Levitico 6 - Old Testament Quechua Wanca（QVW）

1Chaypïtam Moisesta Tayta Diosmi nin:

2“Mayanpis mana allinta lulälul yaꞌa Tayta Diostam ipanchayäman: nuna-masinta ingañäca, ütac licananpä caćhaycuptin pacäca, waycäca, suwäca,

3imactapis talicuśhanta awniyal nïgäca, ütac imaćhüpis rasun caśhanta limalicuyal articücá mana allintamari lulayan.

4Chay mana allinta lulaśhanpi juchacuyalꞌa caśhanmi cutiycachinan: suwacuśhanta, quitacuśhanta, licaycunanpä caćhaycuśhanta, imactapis taliculcul nïgaśhanta,

5ütac yanꞌal imapïpis limalicuśhanta cutiycachinanmari. Lluytam chay nunaman cutiycachinan, jinaman mana allin lulaśhanpi uycunan muyuncäćhu ćhuncapi picha parti ćhanintalämi uycunanpis.

6Chay juchan chuyanchaycuśha cananpä Tayta Diosman allinnin ulu uwishnintamari uycunꞌa. Chay uwishpa ćhanin canꞌa carpaćhu juchacunapä mïdinapä cäcämannümari.

7Chay apamuśhanta sasirdütica Tayta Diosman uycuptinmari ima juchan cacuptinpis chuyanchaycuśha canꞌa” nil.Imanuypa cañaycälinanpämi nin

8Chaypïtam Moisesta Tayta Dios nin:

9“Canan Aarontawan lluy chulincunacta imanuypa cañaywan uycälimänanpäpis niycuy: Chay cañaywan uycuśhayqui uywacta uycuna patacćhu nina waläcämanmi wälacama ćhulaycälinqui camacänancama.

10Sasirdütiñatac lïnupi müdananta, lïnupi calsunsillunta ćhulaculcunꞌa. Jinalcul uycuna patacćhu uywa cañaycuśhanca camacäluptin ućhpanta jululcul uycuna patacpa läduman ćhulaycunꞌa.

11Chaypïta juc müdananwan müdaculculmi carpapïta ućhpacta julunꞌa unanchaśha Chuya Sityuman.

12“Ñatac uycuna patacćhu ninaca imaypis walayächun; ama wañuycuchunchu. Chaynu cananpä walan-walanmi wälalla sasirdütica yamtacta ćhulaycunꞌa. Yamtap janäninmanñatacmi cañaycunapä cä uywacta ćhulaycunꞌa; chaynütacmi allin cawsaśhanpi cä wilacunätapis ćhulaycunꞌa.

13Chay uycuna patacćhu cä ninaca imaypis walaycunꞌam; manamari wañüśhä canmanchu.

Ćhacla micuyta uycälinanpämi nin

14“Cananꞌa caynümi lulaycunꞌa ćhacla micuyta Tayta Diosman uyculꞌa. Chay micuycunäta Aaronpa chulincunam uycuna pataccäćhu Tayta Diosman uycapäcunꞌa.

15Jucninñatacmi chay ćhacla micuy uśhancäpi apti fïnu arinacta, asayticta, jinaman uycunanpä cä lluy insinsiuctapis laquiycunꞌa. Chaytam uycuna patacćhu cañaycunꞌa yalpana uycuy cananpä. Chaymi Tayta Diosman tuqui mishqui aśhnä ćhaycunꞌa

16Chay parti puchücätañatacmi Aaron lluy chulintin micapäcunꞌa. Chaynu micapäcunꞌa libadürannäta japächäśha sityućhümi; tincunapä carpap patyunćhümari.

17Chay particta cañaywan uycamäśhancunapïtá amatacmi libadürawanꞌa yanupäcunquichu. Cañaywan uycamäśhancunapïta caytamari amcunapä uycälic. Chay sumä chuyam cayan, mana allin lulaśhanpi uycuyca, juchanpi uycälimäśhannümá cayan.

18Chayurá cay ćhacla micuy uycunapïta micapäcunman Aaronpa lluy walaśh chulincunallam. Caynu Tayta Diosta cañaywan uycuy camachicuyca lluy milaynincunapämari wiñaypä canꞌa. Chay uycuśhanman imapis tupaycücá chuyamanmi muyunꞌa” nil.

Sasirdüticunaca uycälinanpämi nin

19Chaypïtam Moisesta Tayta Dios nin:

20“Aaronwan lluy chulincunapis sasirdütipa japächäśha cananpä llusishanćhu caytam uycälinan: ćhacla micuy uycunapi Tayta Diosta uycuchun ishcay quïlu fïnunnin arinacta. Particta wälanpam uycunꞌa, juc partictañatac tardinpa uycunꞌa. Chaynu ćhacla micuyta walan-walanmi uycälinꞌa.

21Chay uycuśhantam asaytiwan casitućhu sumäta chapuycunꞌa. Jinalculmi achcaman partïshacta Tayta Diosman uycunꞌa tuqui mishqui aśhnä ćhaycunanpä.

22Chaynu lulaycunꞌa Aaronpa pudirnin chulin yaycü puydï sasirdütipa japächaycuśhancämi. Chayurá caymi Tayta Diospa wiña-wiñay camachishanca: chay uycuśhancäta lluy-lluymari cañaycunqui.

23Sasirdüticunaca Tayta Diosman uycapäcuśhancunäta lluymi cañaycuśha canꞌa. Chaytá manamari micapäcunanchu” nil.

Juchancunapïta uycunanpämi nin

24Chaypïtam Moisesta Tayta Dios nin:

25“Aarontawan lluy chulintinta caycunactam niycunqui: Juchan chuyanchaycuśha cananpä caynümi canꞌa: cañaywan uycunapä cä uywam Tayta Diospa puntanćhu, wañuchinapä cä sityućhu muꞌuśham canꞌa. Chay sumä chuya lulaycuymari cayan.

26Chay uycuśhan uywacta tincuna carpaćhümi sasirdüti uycüca micunꞌa; tincunanchicpä cä carpap japächäśha patyunćhümari micunꞌa.

27Imamanpis chay aychaca tupaycuptinꞌa chay tupaycuśhanca chuyamanñam licalinꞌa. Yawarnin ima müdanamanpis paćhcäluptinmi ichá chay müdanacta japächäśha sityućhu täśhanꞌa.

28Chay uycuśhan aychacta allpa mancaćhu yanuśhanta paquïluy. Ñatac brunsi mancawan yanulꞌa jićhcaywan tuquicta paꞌaluy.

29“Chay uycuśhanca sumä chuyam. Chaymi sasirdüticunäpä aylluncunaćhu umricunälla micapäcunan.

30Ñatac juchan chuyanchaśha cananpä uycuśhan uywap yawarnin tincunapä carpaman apaycuśha captinꞌa, aychanta amam micapäcunꞌachu. Aśhwanpa lluymari cañaycälälinꞌa.