Deuteronomio 14 - Old Testament Quechua Wanca（QVW）

1“Tayta Diospa chulinmi amcuna capäcunqui. Chaymi wañüśha nunapi aychayquicunaćhu ama cuchucunquichu, ächayquitapis ama siplay-siplayta lutucunquichu.Mayannin micunapä anla ütac chuya uywacuna caśhantam nin Lev 11.1-47

3“Imapis anlapä licaśha cäcäta amam micapäcunquichu.

4“Cay uywacunam cayan micapäcunayquipä: Wäca, uwish, capish,

5luychu, taruca, wälayu munti uywacuna, imaymana munti capishcuna, munti uwishcuna, imaymana antilope nishan uywacunapis.

6Chaynütac shillun ishcayman partïsha cutichicü uywacunactapis micapäcunquimanmi.

7Ñatac shillun ishcayman partïsha captinpis mana cutichicücäta amam micapäcunquichu: camïllucta, biscachacta, cunishtapis. Chaycunacta anla uywapämi licapäcunqui.

8Chaynütacmi cuchipis masqui shillun ishcayman partïsha captinpis mana cutichicu caśhanpam anlapä licaśha canꞌa. Chaymi wañüśhacta mana yataycunquimanchu ni micunquimanpischu.

9“Chaynütacmi lamarcäćhu, mayućhu cawsäcunäpïta micapäcunqui laplayücunätawan ispuylaśhniyücunäta.

10Ñatac mana laplayücunätawan mana ispuylaśhniyücunätam ichá millachicuy anlapä licaśha captin ama micapäcunquichu.

11“Chuyapa licaśha lluy pälïcunätá micapäcunquimanmi.

12Ñatac pälïcunäćhu anlapä licapäcul caycunactam ama micapäcunquichu: äćhicta, wamanta, lamarćhu cä ancacta,

13wamanta, lluy lichcä quillinta,

14jinaman imaymana wisculcunacta,

15abistruscäta, tucuniläcäta, iwllacta, imaymana licchä ancacunactapis.

16Jinaman tucucta, ibis nishanta, calamon nishanta,

17pelicano nishanta, wisculta, somormuju nishanta,

18cigüeñacunacta, imaymana licchä garsacunacta, abubilla nishancunacta, maśhucunactapis amamari micapäcunquichu.

19“Chaynütacmi pälï laplayu pulï culucunactapis anlapä licapäcul ama micapäcunquichu.

20Ñatac laplayu cayalpis chuyapa licaśhacunätam ichá micapäcunquiman.

21“Ima uywactapis quiquillanpi wañüśhactá amamari micapäcunquichu. Amcunaćhu yaćhä juc caśhtacunätam ichá uycapäcunquiman micapäcunanpä ütac juccunaman lanticulcänanpäpis. Amcuná Tayta Diosniquipä japächäśhan malcanmari capäcunqui.

“Amatacmi uña capischacta mamanpa lichinćhuꞌa yanupäcunquichu.Ćhuncapïta jucta-cama japächapäcunanpämi nin

22“Cusichayquicunapi watan-watanmi ćhuncapïta jucta-cama Tayta Diospä japächapäcunqui.Lev 27.30-33; Num 18.21; Mal 3.8-10.

23Chay trïguyquipi, bïnuyquipi, asaytiquipi, ćhuncapïta-cama wäcayquip japächaśhayquitawan, uwishniquip wamä wawintapis Tayta Diosniqui yaćhananpä aclaycuśhancäćhümi lluy micapäcunqui. Chaynüpam Tayta Diosniquita imaypis manchacuywan cäsucuyta yaćhapäcunqui.

24Tayta Diosniqui allinpä licaycuśhuptiqui chay japächaśhayquita Tayta Diosniqui aclaśhan sityu caśhanman apanayquipä calu captinꞌa,

25lanticülunquiñam. Jinalculmi illaycällactaña Tayta Diosniqui caśhanman apapäcunqui.

26Chay illay apapäcuśhayquiwan munaśhayquitañam lantipäcunqui: wäcacta, uwishta, bïnucta, puꞌuśha aswacta, ütac ima munaśhayquitapis. Chaycunacta Tayta Diosniqui caśhancäćhu micapäculmi lluy aylluyquiwan fistachaculcanqui.

27“Malcayquićhu yaćhä Levi ayllucunäta amam unꞌapäcunquichu. Paycunactá manamá amcunactanüchu ima allpallapis tücapäcula.

28“Lluy cusichayquicunapïta quimsa watapi-camam ćhuncapïta jucta-cama japächalcul malcayquićhu pilwapäcunqui.

29Chayćha chaycunapïta mana ima tücaniyu Levi ayllucunäpis, juc caśhta yaćhäcunäpis, wacchacunäpis, japanyäśhacunäpis maćhaycälinancama micapäcunꞌa. Chaynüpam Tayta Diosniqui ima lulayniquićhüpis allinpä licaycälishunqui.