Salmos 104 - Old Testament Quechua Wanca(QVW)

Imactapis camä Tayta Diosta alawaśhun

1Cawsayllay, llapan cawsayniquiwan Tayta Diosta altuman juluycuy.

Tayta Diosnillay, maynu sumä-sumämi canqui.

Sumä cayniquiwan, munayniquiwan müdacüśhamá cayanqui.

2Acchiwanmá müdacüśhanu cayanqui.

Tuqui lataśhta maśhtayänümá sïlüta maśhtälunqui.

3Altućhu cä yacup jananmanmá wasiquita śhalcächinqui.

Pucutaycätapis carritayquipämá ćhulälunqui.

Waywäpa laplanćhümá pulinquipis.

4Waywacunäta willacüniquipämá ćhulälunqui.

Ninap walaynintañatacmá sirbïniquipä ćhulälunqui.

5Cay allpäpa simintuntamá sumä ćhulayculanqui

imaypis mana cuyuchisha cananpä.

6Cay allpäta müdananwannümá lamarcäwan lancayculanqui.

Ulꞌucunätapis yacucunäwanmá pampayculanqui.

7Anyäluptiquimá yacucunaca ayiculcan.

Räyunu cä limayniquita uyalïlälilmá chincacaycälin.

8Chaynu niycüluptinmá ulꞌucunaca altu-altućhu camalälälin.

Pampacunaca luli-lulićhu licalïlälin.

9Unanchaycuśhayqui yacup culindantamá

ćhulaycunqui mana pasapäcunanpä,

allpäta caśhan mana ñitipäcunanpä.

10Anmari pucyucunäpi yacüta mayucunäman ćhächinqui.

Ulꞌun-ulꞌunninpa, wayun-wayunninpamá puśhanqui.

11Chay yacucunapïmá chucaru uywacunaca upyapäcun.

Chaycunawanmá munti aśhnucunäpis yacunayninta pasachipäcun.

12Mayucunäpa patancunaćhümá pälï pishucunäpis ishñachaculcan.

Jaćhacunäpa pallaynincunaćhümá tuqui-tuquicta taquipäcun.

13Anmá janay pacha wasiquipïta

jinantin ulꞌucunäman chächuycamunqui.

Tamyachimuśhayquiwanmá allpacunäpis maćhaycapäcun.

14Pastucunactamá uywacunäpä wiñaycachipunqui.

Lantacunätañatacmá nunacunäpä wiñaycachinqui.

Chaycunap wayuynintamá micapäcunanpä pallapäcunꞌa:

15bïnuca śhunꞌunta cushiycachinanpä,

asaytica cäranta achicyay-achicyayta lulaycunanpä,

tantaca callpacta uycunanpä.

16 Tayta Diospa lantaśhancunap,

Libanoćhu cedro ilu wiñachishancunap yacuncuna manamá pishiycunchu.

17Chayćhümá pälï pishucunaca ishñachaculcan.

Cipres lantacunaćhümá jatućha pälï wamancunäpis cawsapäcun.

18Altu ulꞌucunäćhümá munti capishcunaca yaćhapäcun.

Aꞌacunäćhümá biscachacunaca wasichaculcan.

19Timpucunäta tantiaycunapämá quilläta lulalanqui.

Intïpis yaćhanmá imay üra jiꞌalpunantapis.

20Yanawyayta ćhulaycamuptiquimá tutapälun.

Chayćhümá lluy munti uywacunaca yalapämun.

21Liyuncunaca apalcaćhaśhtinmá micunanta ashipäcun.

Micunanta taliycachinanpämá Tayta Diosta mañacuśhtin pulipäcun.

22Intica yalämuptinñatacmi maćhayninman cuticulcan.

Yaycuyculmá jitalacaycälin.

23Nunacunäñatacmá lulayninta lulapäcunanpä yalapäcun.

Tutalpunan-camamá lulapäcun.

24 Tayta Diosllay, maynu-maynümá lulaycuśhayquicunaca cayan.

Lluy-lluyta sumä yaćhaywanmá lulayculanqui.

Jinantin allpaca lluy camaśhayquicunäwan juntäśhamá cayan.

25Chayćhümá mana camacaycü jatu-jatun lamarcäpis cayan.

Chay lamarcäćhümá uchuchacha jatućhaćha

imaymana licchä alli-allicuna cayalcan.

26Chay lamarćhümá barcucunapis bädupäcun.

Chayćhütacmá Leviatan nishan juyu manchanaśh

uywapis awsacunanpä cayan.

27Lluy chaycunamá amllacta alcayalcäśhunqui,

timpullanćhu micuynincunacta taliycachinayquipä.

28Am uycuptiquimá paycuna pallapäcun.

Maquiquita chacchaycuptiquimá allinnincunawanlä maćhaycapäcun.

29Manaña licaycuptiquim ichá pasaypi jucmanyälälin.

Jamayninta quitäluptiquiꞌa wañülälilmi pasaypi allpaman muyülälin.

30Ñatac ispirituyquita caśhan caćhaycamuptiquimá

lulaśhayquicunaca cawsaycälin.

Cay allpäćhu cäcunäta tuqui caśhanmannüllamá yapa muyuycachinqui.

31¡Tayta Diospa sumä caynin wiña-wiñaypä cachun!

¡Lluy lulaśhancunaćhu Tayta Dios cushicuchun!

32Pay licalcuptin cay allpäpis chucchunmá.

Tupaycüluptinꞌa lluy ulꞌucunäpis untalipäcunmá.

33Cawsaśhäcamá Tayta Diosnïta alawaśhämi.

Cawsaśhäcamá taquicunawanmi taquiycuśhä.

34Cay tantiapaycuśhäca paypa śhunꞌunpä caycuchun.

Yaꞌañatacmi Tayta Dioslläćhu cushicú.

35Juchasapacunaca cay pachäpi chincapäcunchunñari.

Mana allin nunacunaca amañari capäcuchunchu.

¡Cawsayllay, llapan cawsayniquiwan Tayta Diosta altuman juluycuy!

¡Tayta Diosta alawapäcuy!

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help