1Nasyuncuna, cayman aśhuycälimul uyalipäcuyña;
malcacuna sumäta uyaliycäliy.
Jinantin allpa lluy imapis cänintin,
jinantin pacha lluy imapis cänintin uyalipämay.
2Jinantin nasyuncunäpämá Tayta Dios piñäśha cayan;
lluy-lluypämari rabyäśha cayan.
Chaymi camacaycülunꞌa, maśhtaypa-maśhtaycülunꞌa.
3Wañücunaca jitaycüśhamá capäcunꞌa;
aya nunacunäpïmá aśhnaylla ishpimunꞌa;
ulꞌucunäpïpis yawarcunallamá unyaycamunꞌa.
4Sïlüpis lluy cänintinmá mana caśhanman muyunꞌa;
sïluca utanümari lluy shipucacülunꞌa.
Chayćhu cä uyllurcunäpis üba lantap,
ïgus lantap lapincunanümá lluy palpatityapämunꞌa.
5Tayta Diospa ispädan sïlüćhu lulanancäta camacäluptinmá,
Edom läducta cäraycunanpäña jiꞌalpamunꞌa;
camacaycüśha cananpä malcamanñamá śhamunꞌa.
6 Tayta Diospa ispädan yawarwan juntäśhañamari cayan.
Malta uwishpa, ulu capishpa yawarnincunawanmari,
jinaman ulu uwishpa lulunnincuna wilancunawan anläśhañamari cayan.
Tayta Diosmá Bosra malcaćhu cañaywan uycunꞌa;
Edom nasyunćhümá sumä maśhtaypa-maśhtaycülunꞌa.
7Aśhta alli-cama nunacunäpis munti wäcanümá wañupäcunꞌa;
müsucunäpis alli-cama cäcunäwan cuscamá camacaycüśha capäcunꞌa.
Allpaca yawarwan shincäśhañamá quïdanꞌa;
pampapis wilawan maćhaycüśhañamá cacunꞌa.
8Chay muyunca Tayta Diospa cutichicunan muyunninmá,
Sionwan pilyäcunäta tincüninman uycunan watamá.
9Edompa mayuncuna breamanmá muyülunꞌa;
pulbuncunapis asufrimanmá licalïlunꞌa;
allpanpis walayä breamanñamá muyülunꞌa.
10Tutapapis muyunpapis manañamari wañucälinꞌachu;
untayllamá imaypis ishpiyämunꞌa.
Chay allpa pasa-pasaypi pulumäśhañamá cacunꞌa;
chayninpa manañamá mayanpis pasanꞌañachu.
11Ućha pätucunawan tucucunallañamá duyñuchacaycälinꞌa;
tucucunawan wisculcunallañamá yaćhapäcunꞌa.
Pulumächinanpämari Tayta Dios curdilta chutaycunꞌa;
chunyachinanpämari plumädacta ćhulaycunꞌa.
12Paycunaćhu mandacünincunapis manañamá canꞌañachu;
lluy puydïnincunapis chincacunꞌañamá.
13Palasyuncunaćhüpis caśhacunallañamá wiñacunꞌa;
sumä-cama wasincunaćhüpis caśhacunawan ulacunallañamá cacunꞌa.
Atücunap maćhayninmanñamari licalïlunꞌa;
tucucucunap yaćhanallanmanñamá muyülunꞌa.
14Uśhu mishicunawan munti allꞌucunaca
juntunaculcänallanñamá cacunꞌa.
Chayćhümá munti capishcunäpis quiquinpula ayanaculcanꞌa.
Chayćhütacmá tucucunäpis yaćhapäcunꞌa,
jamaycuytapis talipäcunꞌa.
15Chayćhümá tucucunäpis ishñachaculcal luntucta waćhapäcunꞌa.
Paćhyächilmi laplanpa lulïllanćhu wawincunacta üllapäcunꞌapis.
Chaymantacmá imaymana quillincunäpis
ulun-ćhinan juntunaculcanꞌa.
16Má, Tayta Dios imacunacta lulaycunanpäpis
isquirbichishan pitwiläcätari sumäta licaycäliy.
Chay uywacunaca, pälïcunaca ćhinan-ulun
pärishniyu-camamá chayćhu lluy caycälinꞌa.
Chaynu cananpä quiquin Tayta Diosmari camachila;
chaynu cananpa Ispiritunmari juntuyculapis.
17Quiquin Tayta Dios tücaycachilmá mayninćhu-cama
uywacunaca yaćhapäcunanpäpis unanchaycula.
Chay tücäninćhümá pasaypipäña yaćhapäcunꞌa;
imaycamapis jinallaćhüñamá yaćhapäcunꞌa.
Who We AreWhat We EelieveWhat We Do
2025 by iamachristian.org,Inc All rights reserved.
