1Chaypi Filisteo läducunämi lluy pilyänincunawan Afec malcaćhu juntunacälälin. Israel caśhtacunäñatacmi Jezreel lädu pucyup patanćhu jamapäcula.
2Filisteo pilyäcunaca paćhacninpa (100), walanganpam (1,000) lipäcula. Paycunap ipantamari David lluy nunancunawan lipäcula, mandacü Aquiswan cusca.
3Chayćhümi mandacü Aquista Filisteo läducunäpa puydïnincuna nipäcun: “¿Cay Israel caśhtacunaca imactatan cayćhu lulayalcan?” nil.
Niptinmi Aquis nin: “Payꞌa Israelpa mandacünin Saulpa yanapänin Davidmari. Payꞌa unayñam yaꞌawan yaćhan. Payćhuꞌa ćhämuśhan muyunpïtam ima mana allinllactapis canancama nï talilächu” nil.
4Niptinmi Filisteo läducunäpä puydïnincuna piñacälälil mandacü Aquista nicuyalcan: “Uśhayqui allpaman cuticunanpä niycüluy. Yaꞌanchicwan pilyuman manam linmanchu. Yanꞌalmi pilyayaptinchic cuntranchicman muyuculcunman. Payꞌa mandacüninwan allinpä licachicunan-laycu cay pilyäninchiccunap umanta apaculculmi pasacunman.
5Cay Davidpïta manachunꞌari walmicunäpis paćhcaśhtin taquipäcula:
“ ‘Walanga (1,000) pilyätam Saul wañüchila;
Davidñatacmi ćhunca walangacta (10,000)’ nil imamá” nil.
6Nipäcuptinmi Davidta ayalcamul Aquis nin: “Tayta Diospis yaćhanmi allin nuna caśhayquita. Jamaśhanchicćhu imanuy cawsaycuśhayquipis śhunꞌüpänümi cala. Ćhämuśhayqui muyunpïtam ima mana allinllactapis amćhu nï taliyculächu. Ñatac puydïcunäpämi ichá mana śhunꞌunpänüchu caycunqui.
7Chayurá jawcalla wasiquita cuticuy puydï Filisteo läducunäta mana piñachinayquipä” nil.
8Niptinmi David nin: “¿Imactatan yaꞌa lulällá? Cay nunallayquićhu ¿ima mana allinllactamá ćhämuśhäpïta canancama taliycamälanqui? Mandacünïpa ćhïnicünincunawan pilyanäpä ¿imapïmá mana munapäcamanchu?” nil.
9Niptinmi Aquis nin: “Yaꞌa yaćhämi Tayta Diospa nunannu am allin caśhayquita. Ñatac puydïcunämi nipämäla: ‘Yaꞌanchicwan pilyuman manam linmanchu’ nil.
10Chayurá wala-wälalla puśhamuśhayqui nunayquicunawan śhalcuculculmi am cuticulcanqui” nil.
11Chaymi David nunancunawan wälalla śhalcacalcälil Filisteo läducunäpa malcanman cuticulcäla. Filisteo läducunäñatacmi Jezreel malcaman lipäcula.
Who We AreWhat We EelieveWhat We Do
2025 by iamachristian.org,Inc All rights reserved.
