Levitico 11 - Old Testament Quechua Wanca（QVW）

Mayannin chuyapä ütac anlapä licaśha canantam nin

1Chaypïta Tayta Diosmi Moisestawan Aaronta nin:

2“Israel caśhtacunäta niycamuy cay jinantin pachäćhu cä lluy uywacunäpi caycunacta micapäcunanpä:

3Shillun ishcayman partïsha cutichicü uywacunactam.

4Ñatac cutichicü uywa ishcayman shillun partïsha captinpis ama micapäcuychu. Camïllu uywañatacmi ichá masqui cutichicü calpis mana ishcayman partïsha shilluyüchu. Chaymari mana micuna anla uywa.

5Chaynütac cunishcäpis cutichicu calpis manatacmi ishcayman partïsha shilluyüchu. Chaymari mana micuna anla uywa.

6Chaynütac biscachäpis cutichicü calpis manatacmi ishcayman partïsha shilluyüchu. Chaymari mana micuna anla uywa.

7Chaynütac cuchipis masqui ishcayman partïsha shilluyu calpis manatacmi cutichicunchu. Chaymari mana micuna anla uywa.

8Cay lluy uywacunäpa aychanta amam micapäcunquichu, nïtac wañüluptinpis yataycapäcuquipischu. Caycunacta anla uywapämari licapäcunqui.

9“Chaynütacmi lamarcäćhu, mayućhu cawsäcunäpïta micapäcunqui laplayücunätawan ispuylaśhniyücunäta.

10Ñatac mana laplayücunätawan mana ispuylaśhniyücunätam ichá millachicuy anlapä licapäcunqui, masqui mayućhu ütac lamarćhu uchuchä ütac jatućha cacuptinpis.

11Chaycunap aychanta amam micapäcunquichu; wañüluptinpis anlapämi licapäcunqui.

12Chayurá yacucunäćhu mana laplayü nï ispuylaśhniyu cäcunäta anlapämi licapäcunqui.

13“Chaynütac pälïcunäćhu anlapä licapäcul caycunactam ama micapäcunquichu: äćhicta, ancacta, lamarćhu cä ancacta,

14wamanta, lluy lichcä quillinta,

15jinaman imaymana licchä wisculcunacta,

16abistruscäta, tucuniläcäta, imaymana licchä iwllacunactapis.

17Jinaman tucucta, somormuju nishanta, ibis nishanta,

18calamon nishanta, pelicano nishanta, wisculniläcunacta,

19cigüeñacunacta, imaymana licchä garsacunacta, abubilla nishancunacta, maśhucunactapis amamari micapäcunquichu.

20“Chaynütacmi pälï laplayü culucta, tawan ćhaquinwan pulïcunätapis anlapä licapäcunqui.

21Ñatac pälï culucta, jinaman tawan ćhaquinwan pulï culu paćhcananpä mas jatućhaćhä ipa ćhaquiyücätam ichá micapäcunquiman.

22Caynu cä culucunäpïtam caycunacta micapäcunqui: llapan lichcä paćhcaśhchacunacta, chuclluśhcunacta, paćhcawśhucunactapis.

23Ñatac laplayu cä tawan ćhaquinwan pulï lluy culucunätam ichá anlapä licapäcunqui.

24“Canan cayta lulalmi amcunapis anlaman muyupäcunquiman: Chay nishá uywacuna wañüśha cayaptin chalaycücämi anlapä licaśha canꞌa aśhta aspilpunancama.

25“Chaynütacmi chay wañüśha uywacta pallalcücá müdananta täśhanꞌa. Ñatac anlapä licaśha canꞌa aśhta aspilpunancamam.

26“Chayurá shillun ishcayman mana partïsha, jinaman mana cutichicü uywacunactá anlapämi licapäcunqui. Caycunacta mayanpis chalaycücá anlapä licaśham canꞌa.

27“Chaynütacmi tawan ćhaquinwan cä uywacunäpïta ćhaqui paltanwan pulïcunäta anlapä licapäcunqui. Chay uywa wañüśhacta chalaycücá anlapä licaśham canꞌa aśhta aspilpunancama.

28Chaynütacmi chay wañüśha uywacta pallalcücá müdananta täśhanꞌa. Anlapä licaśha canꞌa aśhta aspilpunancamamá. Lluy cay uywacunactam anlapä licapäcunqui.

29“Chaynütacmi pampäpa pulï imaymana uywachacunapïtapis anlapä licapäcunquiman caycunacta: Unchuchucuycunacta, ucuśhcunacta, lluy licchä śhucullucuycunacta,

30erisu nishancunacta, cucudrillucunacta, araracaycunacta, śhucullucuycunacta, camaliyun nishancunactapis.

31“Lluy uywacunäpïta cay uywacunätamari anlapä licapäcunqui. Cay uywacunäpi wañüśhacunäta yataycücá anlamanmi muyunꞌa aśhta aspilpunancama.

32“Chaynütacmi anla uywaca wañülul imamanpis tupaycüluptin chaypis anlamanña muyun; masqui caśhpipis, müdanapis, utapis, cuśhtalpis, ütac lulanapä ima cäcäpis anlamanmá aspilpunancama muyun. Chaytam yacuwan sumäpä paꞌanqui chuyanchaycuśhaña cananpä.

33“Chaynütac chay uywacunäpi jucnin wañüśhaca cutuśh mancaman ćhäluptin, chay mancaćhu lluy imapis cäcunaca anlamanña muyun. Chaymi allpa mancaca paquishaña canꞌa.

34Chaynütac chay mancaćhu cä yacuca ima ćhacla micuymanpis śhutüluptinꞌa chay micuycä anlañam canꞌa. Jinaman chay mancaćhu ima yacu cäcäpis anlañamá canꞌa.

35Chaynütac chay jucnin wañüśha uywa urnumanpis, tullpamanpis ćhaćhäluptinꞌa chaycuna anlamanñam licalïlun. Chaymari chaycunacta lluy camacaycünaña.

36“Ñatac yacucta upyananchic pucyuwan püsucá jina chuyallamá canꞌa. Mayanpis chay wañüśha uywacta yataycücá anlamanñam licalinꞌa.

37“Ñatac chay uywacunap jucnin wañüśhaca talpunapä cä mujuman ćhäluptinꞌa chay muju jina chuyallam caycunꞌa.

38Sïchuśh mujuca puśhpächisha cayaptin chay wañüśha uywa ćhäluptinꞌa anlamanñam muyunꞌa.

39“Ñatac micunayquipä cä uywaca wañüluptinꞌa, chayta tupaycüca anlamanñam muyunꞌa aspilpuycama.

40Chaynütacmi micunapä cä wañüśha uywap aychanta micücá müdanancunacta täśhanꞌa; paypis aspilpuycamam anlapä licaśha caycunꞌa. Chaynütacmi chay wañüśha uywacta pallalcücäpis müdanancunacta täśhanꞌa; paypis aspilpuycamatacmi anlapä licaśha canꞌa.

41“Chayurá śhullwaypa pulï culucunaca anlam; amam micapäcunquichu.

42“Amamari micapäcunquichu śhullwaypa pulï culucunäta, patanta aysaśhtin pulïcunäta, tawan ćhaquinwan ütac mas ćhaquinwan pulïcunätapis. Chaycuna anlapä licaśhacunamari.

43Chayurá chay śhullwaypa pulï culucunaca ama anlaman muyuchipäcuśhunquichu; nïtac anlaman muyuchiculcaychu.

44Yaꞌa Tayta Diosniqui chuyam cá; chaymi chuyanchacul chuya caycälinayqui. Chayurá śhullwaypa pulï culucunäwan ama anlacuyalcaychu.

45Yaꞌa Tayta Diosmi Egiptop maquinpïta julapämulac amcunap Tayta Diosniqui canäpä. Yaꞌa chuya caśhäpam amcunapis chuya capäcunayqui” nil.

46Lluy caycunactam yaćhachila uywacunäpi, pälïcunäpi, imaymana liccha śhullwaypa pulïcunäpi, yacućhu cä uywacunapïpis.

47Caytam yaćhachila mayannin anla ütac chuya caśhantapis, jinaman mayannin uywa micunapä ütac mana micunapä caśhantapis yaćhanapä.