Exodo 35 - Old Testament Quechua Wanca（QVW）

Jamana muyunćhu lulapäcunanpämi nin Exo 31.12-17

1Chaypïtam Moises jinantin Israel caśhtacta juntuycul nin: “Amcuna lulapäcunayquipämi Tayta Dios camachimäla caycunacta:

2Süta muyunmi imacta lulanayquipäpis cayan. Anćhish muyuncäñatacmi Tayta Diosllapä japächäśha jamana chuya muyun cayan. Mayanpis chay muyunćhu luläcá wañuchisham canꞌa.Exo 20.8-11; 23.12; 31.15; 34.21; Lev 23.3; Deut 5.12-14.

3Mayćhu cayalcalpis chay muyun manam ninallactapis latalcälichinquimanchu” nil.

Chuya carpapä apapämunanpämi nin Exo 25.1-9

4Chaypïtam Moises jinantin Israel caśhtacunäta nin: “Amcuna lulapäcunayquipämi Tayta Dios camachimäla caycunacta:

5Ima cäniquicunapïpis Tayta Diosta uycälinayquipä apapämuy. Śhunꞌuyquipi yalücunätari apapämuy: ürucunacta, illaycunacta, brunsicunacta.

6Tïlacunaćhuꞌa apapämuy: asulcunacta, muräducunacta, pucacunacta, fïnu lïnucunacta, capishpa pïluncunacta,

7ulu uwishpa utan pucawan tiñïshacta, fïnunnin utacunacta, acacia ilucunacta,

8michïrucunap asaytincunacta, japächaycunapä asaytip tuqui aśhnachicuncunactapis, jinaman tuqui aśhnä insinsiupä tuqui aśhnachicuncunactapis.

9Chaynütac apapämuy: onice lumicta, juc fïnunnin lumicunacta puydï sasirdüticunap chalicunman, pichïrunman chalachinapä.

Chuya carpap cänincunacta lulapäcunanpämi nin Exo 39.32-43

10“Ñatac yaćhayniyu nunacunämi śhapämunqui Tayta Dios nishanta lulaycälinayquipä:

11Chuya carpacta lluy cänintinta: atacunta, argüllancunacta, lluy paradïruncunacta, apanancunacta, simintuncunacta,

12babulta bärancunacta, täpanta, cuartucta ishcayman laquï curtïnacta,

13mïsacta bärancunactawan, lluy cänincunactawan, chaynütac Tayta Diospä japächaycuśha tantactapis lulaycunquimari.

14Chaynütacmi lulaycälinqui jatun michïructa lluy cänintinta, michïruchancunacta, latananpä asayticta,

15insinsiucta cañaycuna patacta, bärancunacta, japächaycunapä cä asayticta, tuqui aśhnä insinsiucta, chaynütac chuya cuartup yaycunanćhu cä curtïnacta,

16cañaywan uycuna patacta, brunsipïta mällactanu cäninta, bärancunacta, lluy ima cänincunacta, maqui paꞌacunacta täcunanpä cänintintapis.

17Chaynütacmi lulapäcunqui chuya carpap patyunpa curtïnancunacta, paradïruncunacta, simintuncunacta, chay patyup puncunpä curtïnanta,

18chuya carpap ishtacancunacta, patyup muyülïninpä lluy ishtacacunacta, watacuncunactapis.

19Chaynütacmi lulapäcunqui chuya cuartućhu sirbinanpä müdanancunacta, sasirdüti Aaronpä sirbinan müdanancunacta, jinaman chulincunap sasirdüti müdanancunactapis” nil.

Israel caśhtacunaca śhunꞌunpi yalamuśhantam apapämun

20Chaynu Moises niycuptinñam jinantin Israel caśhtacunaca liculcäla.

21Chaypïtam lluy sintïcunaca, llapan śhunꞌunwan apapämula Tayta Diosta uycälinanpä. Chaycunawan chuya carpacta lluy ima cänintapis lulaycälinanpä, jinaman sasirdütip müdanancunacta lulaycälinanpäpis apapämulamá.

22Walmipis wayapapis allin śhunꞌuyücunacá apapämulam: ćhipacuncunacta, arïtincunacta, anilluncunacta, ürupïta imaymana aläjancunactapis. Chaynu üruncunactamari altuman pallalcul Tayta Diosman uycälila.

23Chaynütacmi tïlacunaćhuꞌa apapämula: asulcunacta, muräducunacta, pucacunacta, fïnu lïnucunacta, capishpa pïluncunacta, ulu uwishpa utan pucawan tiñïshacta, fïnunnin utacunactapis.

24Chaynütacmi illayniyücäpis ütac brunsiyücäpis Tayta Diosman uycälila. Acacia iluyücunäpis uycälilatacmi lluy lulaycälinanpä.

25Chaynütacmi alli-camacta burdä walmicunäpis burdalcälil apapämula asul awäśhacunacta, murädupi awäśhacunacta, fïnunnin lïnupi puca awäśhacunactapis.

26Jinaman sintï walmicunäpis capishpa pïlunpïta yaćhaywan sumä-camactamari pishapäcula.

27Israelpa puydïnincunañatacmi apapämula onice lumicunacta, fïnunnin lumicunacta pichïrućhu chalicućhu ćhuläśha cananpä,

28jinaman tuqui aśhnä pirfümicunacta, acchinapä cä asayticunacta, japächanapä cä asayticta, tuqui aśhnä insinsiucunactapis apapämula.

29Chaynu Tayta Dios Moisesta nishancäta lulaycälinanpämi jinantin Israel caśhtaca walmipis wayapapis apaycälimula śhunꞌunćhu sintishancäta.

Sumä aläjacunacta lulananpämi nin Exo 31.1-11

30Chaypïtam Israel caśhtacunäta Moises nin: “Sumäta uyalipämay, Tayta Diosmi Bezaleelta aclaycun, Juda ayllupi Urip chulinta, Hurpa willcanta.

31Paymanmi quiquin Tayta Dios juntaycachin yaćhayninta, umacta, tantiayta, imactapis yaćhaywan sumäta lulaycunanpä.

32Chaymi imaymana sumä aläjacunacta ishpiycachinꞌa illaycunapi, ürucunapi, brunsicunapïpis.

33Chaynütacmi lumicunapi labraycul aläjacunacta chalachinanpäpis lulaycunꞌa. Jinaman ilucunaćhüpis, ütac imapïpis imaymana aläjacunactam alli-camacta lulaycunꞌa.

34Yaćhaycachinanpäpis umacta uyculam paytawan Dan ayllu Ahisamacpa chulin Aholiabtapis.

35Paycunamanmi umacta uycun imaymana lichcä lulaycunacta lulaycälinanpä: asulcunaćhu, muräducunaćhu, pucacunaćhu, fïnunnin lïnucunaćhüpis. Jinaman burdaycunacta, labraycunacta lulaycälinanpäpis umacta uyculamari.