1Chaynütacmi Tayta Dios nin:
“Moab lädup mana allin lulaynincuna sumä-sumäñamá cayan.
Chaymi mućhuycachiyta mana manalcuśhächu.
Paycunamari Edom lädup mandacüninpa
tulluncunacta ućhpayänancama cañälälila.
2Chay Moab läduman ninacta lataycächiptïmá
Queriotćhu cä sumä sigüru murällancunacta camacaycülunꞌa.
Chaynüpamá Moab lädućhu lluy nunacunaca
gïrrap ćhawpinćhu, curnitillap tucayninpa ćhawpinćhu camacaycüśha capäcunꞌa.
3Chay nasyunpa mandacüninta,
lluy puydïnincunactawan cuscactamá camacaycüśhä.
Yaꞌa Tayta Diosmari niyá” nil.
Juda läducta cäraycunanpämi nin4Chaynütacmi Tayta Dios nin:
“Juda lädup mana allin lulaynincuna sumä-sumäñamá cayan.
Chaymi mućhuycachiyta mana manalcuśhächu.
Paycunamari yaꞌa Tayta Diospa
camachicuynïcunacta jalutacälälin;
yaćhachicuynïcunacta manamá cäsuculcälachu.
Awquilluncuna yanꞌal taytachancunacta
alawaśhanman muyucalcälilmá cawsapäcula.
5Chay Juda läduman ninacta lataycächiptïmá
Jerusalenćhu cä sigüru cänincunactapis lluy camacaycülunꞌa” nil.Israel läducta cäraycunanpämi nin
6Chaynütacmi Tayta Dios nin:
“Israel lädup mana allin lulaynincuna sumä-sumäñamá cayan.
Chaymi mućhuycachiyta mana manalcuśhächu.
Paycunamari mana juchayu cäcunäta illaypä lanticälälin;
mana cäniyu wacchacunätañatac juc sapatullapä lanticälälin.
7Wacchacunäta pulbuctanümá pampäćhu jaluypa pawälälin.
Mana nunatucü nunacunätapis mana allinmanmá iwïlälin.
Taytanwan chulinmi jucllay wamlallawan puñupäcun.
Jinapäcuśhanwanmá chuya śhutïta jalutacuyalcan.
8Müdana chalachishancunaćhümá uycuna pataccunap puntanćhu puñuyalcan.
Yanꞌalpïta multacunacta mañaśhanwanmá
bïnucta lantiycul taytachancunap wasincunaćhu upyayalcan.
9Ñatac chay cedrocunänu altu-cama,
encinacunänu masïsu-cama cä Amhor läducunätamá yaꞌa camacaycülá.
Wayuynincunactamá pampaman yaꞌa muyüchilá;
sapincunactamá chutälá.
10Egipto lädupi amcunacta yaꞌami julaycamul
tawa ćhunca (40) wata, chunyä ulꞌunpa puśhaycapäculac,
aśhta Amhor läducunap allpancunacta uycälinaccama.
11Ampa chuliquicunapïtamá willacücunacta śhalcachilá;
müsuyquicunapïtamá nazareocunactapis śhalcachilá.
Israelcuna, ¿manachun chaynu cala imamá?
Yaꞌa Tayta Diosmari niyá.
12“Amcunañatacmi ichá nazareocunäta
bïnucta upyachipäculanqui.
Willacücunätapis manalcachipäculanqui ‘Ama willaculcaychu’ nilmá.
13Chaymi trïgu cargayu carrita allpacta
jalücänu amcunacta jalüśhayqui.
14Päliylla-päliypa pulïcäpis manamá ayinꞌachu.
Sumä callpayücätapis callpan imaćhüpis manamá yanapanꞌachu.
Sumä pilyänincunapis manamá salbacunꞌachu.
15Flïcha ćhächïcäpis manamá tacyaycunꞌachu.
Sumä päliylla-päliypa cürrïcäpis manamá ayinꞌachu.
Cawalluman sillaculcul ayïcäpis manamá salbacunꞌachu.
16Chay muyun sumä allinnin cachacucunäpis
calanllanmari ayipäcunꞌa.
Yaꞌa Tayta Diosmari niyá” nil.
Who We AreWhat We EelieveWhat We Do
2025 by iamachristian.org,Inc All rights reserved.
