1Imanuylä canꞌa imapapis janallanćhu cä Samaria malcaca,
Israel alawacuśhan malcaca, shincacunalla canan malcaca.
Imanuylä canꞌa allin pampap umanćhu cä malcaca;
awïsha waytanu upyayllamanña yaćhäśha cä curunanu malcaca.
2Paycunap cuntranmá Tayta Dios
sumä-cama pilyäta caćhamunꞌa;
sumä-sumä luntunu, lücu tamyanu,
wampuyä yacunümá paycunap cuntran śhalcunꞌa.
Jinalmi pampaman lluy muyüchinꞌa.
3Imapapis janallanćhu cä Samaria malca,
Israel alawacuśhan malca, shincacunalla canan malcamá,
ćhïnicünincunap jaluypa pawäśha canꞌa.
4Allin pampap umanćhu cä malcam cayan;
ñatac sumä caynin waytanümá awïlunꞌa.
Maynümi wamä wayumü ïgusta
pallalcul micacälälin,
chaynümá mayanpis licäca
chacchaycul lacsacalpunꞌa.
5Má, chay muyun ćhämuptinmá sumä munayniyu
Tayta Dios quïdä malcanpä acchinu cä curunannu caycunꞌa.
Paycunapä sumä tuqui licachipa cä aläjanümá caycunꞌa.
6Fiscunätapis dispächunćhu allin tincüllanman
licaycunanpämá uycunꞌa.
Malcap puncunta täpä pilyäcunätapis
sumä allin callpactamá uycunꞌa.
7Cananꞌa sasirdüticunäpis, Tayta Diospa willacünincunapis
bïnuwanmá pantälälin; sidrawanmá luclülälin.
Bïnuwan sunsülälil, sidrawan tupacaycaćhayalcalmi,
Tayta Diospa willacünincuna willacuyninćhu pantälälin;
quijaćhu cäraycuytapis manañamá atipapäcunñachu.
8Lluy mïsancunaćhüpis
anla lansapacuśhallancunañamá lawalayalcan;
manamá maycällapis allin chuya caycunñachu.
9Chay nunacunämi nipäcun:
“¿Mayantatá yaćhachiyta munayanqui?
¿Imapïtá chaynu niyalcämanqui?
¿Chayllala wasïsha mana ñuñuyä iñachacunallachun cayalcá imatá?
10¿Imapïtá uchuy nunallactanu nipayalcämanquiman:
‘cayta lulay, wicta lulay; caynu cawsay, wicnu cawsay’ nil?
¿Imapïtá manya-manyapi cutipalcul-cutipalcul:
‘caynümi-wicnümi’ niyalcämanquiman?” nil.
11Chaynu capäcuśhanpïmari chay malcacta
mana yaćhaśhan limaycunawanlä Tayta Dios limapanꞌa.
12Paycunactam nin: “Cayćhümi jawcayayca cayan;
cayćhümi jamaycuyca cayan;
pishipäśhacunaca cayćhu jamapäcuchun” nil.
Niptinpis paycuna manamá uyaliycälilapischu.
13Chaymi Tayta Dios manya-manyapi limapanꞌa uchuy nunallactanu:
“Cayta lulay, wicta lulay; caynu cawsay, wicnu cawsay” nil.
Manya-manyapïmari cutipalcul-cutipalcul:
“Caynümi wicnümi” ninꞌa.
Chaynu limapanꞌa lipäcul mitcacaculcul
waśhanpa cućhpapäcunanpämi;
trampacunaman palpulcälil prïsu apaśha capäcunanpämari.
Jerusalentam anyapan14Chayurá Jerusalenćhu jamuyapäcü asipä puydïtucücuna,
Tayta Dios nishanta uyalipäcuy.
15Amcunamá nipäcunqui: “Wañuycäwanmi limalinacälälí;
chayman mana ćhapäcunäpämari awninacälälí.
Chay sumä mućhuchicuy śhamüca
manamá imaypis alcansapämanꞌachu;
articuycäwanmá atajachicüta lulacälälí;
ingañacuycäwanmá pacaculcänäpä lulacälälí” nil.
16Chaymi sumä munayniyu Tayta Dios nin:
“Licapäcuy, Sionmanmi simintunpä sumä chalänin lumicta ćhulayá;
allin ćhaniyu, tuquish sumä lumictamari ćhulaycuyá.
Chayman chalapacüca manamá
cuyuchisha canꞌachu.
17Tincüninman-cama licaycuycämi plumädá caycunꞌa;
rasuncämannu-cama lulaycuycämi nibilní caycunꞌa.
Chay pacacunanpä cäca articunallawan luläśha captinmari luntulla pampaman muyüchinꞌa.
Chay pacaläśhanca ingañacuycunallawan luläśha captinmari sumä llüllaca apacunꞌa.
18Wañuycäwan limalinaculcäśhanta mana caśhanmanmá muyüchishä;
wañücuna caśhancäwan awninacuśhantapis pampamanmari muyüchishä.
Chay sumä mućhuchicuy śhamüca ćhämulmi lluy jalutacälälishunqui.
19Ćhämuśhanćhu, ćhämuśhanćhümi lluy apaculcäśhunqui;
tutapapis muyunpapis licalïmul-licalïmulmi alcansäśhunqui” nil.
Cay willacuyta uyaliycuśhallayquipis
sumä manchaymi amcunapä cacunꞌa.
20Cäma lulaśhayquica chutapacunayquipä anchap uchuyllamari;
catapis pitwicunayquipä anchap uchuyllamari.
21Perazim ulꞌućhu lulaśhannümá Tayta Dios lulaycunꞌa;
Gabaon pampaćhu piñacuśhannümá piñacunꞌa.
Mana tantiapaśh lulayta lulaycümi pay śhamunꞌa;
imaypis mana uyalishacta lulaycümi śhamunꞌa.
22Chayurá amañari jamuyal asipayalcaychu,
mas mućhuchicuyta mana tawacuyalcänayquipä.
Sumä munayniyu Tayta Dios
cay jinantin allpäta camacaycünanpämari niyan.
23Má, sumäta uyalipämay; allinta uyaliycäliy;
cay nishäta tuquictari uyaliycäliy.
24¿Äräca anyaśh muyunchun
mana jamaycul äray-äray cayan imamá?
¿Anyaśh muyunchun culpantapis maꞌaylla-maꞌayan imatá?
25Jinalcul ¿manachun eneldo, comino, trïgu,
siwäcunactapis, abïnacunactapis
tincüllanman-cama talpupäcun imamá?
26Chaynu tincüllanman talpüca, lulayta
yaćhaycun Tayta Dios yaćhaycachiptinmari.
27Yaćhaśhanchicnüpis eneldo nishanta manamá
tita wipyacuwanchu wipyanchic;
cominustapis manamá carritawanchu jaluchinchic.
Aśhwanpa eneldo nishantawan cominusta ñañu caśhpillawamá wipyanchic.
28Trïguctam ichá jaluchinchic;
ñatac manamá ñutunancamachu jaluchinchic.
Carritawanpis jaluchinchicmá;
ñatac pulbuyänancamachu manamá jaluchinchic.
29Cay yaćhaycunaca sumä munayniyu Tayta Diospïmari śhamun.
Paypa limapäcuynin sumä-camamá.
Paypa yaćhachicuynin alli-camamá.
Who We AreWhat We EelieveWhat We Do
2025 by iamachristian.org,Inc All rights reserved.
