1Jucnin willacüpa walminmi Eliseocta nin: “Yaćhaśhayquinüpis Tayta Diosta manchacuywan sirbï wayapá wañucunñamari. Ñatac dïbiculcäśhá nunam canan śhamuña ishcaynin wawïta uywayninpä apacunanpäña” nil.
2Niptinmi Eliseo: “¿Yanapänacpä imactam luläman? Má, wasiquićhu imallayquiꞌa cayanmi” nin.
Niptinmi japanyäśha walmica: “Cay nunallayquip manañam imanpis canñachu. Śhutuy asaytilläñam cayan” nin.
3Niptinmi Eliseo: “Canan lluy bisinuyquicunapïta wacuynincunacta mañacamü liy. ¡Lluy-lluy atipäshayquita juntumuy!
4Jinalcul wawiquicunawan wasiquiman yaycuycul wićhacalcamuy. Jinalcul lluy wacuycunäman asayticta winaycuy; juntaśhanpa-cama juc läduman aśhuchiy” nil.
5Nishanmannümi walmica cutilcul wawincunawan wićhacalcälimula. Chayćhu wawincuna pasaptinmi payñatac wacuycunäman asayticta winay-winay cala.
6Lluy wacuycuna juntäśha cayaptinmi jucnin wawinta nin: “Juc wacuyta pasaycamay” nil.
Niptinmi wawin: “Manañam mas wacuy canñachu” nin.
Chaynu niyällaptinmi asaytica camacälun.
7Chaypïtam walmica licula ima pasaśhantapis Tayta Diospa sirbïnin Eliseoman willaycamü. Eliseoñatacmi nin: “Chay asayticta lanticulcul mänu caśhayquita pägamuy. Puchücá wawiquicunawan mantiniculcänayquipämi canꞌa” nil.
Sunem malcayu walmip wawintam Eliseo cawsachin8Sunem malcaćhümi alli cäniyu walmi yaćhaña. Paymi juc muyun chayninpa Eliseo pasayaptin wasinćhu micunanpä jicutäla. Chaymi Eliseo chayninpa pasayal chay walmip wasinman micu yaycula.
9Chay walmiñatacmi wayapanta nin: “Cay wasinchicman micü śhamü nunaca Tayta Diospa japächäśha willacüninmari.
10Aśhwanpa altuśhcäćhu juc cuartucta lulaycapul cämanta, mïsanta, täcunanta, acchintapis ćhulaycapuśhun. Chayćha watucüninchic śhamul jamacunanpä canꞌa” nil.
11Chaypi juc muyunćhu Eliseo ćhämulmi chay lulaśhan cuartuman jamacü lipäcula.
12Chayćhümi sirbïnin Giezicta Eliseo nin: “Sunem lädu walmicta ayamuy” nil.
Ayämuptinmi walmica pay caśhanman śhamula.
13Chayćhümi uywaynin Gieziwan wasiyu walmicta Eliseo nichila: “Maynu sumätam atindiycallämanqui. ¿Imactam ampä lulayculläman? ¿Mandacücätachun ütac pilyäcunap puydïnintachun ampïta limapaycüman?” nil.
Niptinmi walmica: “Cay malcäćhu allin jawcallam cawsaycú” nin.
14Niptinmi Giezicta Eliseo: “¿Imactamá cay walmipä lulaycuchwan?” nin.
Niptinmi Giezi: “Imactalä lulaycuchwan. Pay mana wawiyümi; wayapanpis awquishñamari” nin.
15Niptinmi Eliseo: “Má, ayämuy” nin.
Chaynu Giezi ayämuptinmi walmica puncućhu śhaycuycula.
16Chayćhümi Eliseo nin: “Canannu watapämi walaśh wawiquita malalayanquiña” nil.
Niptinmi walmica: “Taytay, chaynu manam canmanchu. Cay nunallayquita Tayta Diospa willacünin cayalꞌa ama casquipämaychu” nin.
17Ñatac Eliseo nishannümi chay walmica patayu licalïlul chay wata śhamücäpä walaśhta ishyacülun.
18Chay walaśhca wiñälulmi juc muyun papänin chay lutüshïnincunawan caśhancäman lila.
19Chayćhu cayalñam päpäninta nicuyan: “¡Umallämi! ¡Umallämi!” nil.
Niptinmi uyway nunanta papänin nin: “Mamanman puśhay” nil.
20Niptinmi mamanman uywayca pasachicula. Maman millayninćhu malalayaptinñam ćhawpi muyun pasacalpula.
21Jinaptinmi Tayta Diospa willacüninpa cuartunman apalcul cämanman ćhaćhaycächila. Jinalculmi puncunta wićhalcamul yalacamula.
22Chaypïtam wayapanta ayalcamul nin: “Ama chaynu caychu, Tayta Diospa willacüninta ashï apuraylla linäpä jucnin uyway nunactawan jucnin ćhina aśhnucta mañaycamay. Canallanmari cutïmuśhä” nil.
23Niptinmi wayapan: “¿Imamanmi canan linqui? Manam llullu quillachu, nï jamana muyunpischu linayquipä” nin.
Niptinmi walmin: “Alcaycamay jinalla” nin.
24Chaypïtam aśhnuman sillaculcul uyway nunanta nin: “Puntaptiqui yaꞌa ipallayquitam śhamuśhä. Śhaycuy niptïlämi mayćhüpis śhaycunqui” nil.
25Chaynu liyalmi Tayta Diospa willacünin Eliseo Carmelo ulꞌućhu caśhanman ćhälun. Eliseoñatacmi caluctalä śhayämüta licälul uywaynin Giezicta nin: “Licay, Sunem lädu walmica śhayämuña.
26Apuraylla talipalcul tapuycamuy: ‘¿Imanuyllam wayapayqui, wawiqui, quiquiquipis cayalcanqui?’ ” nil.
Niptinmi walmica: “Lluy allinllam” nin.
27Nilcul Eliseo caśhan ulꞌuman ćhayculñatacmi paypa ćhaquinman macallacuycun. Jinaptinmi Giezi caćhaycachinanpä aśhuycuptin Eliseo nin: “Jinalla cachun, sumä-sumä llaquisham cayan. Imapi chaynu caśhantapis Tayta Dios manalämi willaycamanchu” nil.
28Niptinmi walmica nin: “Taytallay, walaśh wawí cananpä manamá mañaculacchu. ‘Wawiqui canꞌam’ nimaptiquipis ‘ama casquipämaychu’ nilacmari” nil.
29Niptinmi Giezicta Eliseo nin: “Allichacuy, garutïta apticulcul chay wawin caśhanman pasay. Mayanwan tinculpis amam limacunquichu. Mayan limapäcuśhuptiquipis amatacmi ćhasquicunquichu. Ćhälulmi wawinpa cäranman garutïta ćhulaycunqui” nil.
30Chay walaśhchap mamanñatacmi Eliseocta nin: “Tayta Diospis ampis tuquictam yaćhanqui. Mana liwshimaptiquiꞌa caypïta manamá yaluśhächu” nil.
31Niptinmi Eliseo paywan lila. Gieziñatacmi puntalcul walaśhpa cäranman garuticta ćhulaycülun. Ñatac walaśhchaca manam cuyupaculachu nï cawsalimunanpis camalaculachu. Chaymi Eliseoman cutilcamul Giezi nin: “Walaśhca manam cawsalimunchu” nil.
32Chay wasiman Eliseo ćhänanpämi walaśhca cäma jananćhu wañüśha chutalayäña.
33Chaymi cuartuman yaycuycul puncucta wićhacalcamul walaśhcällawan cayalcäla. Chayćhu Tayta Diosta mañaculculmi,
34cämaman ishpilcul walaśhpa jananman pilatacuycula. Jinaptinmi shiminpis shimipula, ñawinpis ñawipula, maquinpis maquipula cayäla. Chaymi chay aychan unuliyta allacuycula.
35Chaypïta Eliseo śhalcuculculmi chay cuartućhu wicman-cayman puliyäla. Jinaśhanpi yapañatacmi walaśhpa janäninman pilatacuycun. Chayćhümi walaśhca anćhish cuti ishawyälul licaćhacämun.
36Jinaptinmi Giezilta ayalcul Eliseo nin: “Sunem lädu walmicta ayamuy” nil.
Chaynu ayämuptin walmica ćhamuptinmi Eliseo: “Cay wawiqui” nin.
37Niptinmi walmica Eliseop ćhaquinman uyshucuycula. Chaypïtam wawinwanña chay cuartupïta yalapämula.
Willacücunäpämi milagructa Eliseo lulan38Chaypïtam Gilgal malcaman Eliseo cutila. Chay malcaćhüñatacmi micuy wana cacuña. Chaymi lluy willacücunäwan cusca cayalcal uyway nunanta Eliseo nin: “Lluy willacücunäpa jatun mancaćhu micuyta yanupamuy” nil.
39Chaymi chayćhu jucnin jaćhacunacta pallamü ćhaclacunäman liña. Jinalmi munti jaćhacunap wayuyninta calabäsactanu talilcul ipi juntacta pallämula. Ćhaycachimulñatacmi mundalcul yanuśhan mancaman jitalpuycüla; ñatac ima caśhantapis manamá yaćhalachu.
40Chaynu alaycuptin micuyta allaycuyalcalñatacmi willacücunaca nicuyalcan: “Tayta Diospa willacünin, cay micuyca bininuyümi caña” nil. Chaymi manaña micapäculachu.
41Nipäcuptinmi Eliseo: “Má, arinacta apapämuy” nin.
Apälälimuptinmi mancaman jitalpuycul Eliseo: “Micapäcunanpä alapäcuy” nin.
Mancaćhu manañamá ima mana allinpis calañachu.
42Ñatac Baal-salisa malcapïta juc nuna wamä cusichanpi Tayta Diospa sirbïnin Eliseopä apamuña: siwäpi ishcay ćhunca (20) tantacta, wamä cusichäśha ispijayu trïgucta. Chayćhümi uywaynin nunacta Eliseo nin: “Apamuśhancäta willacücunaca micapäcunanpä uycuy” nil.
43Niptinmi uywaynin: “¿Cayllacta imanuypatan paćhac (100) nunacunaman camachïman?” nin.
Niptinmi Eliseo: “Micapacunanpä uycuy jinalla. Tayta Diosmari nin: ‘Paycuna micapäcuptin puchunꞌalämi’ ” nil.
44Niptin uywayca uycuptin lluy micapäcuptin Tayta Dios nishannümari puchülalä.
Who We AreWhat We EelieveWhat We Do
2025 by iamachristian.org,Inc All rights reserved.
