Jeremias 27 - Old Testament Quechua Wanca（QVW）

Yügumanmi tincuchin

1Josiaspa chulin Sedequias2Rey 24.18-20; 2Cro 36.11-13. tawa wataña Juda lädup mandacünin cayaptinmi Jeremiasta Tayta Dios nin:

2“Latiguctawan yügucta lulaculcul cuncayquiman watacüluy.

3Jinaman Juda lädup mandacünin Sedequiasta watuculcänanpä Jerusalenman śhamü willacücunäwan willacachimuy Edom, Moab, Amon, Tiro, Sidon malcacunap mandacünincunaman.

4Chay nunacunätam ninqui: ‘Mandacüniquicunacta willaycuy, Israelpa sumä munayniyu Tayta Diosninmi nin:

5Yaꞌami sumä munaynïwan cay allpäta, nunacunäta, chaynütac jinantin allpäćhu cä uywacunätapis lulayculá. Caycunacta munaśhämannümi mayanpa maquinmanpis ćhulaycüman.

6Cananꞌa cay allpacunäta Babiloniap mandacünin sirbïní Nabucodonosorpa maquinmanmi ćhulaycú. Aśhta munti uywacunätapis maquinmanmi ćhulaycú sirbipäcunanpä.

7Lluy nasyuncunapis payta, chulinta, willcantamá sirbipäcunꞌa. Chaynu canꞌa juc nasyuncunap alli-cama mandacünincunap maquinman ćhulaycunäcamallamá.

8Chay Babiloniap mandacünin Nabucodonosorpa yügunman mayan nasyunpis ütac mandacüpis mana ćhulacücäta, mana sirbïcäta yaꞌami lawćhaycuśhä ispädawan, micuy wanaywan, ishyaycunawanpis. Nabucodonosorpa maquinćhu lluy canancamamari lawćhaycuśhä. Yaꞌa Tayta Diosmari niyá.

9“ ‘Chayurá artish willacücucuna, licacücunaca, suyñucunacta tantiäcunaca, musyacücunaca, rüjacunaca “Babiloniap mandacüninpa maquinman ama ćhulaculcaychu” nishuśhayquicunacta ama cäsucuyalcaychu.

10Paycuna chaynu articunacta willayalcäśhunqui cay allpayquipi calupänayqui-laycullamá; jinaman yaꞌapis calu nasyunman alapacüluptí chincapäcunayqui-laycullamá willayalcäśhunqui.

11Ñatac Babiloniacta mandacücäpa yügunman ćhulaculcul sirbï nasyuncätam ichá chay allpallanćhu caćhaycuśhä. Chaymi jina ćhaclancunallaćhu talpupäcul yaćhapäcunꞌa. Yaꞌa Tayta Diosmari niyá’ ” nil.

12Chaynütacmi lluy caycunacta Juda lädup mandacünin Sedequiasman willaculá: “Babiloniap mandacüninpa yügunman ćhulacul paytawan jinantin malcanta sirbipäcuy. Chaynu lulayculmi cawsanqui.

13¿Ampis nunayquicunapis gïrrawan, micuy wanaywan, ishyaywan wañupäcunayquichun imatá? Tayta Dios nishannu Babiloniap mandacüninta mana sirbï nasyuncunämá chaynu camacanꞌa.

14Chayurá willacücunaca: ‘Babiloniap mandacüninta ama sirbipäcuychu’ nishuśhayquicunacta ama cäsucuyalcaychu. Paycuna articunallactamá willacuyalcan.

15Manamari Tayta Dioschu caćhamula. Paycuna Tayta Diospa śhutinćhülä articunacta willacuyalcan, allpayquipi alapacüśha capäcunayqui-laycullamá. Chayćha amcuna chay casqui willacücunäwan cusca chincachisha capäcunqui. Tayta Diosmari chaynu niyan” nil.

16Chaynütacmi Tayta Dios nimäśhanta sasirdüticunätapis jinantin malcantinta niyculá: “Chay willacücunaca ‘Babilonia lädupi Tayta Diospa alawana wasinćhu sirbichicunapä cäcunaca cutichimuśhañam canꞌa’ nishancunacta ama cäsuyalcaychu. Chaynu willacuśhancunaca articunallamá.

17Paycuna nishanta mana cäsucullal Babiloniap mandacüninta sirbipäcuy. Chaynu lulalmi cawsapäcunqui. ¿Imapïmá cay malca pampaman muyüchisha canman?

18Sïchuśh Tayta Diospa willacuyninta uywapäcul rasunpa willacücuna capäculꞌa sumä munayniyu Tayta Diostari mañaculcächun: ‘Alawana wasićhu, Juda lädu mandacücäpa palasyunćhu, jinaman Jerusalenćhu sirbichicunapä cä quïdäcunaca Babiloniaman amari apaśha cachunchu’ nil.

19-21“Joacimpa chulin Juda lädup mandacünin Jeconiasta,2Rey 24.8-17; 2Cro 36.9-10. Juda lädućhu, Jerusalenćhu cä lluy puydïcunäta prïsu puśhal Babiloniap mandacünin Nabucodonosor manam apalachu Jerusalenćhu cä brunsipi paradïruncunacta, brunsipi cä jatun istanquinta, nï täcunantapis, nïtac alawana wasićhu sirbichicunapä cäcunätapis. Chay alawana wasićhu, Juda lädup mandacüninpa palasyunćhu, chaynütac Jerusalenćhu quïda sirbichicunapä ćhaniyu cäcunäpïtam Israelpa sumä munayniyu Tayta Diosnin nin:

22‘Lluy chaycuna Babiloniaman apaśhamá capäcunꞌa. Chayćhümi camunꞌa cay sityuman yaꞌa cutichimunäcama’ ” nil.