1Ñatac Saulpa jinaman lluy ćhïnicünincunap maquinpïta Tayta Dios libraycuśhanpïtam taquiwan David alawaycula, caynu nil:
2“Tayta Diosllay, wancanu atajaycamänïmi,
pacaycamänïmi, libraycamänïmi canqui.
3Tayta Diosllay, wancanümi atajaycallämanqui.
Munayniquiwan callpanchayculmi salbaycallämanqui.
Sumäninmanmi pacaycallämanqui,
libraycamanqui, wañuchinacuypi julaycamanqui.
4Sumä altuman juluycuśha cä Tayta Diosnïmi
mañacuptí ćhïnicünïcunapi salbaycamäní.
5“Wañuycämi ulꞌunpalcul-ulꞌunpalcul yacu śhalcücänu ñiticalpaman,
sumä-sumä llüllanümi mana allincunaca manchächiman.
6Sipultüramá watuncunawan ćhänämäla.
Wañuycämá trampancunacta maśhtämäla.
7Llaquicuynïćhümi Tayta Diosta ayaculá.
Mañacuyllätam chay caśhanpïta Diosnillá uyaliycaman.
Ayacuyllämi linlincama ćhaycun.
8“Cay pachämi śhaśhaycäwan cuyülun.
Janay pachäpa simintuncunapis cuyülunmi.
Tayta Dios piñacüluptinmari lluy-lluy śhaśhälun.
9Sinꞌanpa untayllamá yalamula.
Shiminpapis camacaycü ninamá yalamula.
Walayä śhanśhactamá ätumula.
10Sïlüta wactishyalcachilmi jiꞌalpaycamun.
Yana-yana pucutay jananpam śhaycamun.
11Querubin anjilman sillacuśham pälimula.
Waywäpa laplanćhu pälishtinmi śhaycamula.
12Pacacunanpämi tutawyaycäta ćhulaycula.
Muyülïninpi atajaycunanpämi yana-yana
yanalpamü pucutayta ćhulaycula.
13Sumä chipyayä cayninpïtamá
walayä śhanśhacuna yalaycamula.
14“Janay pachäćhümi Tayta Diospa shimin
räyunu sumä limämun.
Sumä munayniyücämi limayninta uyalïchin.
15Flïchanta ćhïnicünïcunaman ćhächimuptinmi
wicman-cayman chiꞌichila.
Räyuncunacta ćhächimuptinmi camacaycüla.
16 Tayta Diospa sumä anyapayninwanmi
lamarcunäpa lulïninpis camalälun.
Piñacuyninćhu jamayninwanmi
cay pachäpa simintunpis camalacülun.
17“Tayta Diosnïmi altupïta maquinta chacchaycalläman.
Nisyu-nisyu yacup ćhawpinpïmi julaycalläman.
18Sumä munayniyu ćhïnicünïcuna captinpis,
yaꞌapïta mas munayniyu cayaptinpis
Tayta Diosmá libraycalläman.
19Mana allinta pasayaptïmi paycuna intulpäläliman.
Tayta Diosllamari yanapaycamäní caycula.
20Ñacaypïtam julaycallämäla.
Śhunꞌunpänu captïmi libraycallämäla.
21“Allincämannu cawsaycuśhäpïtam
Tayta Dios tincüninman uycalläman.
Maquí mana allincunawan
mana anlatacüśha caśhanmannümi uycalläman.
22 Tayta Diospa yaćhachicuyninmanümi cawsayculá.
Tayta Diosta mana caćhaycullalmi allincällacta lulayculá.
23Lluy camachicuynincunacta śhunꞌüćhümi uywaycú.
Yaćhachicuynincunacta manam imaypis unꞌayculächu.
24Puntanćhu śhunꞌunpänümi sumäpa cayculá.
Mana allincäta licayllapis manam licalculächu.
25Chaymi tincünïmannu Tayta Dios uycalläman.
Ñawquinćhu allin lulaycuśhäman tincütamá ćhasquiycullá.
26“Taytallay, llaquipayniyücäwanꞌa llaquipayniyümi caycunqui.
Allin cawsaycücäwanꞌa allinmi caycunqui.
27Chuya cäcunäwanꞌa allinpam caycunqui;
sumätucücunäwanꞌa sumä-sumätacmá caycunqui.
28Mana nunatucücunätamá salbaycunqui.
Nunatucücätañatacmi ichá uyshulächinqui.
29Am Tayta Diosnillämi acchí canqui.
Am Taytallämi tutapaynïćhu acchiycamanqui.
30Amwanꞌa sumä-sumä pilyäcunactapis camacaycüśhämi.
Am Tayta Diosnïwanmá sumä-sumä pilancunactapis pasäśhä.
31“Tayta Diospa caminaycuyninꞌa sumä allinmi.
Paypa yaćhachicuyninꞌa chalapacunam.
Tayta Diosmi chalapacünincunacta pacaycun.
32¿Tayta Diosnuꞌa mayanmá juc canman?
¿Mayantá wancanu pacaycamäninchic juc canman?
33Paymá callpacta uycaman.
Paymá allincällap caminaycaman.
34Paymi ćhaquïtapis luychup ćhaquintanu cürichiman.
Altunnin ulꞌucunäćhüpis masïsuctam pulichiman.
35Paymi pilyanäpäpis yaćhaycachiman.
Brunsipi cä arcuwanlä ćhächinäpäpis callpacta uycaman.
36Anmá atajaycamäní, salbaycamäní canqui.
Allï maquiquiwanmá tacyaycachimanqui.
Llaquipayniquimá allinman julaycaman.
37Caminüta pulipaśhllactamá quićhayculanqui.
Chaymi ćhaquí mana lluchcayculachu.
38“Ćhïnicünïcunacta aticaćhal supay-apächilämi;
lluy camacänäcamamá mana cutimulächu.
39Mana cämanñamá muyüchí, lluy-lluymi camacaycülú.
Manañam śhalcuytapis atipapäculañachu;
lluy-lluymari jalutacülú.
40Anmi, pilyanäpä callpacta uycamälanqui.
Anmá ćhïnicünïcunacta ćhaquïman uyshuycachimulanqui.
41Ñawpänïpïtamá ćhïnicünïcunacta ayichilanqui.
Chaynüpamá ćhïnicamänïcunacta camacayculá.
42Paycuna yanapaycunanpä ayaycaćhaptinpis
manamá mayan yanapaycüninpis calachu.
Am Tayta Diosta maynu-maynu ayaycaćhaśhuptiquipis manamá uyalïculanquichu.
43Ñutuy-ñutuy pulbuctanümi camacaycülú.
Caminućhu ñiꞌitanümá jaluypa pawälú.
44Cuntrá śhalcücunäpïmi libraycamanqui.
Nasyuncunap puydïninpalämi ćhulaycamanqui.
Mana lisisha malcacunälämi sirbiycäliman
45Juc caśhtacunämá maquïćhu caycälin.
Juc shimillaćhümi uyaliycälimanpis.
46Juc caśhtacunaca ćhinaśhyälälinmi.
Pacacuśhancunapïmi chucchuśhtin yalapäcamun.
47“¡Tayta Dios cawsachun!
¡Aꞌanu pacaycamäní allinpä licaycuśha cachun!
¡Salbaycamäní Tayta Dios altuman juluycuśha cachun!
48Paymá ćhïnicünïcunacta pudirní cutichicülun;
lluy malcacunätamá maquïman ćhulaycämun.
49Paymi ćhïnimänïcunapi libraycaman;
cuntrá śhalcücunäpä altunninmanlämi ćhulaycaman.
Pasaypi juyucunap maquinpïtamá salbaycaman.
50Chaymi lluy nasyuncunap puntanćhu altuman juluycuśhayqui;
am Tayta Diosnïtamá taquicunawan alawaycuśhayqui.
51Paymá aclacuśhan mandacüninta imaypis libraycun.
Imaypis Davidtawan lluy milaynincunacta
cuyacuywanmari licaycun” nin.
Who We AreWhat We EelieveWhat We Do
2025 by iamachristian.org,Inc All rights reserved.
