2 Samuel 17 - Old Testament Quechua Wanca（QVW）

Ahitofelwan Husaimi Absalonta tantiachipäcun

1Chaypïtam Absalonta Ahitofel nin: “Má, caytanümi yaꞌa luläman, ćhunca ishcayniyu walanga (12,000) pilyäcunacta aclalculmi canan tuta Davidta ashï pasacüman.

2Pay pishipäśha mana callpayu cayäta unꞌaypi chalalcul manchächïman. Jinaptïmi paywan cä lluy nunancunapis ayiculcanman. Chayćhümi mandacücällactaña wañüchïman.

3Chayćha jinantin malcaca anman cuticalcämunman. Jucllay nunap wañuyllantamari am ashiyanqui. Paycuna cutipämuptinmi jinantin malcaca jawcayayćhu capäcunman” nil.

4Chay nishancämi Absalonpäwan Israelpa lluy yaśhancunapäpis allinnu cala.

5Absalonñatacmi nin: “Má, Ar lädu Husaitapis ayamuśhun, imactaśh ninꞌa” nil.

6Chayćhu Husai ćhämuptinmi Absalon nin: “¿Ahitofel nimäśhanchicmannüchun lulaycuchwan? icha, ¿am imaninquim?” nil.

7Niptinmi Husai nin: “Ahitofelpa nishanca cananꞌa manam allinchu.

8Am tuquictam yaćhanqui taytayqui David lluy pilyänincunawan mana manchacü-cama capäcuśhanta. Jinaman wawincunacta suwäśha cä ucumälinüćha sumä piñäśha cayalcan. Ñatac taytayqui pilyaypä sumä ishpisha-ishpisha cayalꞌa tutapapis nunancunawan manaćhá jawca puñucunꞌachu.

9Pay jucnin maćhayćhüñaćhá ütac juc lädućhüñaćhá pacalayan. Paycuna pilyayta allaycapäcul jucnin nunallayquipis palpüśhanta yaćhälul nipäcunꞌamá: ‘Absalonpa nunancunactamá lluy-lluy camacaycülun’ nil.

10Chaymi liyunnu cä sumä balintinnin pilyäniquicunapis chinaśhyälälinꞌa. Lluy israelcunämá yaćhapäcun taytayqui Davidwan lluy nunancunapis sumä-cama pilyaypä capäcuśhanta.

11Yaꞌañatacmi caynu lulanayquipä nic: Jinantin lluy-lluy israelcunäta ayachimuy Danpïta allacuycul aśhta Beersebacama. Israelcunaca lamarcäćhu awishquinümi alli-alli cayanchic. Paycunacta am quiquiquim pilyuman puśhanqui.

12Chayćha mayćhu cacuptinpis śhulli palpamücänu paycunacta camacaycüśhun. Chaynüpaćh Davidpis nï jucllay pilyällanpis cawsayniyu quïdanꞌachu.

13Jucnin malcaman pacacü ayiptinpis, chay malcap pilantam pampaman muyüchishun; aśhta watu apaśhanchicwanpis mayü-camamá aysämuśhun. Chaynüpaćh juc lumillapis chayćhu mana quïdanꞌachu” nil.

14Niptinmi Absalonwan jinantin israelcunaca nipäcun: “Ahitofel limapamäśhanchicpïtá mas allin Ar lädu Husai nimäśhanchiccämi” nil. Masqui Ahitofelpa nishanca allin cayaptinpis quiquin Tayta Diosmi pirdïchila Absalon camacaycüśha cananpä.

15Chaypïta sasirdüti Sadoctawan Abiatartam Husai nin: “Absalontawan Israelpa puydï yaśhancunacta caynu-wicnu lulananpämi Ahitofel nila. Yaꞌañatacmi ichá cay juccäta nilá.

16Chayurá apuraylla Davidman willachimuy: ‘Taytay, cay chunyä pampäćhu cay tuta ama wälaychu. Aśhwanpa chimpay ampis lluy nunayquicunapis camacaycüśha mana capäcunayquipä’ ” nil.

17Jonatanwan Ahimaasñatacmi Rogel pucyućhu cayalcäla, malcaman yaycapäcuśhanta mana licapäcunanpä. Paycunaman uyway wamla lilcul willaycuptinmi paycunañatac mandacü Davidman willaycü pasaculcäla.

18Chaynu pacallap liyalcäta juc müsu licälulmi Absalonman willaycula. Chaymi paycuna mana-mana pasaculcal Bahurim malcaćhu nunap wasinman ćhälälin. Jinalmi patyunćhu püsunman pacacälälin.

19Jinaptinmi wasiyu wayapap walmin püsucta täpaycul janäninman trïgucta masaycülun. Jinaptinmi mayanpis mana musyalachu.

20Absalonpa pilyänincuna chay wasiman ćhaycälilmi walmicta nin: “¿Jonatanwan Ahimaas mayćhümi cayalcan?” nil.

Niptinmi walmica: “Cayninpam mayu läduman pasaculcan” nin.

Chaymi pilyäcunaca ashï pasaculcal mana talipäcunchu. Jinalmi Jerusalentaña cuticulcäla.

21Chaynu pilyäcunaca pasaculcaptinñam Jonatanwan Ahimaas püsupïta yalälälimul mandacü David caśhanman liculcäla. Ćhayculmi nipäcun: “Ahitofelmi amcunawan pilyapäcunanpä niycülun. Chayurá canan-pacha apuraylla wic-läduman chimpapäcuy” nil.

22Chaymi David lluy nunancunawan manaläpis wälaśhancama Jordan mayucta chimpälälin. Manam jucllayllapis quïdalachu.

23Ñatac Ahitofel limapäśhancäta Absalon mana lulaśhanpïmi aśhnunman sillaculcul malcanta licun. Ćhayculmi lluy aylluncunacta incargacuycul siꞌicülun. Chaynüpa wañüluptinmi papäninpa nïchunman pampäśha cala.

24Chaypïta Mahanaim malcaman David ćhäluptinñam Absalonñatac lluy israelcunäwan atiyalcal Jordan mayucta chimpayalcäla.

25Ñatac Absalonmi pilyänincunap puydïnin Joabpa pudirnin Amasacta ćhuläña. Paymi Israel caśhta Itrap chulin cala; mamanñatacmi Nahaspa wawin Abigail cala. Nahas cala Joabpa maman Sarviap ñañanmari.

26Absalonwan cä israelcunämari Galaad lädućhu jamapäcula.

27Ñatac David Mahanaimman ćhäluptinmi ćhasquipäcula Amon lädu Raba malcayu Nahaspa chulin Sobi, Lo-debar malcayu Amielpa chulin Maquir, jinaman Galaad lädu Rogelim malcayu Barzilaipis.

28Paycunam Davidpäwan nunancunapä apapäcuña: cämacunacta, täsacunacta, allpa mancacunacta, trïgucunacta, siwäcunacta, arinacunacta, ancaycunacta, äwaśhcunacta, lintïjacunacta,

29mishquicunacta, cuajucunacta; jinaman uwishpi, wäcapi quïsucunactapis apapäcula micapäcunanpä. Paycunamari pinsapäcula: “Chay chunyäcäpi śhapämuśhanta micuypi, yacupi, pishipäśhaćh cayalcällan” nil.