1Niptinmi Job nin:
2“Awari, chaynu caśhanta yaćhaytá-yaćhayämi:
Ñatac ¿imanuypatá Tayta Diospa puntanćhu nunaca ‘mana juchayümi’ cä niyanman?
3Tayta Dioswan mayanpis tapunacuyta munal walangantin-walangantinpa
tapucuyninta manamá jucllactapis niycuyta atipanmanchu.
4Payꞌa anchap yaćhayniyümi, sumä-sumä munayniyümi.
¿Mayanmá payta ruydupal allin yaluycunman?
5“Tayta Diosꞌa piñacuyninćhu ulꞌucunätapis aśhüchinmi;
quiquin ulꞌucunaca mana tantiaculcäśhan-camamá chaynu lulälun.
6Paytacmi cay pachäpa sapincunactapis cuyuchin.
Paradïruncunactapis śhaśhachin.
7Pay niptinꞌa intïpis manamá yalamunchu.
Pay mana munaptinꞌa uyllurcunäpis manamá acchimunchu.
8Pay japallanmari sïlütapis maśhtaycula.
Lamarca wicapacamuśhanpa jananpapis payꞌa puliycunmá.
9Paymi Osa, Orion, Pleyades nishan uyllurcunäta,
jinaman sur lädućhu canćha-canćhanu cä uyllurcunätapis camala.
10Paymá tantiayta mana atipana sumä-cama lulaycunacta lulaycun.
Fintayta mana atipana äśhalayllaman camanacunactamari lulaycun.
11Pay puntäpa pasayaptinpis manamá licämanchu.
Matänïpa liyaptinpis manamá sumä tantiämanchu.
12Imactapis chalacuycuptin ¿mayanmá ‘ama lulaychu’ ninman?
¿Mayantá ‘imactatan lulayanqui’ nil ninmanpis?
13Tayta Dios piñacülulꞌa manamá manalcunmanchu.
Paypa ćhaquinmanmi aśhta lamarćhu manchanaśh uywanu cäcunäpis yanapänintin uyshuycälinꞌa.
14“Chayurá ¿imanuypam imactapis niyäman?
¿Cutipacunäpä maypïtamá limaycunacta talïman?
15Masqui mana juchayu cayalpis manamá ima niytapis atipämanchu.
Cäraycüní llaquipaycamänallanpämi mañacuylla-mañacüman.
16Masqui ayacuptí uyaliycamalpis
nishäta pay manamá uyaliycamanmanchu.
17Payꞌa sumä-sumänincunawanlämá camacaycämanman;
yanꞌal-yanꞌalpïtamá dañädücunactapis milächinman.
18Manamá uchuyllactapis jamalcachimanmanchu.
Aśhwanpa piñacuyllactañam uycamanman.
19Callpäman tincuycachishá, pay sumä munayniyümari.
Fisyuman ćhulaycüluptïpis ¿mayanmá payta ayaycachimunman?
20‘Juchannämi cá’ niptïpis shimïmi cunca cuchuyní caycunman.
‘Chuyam cá’ niptïpis shimïmi juchayüta licaycachimanman.
21“Juchannä cayalpis manañam imapis ucamanchu.
Cay cawsaynïwan pasaypi amïshañam cayá.
22Lluy imapis chaynülla captinmari yaꞌa ní:
‘Juchayücätapis mana juchayücätapis chay cuscactam camacaycun’ nil.
23Aśhta mana juchayüca ima ishyaywanpis unꞌaypi
wañucuptin, payꞌa ñacayninpïta asicunlämá canpis.
24Cay allpäćhu pasaypi mana allin nunacunaca ćhaclacunacta waycaptinpis,
cäraycücunäpa ñawincunactapis aspächinlämá canpis.
Chaynu pay mana lulayaptinꞌa ¿mayanmari lulaycunman?
25“Má, ñawi imchiycuyllaćhümá cawsayní pasacunña;
allincäta manalä licayaptïmá pälicunña.
26Sumä shiwyaylla barcu lïcunänümi cawsayní pasacunña.
Aychacta licälul shiwyaylla jiꞌalpamü ancanümá cawsayní licunña.
27Cay quijacuynïta unꞌäśhäña niyaptïpis,
chaynütac llaquicuynïta cushicuyman muyulcachil callpanchacuśhäña niyaptïpis,
28cay nanaynïmari sumä manchacalpachiman-manchacalpachiman.
“Má, am Tayta Diosní, juchayüpäña licamäśhayquita tuquictamá yaćhayá.
29Juchasapapäña licayämaptiquiꞌa
¿imapäñamá yanꞌal-yanꞌal callpanchacuśha?
30Masqui jabunwan paꞌacuyaptïpis,
lijiyawan maquïta chuyanchacuyaptïpis,
31anlacuna caśhancämanmi amꞌa jitaycämanqui.
Quiquïpa müdanäcunapis millachicamanꞌañamari.
32“Payꞌa manamá yaꞌanu nunachu cäraycücunäpä
dispächunman ćhächinacunäpä.
33Maylä ishcayní particta cäraycälimänanpäpis
cäraycü caycunman,
34Tayta Diospa maquinta yaꞌapi manalcachinanpä,
mućhuchicuyninta manchacuśhallaña mana cawsayänäpä.
35Chaynu captinꞌa mana manchacullalñaćh limaycüman.
Yaćhacümari payta mana cutipacuśhäta.
Who We AreWhat We EelieveWhat We Do
2025 by iamachristian.org,Inc All rights reserved.
