Jeremias 40 - Old Testament Quechua Wanca（QVW）

Gedaliaswanmi Jeremias quïdacun

1Chaypi Jerusalen nunacunäwan Juda lädu nunacunämi cadinälälisha cayäla Babiloniaman prïsu puśhaśha capäcunanpä. Chayćhu Jeremiaspis cadinäśha cayaptinmi pilyäcunäpa puydïnin Nabuzaradan libricta Ramaćhu caćhaycüla. Chaypïtam Jeremiasta Tayta Dios limapäla.

2Jeremiasta juc läduman puśhalculmari Nabuzaradan nin: “Cay malcaman mana allinca ćhämunanpä Tayta Diosniquimari niyan.

3Chay nishannüllamari canan lulaycuyan. Chaynu pasayan amcuna Tayta Diospa cuntran mana allinta lulapäcuśhayquipïmá; jinaman mana cäsuculcäśhayquipïmá.

4Ñatac cananꞌa cadinäśha maquiquita pasquishayquimari. Babiloniaman yaꞌawan liyta munalꞌa lichwanmi. Chayćhu yaꞌamá ñawilläćhu licaycuśhayqui. Ñatac yaꞌawan liyta mana munalꞌa quïdacunquimantacmi. Cay jinantin allpaca maquillayquićhümá cayan; munaśhayqui läduman lilmi chayćhu yaćhacunquiman” nil.

5Chayćhu Jeremias imaniytapis mana atipaptinmi Nabuzaradan nin: “Safanpa willcan, Ahicampa chulin Gedalias caśhanmanpis cuticunquimantacmi. Paytamari Juda lädup puydïninpä Babiloniap mandacüninca ćhulälun. Chayćhu malca-masiquicunawan cusca yaćhacunquimanmari, ütac munaśhayqui lädumanpis linquimanmi” nil.

Nilculmi Nabuzaradan micuyta, rigälucta uycul Jeremiasta librictaña caćhaycüla.

6Chaymi Ahicampa chulin Gedalias yaćhaśhan Mizpaman Jeremias licula. Chayćhümi quïdä malca-masincunawan yaćhamula.

Gedaliaspa cuntranmi Ismael śhalcun 2Rey 25.23-24

7Chay Juda lädu ulꞌucunäćhu cä pilyäcunäpa puydïnincuna, jinaman waquin pilyäcunam yaćhäläliña Babilonia mandacüninca Ahicampa chulin Gedaliasta Juda lädup puydïninpä ćhuläśhanta. Chaynu ćhulaśha cala Babilonia läduman mana puśhaśhan nunacunäta, walmicunäta, chulincunacta, wacchacunäta, mana cäniyücunäta licaycunanpämari.

8Chayta yaćhäcunaca capäcula: Netaniaspa chulin Ismael, Careapa chulin Johananwan Jonatan, Tanhumetpa chulin Seraias, Netofa lädu Efaipa chulincuna, Maaca lädu nunap chulin Jezaniaspis lluy nunantin-cama. Paycunamari Mizpaćhu cä Gedaliasman lipäcula.

9“Chayćhümi chay puydï nunantin lïcunäta Safanpa willcan, Ahicampa chulin Gedalias nin: ‘Caldeo läducunäta sirbiyta ama manchaculcaychu. Cay Babiloniap mandacüninta sirbishtin quïdaculcaptiquiꞌa, allinmi chayćhüpis capäcunqui.

10Yaꞌañatacmi Mizpaćhu quïdacuśhä, cayman śhamü Babilonia läducunäwan amcunapi limanäpä. Amcunañatac mayannin malcactapis duyñuchacaycälil, chayćhu yaćhapäcuy. Chayćhütac bïnucta, rütacta, asayticta imamanpis juntuculcay’ ” nil.

11Chaynütacmi Moab, Amon, Edom lädućhu, jinaman juc nasyuncunaćhu yaćhä Juda läducunaćhüpis yaćhäläliña, Babiloniap mandacüninca Juda lädućhu parti nunacunacta caćhaycüśhanta. Jinaman Safanpa willcan, Ahicampa chulin Gedaliasta paycunap puydïninpä ćhuläśhanta yaćhäläliña.

12Chaymi jinantin chiꞌisha cä nasyuncunäpïta Juda läduman cutipämul Mizpaćhu cä Gedaliasman lipäcula. Paycunapis achca bïnuctawan rütacunactamari juntupäcula.

Gedaliaspa cuntranmi Ismael limanacun

13Chaypïta Careap chulin Johananmi ćhaclacunäćhu cä pilyäcunap puydïnincunawan Mizpa malcaćhu cä Gedaliasman lipäcula.

14Ćhaycälilmi nipäcun: “¿Manachun yaćhanqui Amon lädup mandacünin Baalis wañuchishunayquipä Netaniaspa chulin Ismaelta caćhamuśhanta imamá?” nil. Niptinpis Ahicampa chulin Gedaliasñatacmi mana quirilachu.

15Chaymi Careap chulin Johanan Mizpa malcaćhu cayal pacallap Gedaliasta nin: “Mana mayantapis tantiachillal Netaniaspa chulin Ismaelta wañüchimuśhä. ¿Imapïmá amta wañüchishunquiman? Wañüchishuptiquiꞌa amwan cä Juda lädu nunacunäćha chiꞌilälinman; parti Juda läducunäpis chincacunmanćha” nil.

16Niptinmi Ahicampa chulin Gedalias nin: “Ama wañuchiychu. Ismaelpi nishanca manamá rasunpachu” nil.