tacyaycachilá;

allï maquïwanmi sïlucunäta maśhtayculá.

Śhutinta-cama limalcullaptïmi

lluypis licalipämun.

14“Má, lluy juntunacaycamul uyalipämay:

¿Caycunacta mayanllá willaculcälamá?

Tayta Dios aclaycuśhan Ciromá munaśhanta lulaycunꞌa.

Paymari sumä maquinwan Babilonia nasyunta camacaycülunꞌa;

Caldeaćhu cä Babilonia nunacunäta munaśhantamari lulälunꞌa.

15“Yaꞌa quiquïmi mandacü Cirocta nilá;

yaꞌami ayalá; yaꞌamari ayachimulá.

Chaymi lluy lulaśhancuna allin yaluycunꞌa.

16Má, aśhuycälimul uyalipämay.

Allaycuycäpïpis manamá ima willacuytapis pacayculächu.

Chaycuna pasayaptinpis chayćhümi yaꞌa cayälá” nil.

Cananꞌa Tayta Diosmi Ispiritunta uycamal caćhamäla.

17Israelpa libraycünin

Chuya Tayta Diosmi caynu nin:

“Allinniquipä yaćhachishüniqui

Tayta Diosmari cá;

allin caminup puśhaśhüniqui Tayta Diosmi cá.

18Camachicuynïta cäsucuptiqui jawca

cayniqui mayunümi unyaycunman cala;

lamarcäpa yacun mächicacamuśhannümi

tincüninman licaycuyniqui caycunman cala.

19Milayniquicunapis lamarćhu

awishquinümi canman cala;

mana yupayta atipana awishquicunänümá canman cala.

Śhutintapis manamá chincachïmanchu cala;

ñawpänïpïta manamá alapacülumanchu cala” nil.

20¡Babilonia nasyunpïta yalapäcuy!

¡Caldeo lädupïta ayipäcuy!

Caycunacta cushisha willaycäliy,

camalaycälichiy.

Cay pachäćhu manyan-manyan willaculcay.

Sirbïnin Jacobta Tayta Dios

libraycuśhanta niycäliy.

21Chunyä ulꞌucunäpa lipäcuptinpis

manamá yacunapäculachu.

Paymari wancapïta yacucta yalaycachimula;

wancacta laꞌalächiptinmari yacuca unyaycamula.

22 Tayta Diosñatacmi nin:

“Mana allin nunacunäpa jawca cawsay manamá caycunchu” nil.