1 Tayta Diosmi nin:
“Sïlümi dispächuꞌa;
Chaynu cayaptinꞌa,
¿ima wasictamá yaćhanäpä lulaycälipamanquiman?
¿Mayćhümá jamaycunäpä canman?
2Sïlüpis allpäpis maquïwan lulaycuśhämari cayan.
Chaynüpamari lluy licaliycuśha cala.
Yaꞌa Tayta Diosmi niyá.
“Mana nunatucullal wacchanu yaꞌaman
aśhuycücunäta, yaćhachicuynïta uyalil
manchacuywan cäcunätam ñawilläćhu yaꞌa caycachishä.
Yaꞌa Tayta Diosmari niyá.
3Ñatac munaśhanta lulacücunäta jinaman
ćhïnicuśhá millachicuyta cushisha lulay ćhapäcunäta manamá ćhasquiycuśhächu;
wäcacunacta wañulcachil uycamäśhanca, nunacta wañuchishannümari cayan.
Uwishcunacta uycamäśhanca, allꞌucta muꞌuśhannümá cayan.
Ćhacla micuycunacta uycamäśhanca,
cuchip yawarninta uycamäśhannümá cayan.
Insinsiucta cañaycuśhancäpis taytachaman alawaycälishannümá cayan.
4Chayurá yaꞌapis sumä ñacaycunactam uycuśhä.
Paycuna sumä manchaculcäśhantalämá uycuśhäpis.
Ayaptí manamari mayanllapis uyaliycamälachu.
Limapaptí manamari imallactapis niycamälachu.
Aśhwanpam puntäćhülä mana allincäta lulapäcula;
millachicuśhäcunätalämá aclaycälila canpis” nil.
5 Tayta Diospa yaćhachicuyninta manchacuywan
uyalicücuna pay nishanta uyalipäcuy:
“Amcunap wawꞌi-caśhayquicunamari;
yaꞌa-laycu ćhïnipäcuśhunqui, alupäcuśhunqui:
‘Má, Tayta Dios munayninta camalachicuchun;
chayćhüćha cushicuyniquita licaycuśhä’ nil.
Ñatac paycuna pinꞌayman ćhulaycuśhamá capäcunꞌa.
6¿Ima lüyaytamá malcaćhu uyaliyá?
¿Ima ayaycaćhaymá alawana wasićhu cacuyan?
Tayta Diospa limayninmari;
ćhïnicünincunactamá tincüninman mućhuycayächin.
7“Sionmi manaläpis timpunćhu waćhacülun;
manaläpis dulurnin chaläluptinmi walaśhta ishyacülun.
8Caynüta ¿mayanmá licala?
¿Mayanmá uyalila?
¿Juc muyunllaćhu nasyunca licalïlunmanchun?
¿Rätulla malcaca näsïlunmanchun?
Sionñatacmi ichá dulurnin allaycuyällaptinlä
chulincunacta ishyacülun.
9Ishyachïca yaꞌa cayalchun,
¿iñachaca näsimunanta manalcayächïman imamá?
Cawsayta uycüca yaꞌa cayalchun,
¿waćhacuyninta atajayäman imatá?
Yaꞌa Tayta Diosmari niyá.
10“Jerusalenta lluy cuyäcunaca,
paywan cusca cushiculcay.
Paypi lluy llaquicücunaca,
sumä-sumä cushiculcay.
11Jerusalenpïmari amcuna maćhaycunayquicama ñuñupäcunqui.
Paymi cunsuylapäcuśhunqui.
Maćhaycunayquicamam upyapäcunqui;
sumä cayninwanmi cushiculcanquipis.
12“Yaꞌa Tayta Diosmi niyá:
Mayuctanümi Jerusalenman jawca caycäta maśhtaycuśhä.
Llülla lïcätanümi nasyuncunäpa cänincunacta ćhaycachimuśhä.
Jerusalenmi amcunacta ñuñupäcuśhunqui;
malayllanćhümi apapäcuśhunqui;
millayllanćhümi cuyapäcuśhunquipis.
13Wawinta cunsuylacü mamanümi
yaꞌa cunsuylaycälishayqui;
Jerusalenćhümari cunsuylaycuśha capäcunqui” nil.
14Caycunacta amcuna licapäcul
śhunꞌuyquicuna cushiculcanꞌamá;
tulluyquicunapis ulanümari cutipacamunꞌa.
Tayta Diospa munaynin
sirbïnincunaćhümá camalachicun.
Ćhïnicünincunaćhüñatacmi ichá piñacuyninta camalachicun.
15 Tayta Diosmi walayä ninawannu śhayämun;
carritancunapis gïrrapänümi sumä-sumä śhayämun.
Piñacuynintamari sumä-sumä rabyäśha apayämun;
nina walayänümi camacaycülunꞌa.
16Jinantin pachäćhu cawsäcunätamari
ispädawan ninawan Tayta Dios cäraycunꞌa.
Tayta Diospa maquinwan
achca-achcamá wañupäcunꞌa.
17 Tayta Diosmi nin: “Wirtacunäćhu atinacuylla chuyanchacücunaca japächacücunaca, chaynütac cuchi aychacunacta, ucuśh aychacunacta, imaymana anla aychacunacta micücunäpis camacaycüśha canꞌa.
18“Yaꞌa tuquictamá yaćhá ima lulapäcuśhanta, pinsapäcuśhantapis. Chaymi lluy nasyuncunäta, imaymana limayta limäcunäta juntuycuná cayan; paycunamari śhapämul sumä caynïta licapäcunꞌa.
19Paycunawanmari sumäcunacta lulaycuśhä; waquin ayïcunätam caćhäśha cay nasyuncunäman: Tarsisman, Futman, flïchacunacta ćhächï cä Ludman, Tubalman, Javanman, jinaman calu lamar patanćhu cä calu-calu malcacunäćhu yaꞌapïta imallactapis mana uyalïcunäman, sumä caynïtapis mana licäcunäman. Paycunamari sumä caynïpïta nasyuncunäćhu willaculcanꞌa.
20Jinantin nasyuncunäćhu cä wawꞌi-caśhayquicunactam puśhaycamuśhä, alawaycuywan uycunanu yaꞌa Tayta Diosman śhapämunanpä. Jerusalenćhu cä chuya ulꞌümanmi śhapämunꞌa cawallucunawan, carritacunawan, chacanacunawan, mulacunawan, camïllucunawanpis. Maynümi israelcunaca alawana wasïman uycunancunacta apapämun, chaynülämi chuya sirbichicuncunacta apacuśha śhapämun. Yaꞌa Tayta Diosmari niyá.
21Paycunapïmi waquincunacta sasirdütïcunapä, levitacunapä aclaycuśhä. Yaꞌa Tayta Diosmari niyá.
22“Awari, maynümi muśhü sïlu,
muśhü allpa
23Lluy nunacunaca llullu quillan-quillanmi,
jamana muyun-muyunmi alawaycüní puntäman śhapämunꞌa.
Yaꞌa Tayta Diosmari niyá.
24Yalapämulmi yaꞌap cuntrá wañüśha cäcunäta licapäcunꞌa.
Micü culucunaca manamá imaypis wañupäcunꞌachu;
nina walaśhancäpis manamá imaypis wañucälinꞌachu.
Jinantin nunacunäpä maynu
sumä millachicuymá chay canꞌa” nil.
Who We AreWhat We EelieveWhat We Do
2025 by iamachristian.org,Inc All rights reserved.
