Levitico 4 - Old Testament Quechua Wanca（QVW）

Chuyanchacüśha cananpä uycuypïmi nin

1Chaypïta Moisestam Tayta Dios nin:

2“Israel caśhtacunäta cayta niy: Mayanpis mana munayal Tayta Diospa camachishanta mana allinta lulälulꞌa, ütac chaynu mana lulananta luläluptinꞌa caynümi lulaycunayqui.

3“Puydï sasirdütipa japächaycuśha cäca ima mana allintapis lulälulꞌa malcätapis mana allinmanñam jitaycülun. Chaymi chay mana allin lulayninpi Tayta Diosman uycunꞌa allinnin wäcacta.

4Chay wäcacta Tayta Diosman uycunanpä tincuna carpap yaycunanmanmi puśhaycunꞌa. Chayćhu maquinta umanman ćhulayculmi Tayta Diospa puntanćhu muꞌulunꞌa.

5Chaypïtam japächäśha puydï sasirdütica wäcap ash yawarninta tincuna carpaman apaycunꞌa.

6Chay yawarcäman dïdunta challpuyculmi anchiśh cuti chächunꞌa. Chaynu lulanꞌa Tayta Diospa puntanćhu Chuya Sityucta laquï curtïnap puntanćhümi.

7Jinamanꞌa insinsiu cañana patacpa wälaniläninmanmi ash yawarllawantac sasirdütica llusiycunꞌa. Chay patacca cayan Tayta Diospa puntanćhu, tincuna carpaćhümari. Puchü yawarcätañatacmi cañana uycuna patacpa ćhaquinman jićhaycunꞌa.

8Chaypïtam chuyanchacuśha cananpä uycuśhan wäcap lluy wilanta, pata wilanta uycunꞌa.

9Chaynütacmi uycunqui lulunnintapis wilantinta, lümunćhu wilantapis, ñatinninćhu wilantapis, luluntinta.

10Chaynu wäcap wilancunacta juluycunꞌa allin cawsaśhanpi Tayta Diosman uycuśhantanümi. Chaypïta lluy caycunacta uycuna pataccäćhümi sasirdütica cañaycunꞌa.

11Ñatac carpapïmi juluycunꞌa chay wäcap utanta, lluy aychanta, umanta, caćhpanta, allashquinta, jayuntapis.

12Chayurá lluy caycunacta carpap waśha lädu unanchaśhan chuyanninmanmi julülunꞌa; chay ućhpa jitananćhu yamta waläcäćhümi cañälunꞌa. Chay ućhpa jitananćhümari cañaycülunꞌa.

13“Sïchuśh jinantin Israel caśhtaca mana tantial mana allinta lulälulꞌa, jinantin malcam juchayüña cayan. Chaynu cayalcan Tayta Diospa camachicuyninćhu mićhacuśhanta lulapäcuśhanpam.

14Chay mana allin lulaśhanpi malcaca tantiacülulñatacmi ichá juc wäcacta Tayta Diosman uycälinꞌa. Chay tincuna carpap puncunmanmari apaycälinꞌa.

15Chayćhümi Tayta Diospa puntanćhu malcap yaśhancuna wäcap umanman maquinta ćhulaycälil muꞌulälinꞌa.

16Chaypïta japächäśha puydï sasirdütïmi wäcap ash yawarllanta tincuna carpaman apaycunꞌa.

17Chayćhümi dïdunta yawarcäman challpuycul chächunꞌa anćhish cuti chuya-chuya sityućhu cä Tayta Diospa puntanta, curtïnap puntanćhu cäcäta.

18Jinamanꞌa insinsiu cañana patacpa wälaniläninmanmi ash yawarllawantac llusiycunꞌa. Chay patacca cayan Tayta Diospa puntanćhu, tincuna carpaćhümari. Puchü yawarcätañatacmi cañana uycuna patacpa ćhaquinman jićhaycunꞌa. Chay cayan tincuna carpap puncunćhümi.

19Chayćhu wäcap lluy wilanta jululculmi uycuna pataccäćhu cañaycunꞌa.

20Chuyanchaycuśha cananpä wäcawan lulaśhancänüllam caywanpis lulaycälinꞌa. Chaynüpa puydï sasirdütica malcap juchan chuyanchaycuśha cananpä lulaycuptinmari pampachaycuśha caycunꞌa.

21Chaypïtam carpapi wäcacta jululcul punta wäca cañaśhannu cañaycunꞌa. Caymari malca chuyanchaycuśha cananpä caycunꞌa.

22“Sïchuśh puydïnin nunaca mana munayal Tayta Diospa nishanta mana cäsuculꞌa mana allintañamá lulälun.

23Chay mana allin lulaśhanta tantiacülulꞌa juc allinnin capishtam uycunanpä apanꞌa.

24Chay Tayta Diospa puntanćhu, uywacunacta cañanapä cä sityućhümi capishpa umanman maquinta ćhulaycul muꞌulunꞌa. Cay cayan chuyanchaycuśha cananpä uycuymari.

25Chaypïta sasirdütica uywa wañuchishanpa parti yawarninmanmi dïdunta challpaycachinꞌa. Jinalculmi cañana uycuna patacpa wälaniläninman dïdunwan llusiycunꞌa. Parti puchücätañatacmi uycuna patacpa ćhaquinman jićhaycunꞌa.

26Chaypïta allin cawsaśhanpïta Tayta Diosman uycuycäćhünümi capishpa lluy wilancunacta uycuna pataccäćhu cañaycunꞌa. Chaynütam sasirdütica lulaycunꞌa puydï nuna chuyanchaycuśha cananpä.

27“Sïchuśh mayannin Israel nunapis mana munayal Tayta Diospa camachicuyninćhu mićhacuśhanta lulälulꞌa mana allintañamá lulälun.

28Chay mana allin lulaśhanta tantiacülulꞌa juc allinnin ćhina capishtam juchanpi uycunanpä apaycunꞌa.

29Chay uywacta cañanapä cäcäćhu umanman maquinta ćhulayculmi muꞌulunꞌa.

30Chaypïta sasirdütica capish wañuchishanpa parti yawarninmanmi dïdunta challpachinꞌa. Jinalculmi cañana uycuna patacpa wälaniläninman dïdunwan llusiycunꞌa. Parti puchücätañatacmi uycuna patacpa ćhaquinman jićhaycunꞌa.

31Chaypïta allin cawsaśhanpi Tayta Diosman uycuycäćhünümi capishpa lluy wilancunacta jululcul uycuna pataccäćhu cañaycunꞌa, Tayta Diosman tuqui mishqui aśhnä ćhaycunanpä. Chaynütamari sasirdütica lulaycunꞌa chay nuna chuyanchaycuśha cananpä.

32“Sïchuśh chay nunaca juchanpïta uwishta uycunanpä apamulꞌa allinnin ćhina uwishtam apamunꞌa.

33Chayćhümi uywap umanman maquinta ćhulaycunꞌa. Jinalculmi cañaycunapä uywacunacta wañuchishancäćhu muꞌulunꞌa.

34Chaypïta sasirdütica ćhina uwish wañuchishanpa parti yawarninmanmi dïdunta challpachinꞌa. Jinalculmi cañana uycuna patacpa wälaniläninman dïdunwan llusiycunꞌa. Parti puchücätañatacmi uycuna patacpa ćhaquinman jićhaycunꞌa.

35Chaypïta allin cawsaśhanpi uycuycäćhünümi uwishpa lluy wilancunacta jululcul uycuna pataccäćhu cañaywan uycunꞌa, Tayta Diosman tuqui mishqui-mishqui aśhnay ćhaycunanpä. Chaynütamari sasirdütica lulaycunꞌa chay nuna chuyanchaycuśha cananpä.