1Siria malcap mandacünin Ben-adadmi lluy pilyänincunacta juntülun. Jinaman quimsa ćhunca ishcayniyu (32) mandacücunäpis carritancunawanmi, cawalluncunawanmi liwshipäcula. Chaynu juntuyculmi Samaria malcacta camacaycünanpä cunćhacuycula.
2Juc willacücunactam caćhälunpis israelcunap mandacünin Acabta caynu ninanpä: “Ben-adadmi caynu nin:
3‘Illayniquipis üruyquipis, walmiquicunapis, tuqui-cama chuliquicunapis yaꞌapäñam cayan’ ” nil.
4Niptinmi Israelpa mandacünin nin: “Tayta mandacüní, am nishayquinümi yaꞌapis lluy ima cänïcunapis ampäña cayan” nil.
5Chaypïta caćhaśhancunaca Acabman yapa lipäculmi nin: “Ben-adad caynümi nin: ‘Willachilacñam illayniquita, üruyquita, walmiquicunacta, chuliquicunacta umänayquipäpis.
6Wala muyunmi cay üranu nunäcunacta caćhamuśhä palasyuyquićhu, yanapäniquicunap wasincunaćhu ima ćhaniyu cänincunactapis apacalcämunanpä’ ” nil.
7Niptinmi Israelpa mandacünin jinantin nasyunpa puydï yaśhancunacta ayalcachimul nin: “Amcuna yaćhapäcuśhayquinüpis chay nunaca mana allinninchictam ashiyan; illaynïta, üruta, walmïcunacta, chulïcunacta uycunäpä willachimaptinpis apacunanpä awnilämari” nil.
8Niptinmi jinantin malcäpis, puydï yaśhacunäpis nicuyalcan: “Amaña uyalïtucuychu; nïtac mañaśhuśhayquitapis awniyayñachu” nil.
9Nipäcuptinmi Ben-adadpa caćhamuśhan willacünincunacta Acab nin: “Tayta mandacücäta nimuy: ‘Punta mañachimäśhantá lluymi uycuśhä. Cay ipa mañamäśhantam ichá mana uśhächu’ ” nil.
Niptinmi willacücunaca cuticul willaycälimula.
10Chaymi Ben-adad caśhanñatac Acabman willacachimula: “Samariacta camacaśhäćhu apti ućhpallactapis nunäcuna apaculcänanpä manamá quïdanꞌachu. Quïdaptinꞌa taytachacuna sumä-sumä mućhuchimächun” nil.
11Nipäcuptinmi chay willacücunäta Acab nin: “Manalä pilyalꞌa, manalä llallilꞌa amalä alawacuchunchu” nil.
12Ñatac Ben-adad juc mandacücunäwanmi carpanćhu-cama upyayalcäla. Chaymi chay willacuyta uyalïlul yanapänincunacta nin: “Pilyanapä allichaculcay” nil. Niptinmi malcacta camacaycälälinanpä allichaculcäla.
13Jinapäcuśhancamañatacmi Israelpa mandacünin Acabman juc willacü ćhaycamul nin: “Tayta Diosmi caynu nin: ‘Licaśhayquinüpis ćhïnicüniquicuna achca-achca cayaptinpis, yaꞌami maquiquiman canan ćhulaycamuśhä. Chaymá Tayta Dios caśhäta yaćhanqui’ ” nil.
14Niptinmi Acab: “¿Mayanwanmi llallichimanqui?” nin.
Niptinmi Tayta Diospa willacünin nin: “Tayta Diosmi nin: ‘Malcacunaćhu puydïcunäta yanapänin müsucunawanmi llallichishä’ ” nil.
Niptinmi Acab: “¿Mayanmi pilyayta allaycunꞌa?” nin.
Niptinmi Tayta Diospa willacünin: “Am quiquiquimari allaycunqui” nin.
15Chaymi prubinsiaćhu yanapä müsucunäta Acab fintaptin ishcay paćhac quimsa ćhunca ishcayniyu (232) caña. Lluy israelcunäćhu fintaptinñatacmi anćhish walanga (7,000) caña.
16Paycunawanmi ćhawpi muyun Acab yalapäcula. Ben-adadñatacmi quimsa ćhunca ishcayniyu (32) yanapänin mandacücunäwan carpancunaćhu shinca upyayalcäla.
17Chaymi malcacunäćhu yanapä müsucunaca puntapäcula. Ñatac caćhaśhan nunancunam Ben-adadta willaycula: “Samariapïtam nunacuna śhacayalcämun” nil.
18Niptinmi Ben-adad nin: “Pilyananpä ütac jawca canapä limälla śhacamuptinpis cawsayäta chalapämuy” nil.
19Ñatac yanapä müsucunämi malcapïta puntacta yalapäcula, jina ipanmanñatacmi lluy Israel pilyäcunaca.
20Cuntran śhamücunäta-camam wañuchiyta allacaycälila. Chaymi Siriap pilyäcunaca ayiyta allacuycuptin israelcunaca aticulcäla. Ñatac Siriap mandacünin Ben-adadꞌa waquin sillädancunawanmi sillacuśha ayiculcan.
21Chaynu llallilculmi Israel mandacücäpis carritancunacta, cawalluncunacta chalacuycula. Chaynüpamari Sirio nunacunäta sumä camacaycüla.
22Chaypïtam Israelpa mandacüninman aśhuycul Tayta Diospa willacünin nin: “Cutilcul ama jawca cacuychu. Imanuypa lulanayquipäpis sumätari licaycuy. Wata śhamücäpa allaycuynintam Siriap mandacünin pilyä caśhan cutimunꞌa” nil.
23Ñatac puydï yanapänincunam Siriap mandacüninta nipäcun: “Israelcunäpa diosnincuna ulꞌucunäpa diosnincunallamá. Chaymari llallïmälanchic. Ñatac pampaćhu pilyalꞌa llallïshunmá.
24Chaymi caynu lulanqui: mandacücunäta wicapalculmi pudirninta ćhulanqui pilyäcunap puydïnincunacta.
25Jinaman pilyäniquicunactapis punta pilyäniquicuna caśhantanu juntuyculmi yaćhachishun. Chaynütacmi achca-achca cawallucuna, carritacuna caśhantanüpis juntuycuśhun. Chaycunawan pampanninćhu pilyalꞌa llallïshunmari” nil.
Niptinmi Bed-adad cäsucul chaynu nishanta lulala.
26Śhamü wataćhümi Ben-adad Siria pilyäcunäta juntuycul Afecman lipäcula israelcunäwan pilyä.
27Ñatac Acabpis israelcunäta juntuyculmi micunancunacta apaculcul pilyä lipäcula. Chaymi Siria pilyäcunap chimpanćhu jamapäcula. Israelcunaca ishcay canćha capishcunänüllam cayalcan; Sirio läducunäñatacmi jinantin pampa junta cacuyalcan.
28Chayćhümi Tayta Diospa willacünin licalilcamul israelcunap mandacüninta nin: “Tayta Diosmi caynüta nin: ‘Sirio nunacunämi yaꞌapi nipäcuña: “Ulꞌucunäpa Tayta Diosllanmi caña; pampacunäpá manamari cañächu” nil. Chaynu nipäcuśhanpïmi achca-achca cayalcätapis maquiquiman ćhulaycamuśhä. Chaynüpam Tayta Dios rasunpa caśhäta yaćhapäcunqui’ ” nil.
29Chaynu chimpa-chimpa Sirio läducunaca israelcunäwan anćhish muyunmi capäcula. Anćhish muyuncäćhüñatacmi pilyu allacuycun. Chay muyunllaćhümi israelcunaca wañülächila paćhac walanga (100,000) ćhaquillawan pilyä Sirio läducunäta.
30Juccunacá Afec malcamanmi ayiculcan. Ñatac ishcay ćhunca anćhishniyu walanga (27,000) ayï nunacunätam malcap murällan ñitïlun. Ben-adadpis malcaman ayiculmi cuartun-cuartun pacacula.
31Chayćhümi Ben-adadta yanapänincuna nin: “Israelcunäpa mandacünincuna llaquipayniyü-cama capäcuśhantam uyalipäculá. Chayurá shicacü müdanawan müdaculcul, watucunacta cuncanchicman wataculcul Israelpa mandacüninman lishun, ichaläpis pampachaycuśhunquiman” nil.
32Nilculmi yanapänincuna shicacücunawan müdaculcul, cuncanman watucunacta watacalcälil israelcunäpa mandacüninman śhapämula. Ćhayculmi nipäcun: “Nunallayqui Ben-adadmi nin: ‘Ama wañuchillämaychu’ ” nil.
Niptinmi mandacüca: “¿Cawsayanlächun? Payꞌa wawꞌi-caśhämi” nin.
33Chaynu nishanta allinpä licapäculmi juclla nicuyalcan: “Wawꞌi-caśhayqui Ben-adad cawsayanmi” nil.
Niptinmi Israelpa mandacünin: “Chayurá ¡wayra puśhapämuy!” nin.
Chaynu Ben-adadta puśhälälimuptinmi Acabñatac carritanman ishpichila.
34Chayćhümi Ben-adad nin: “Papäniquipïta papäní quitaśhuśhayqui malcacunäta cutiycachilläśhayquimá. Papäní Samariaćhu nigusyucunacta lulaśhannu ampis Damascoćhu läsacta lulacuycul nigusyacunquimanmi” nil.
Niptinmi Acab: “Cay limalicuyta awniptiquim ichá caćhaycuśhayqui” nin.
Chaynu limalinaculculmi Ben-adadta caćhaycula.
35Chaypïtam Tayta Diospa willacünin willacü-masinta Tayta Dios camachishanmannu nin: “Alli-allicta maꞌamay” nil.
Niptin pay manam maꞌayta munalachu.
36Willacücäñatacmi nin: “Tayta Diospa nishanta mana cäsucuśhayquipïmi caypi licuptiqui-pacha juc liyun wañüchishunqui” nil. Chay nishannüllam licuptin juc liyun licalilcamul wañüchila.
37Chaypïta willacüca juc nunawan tincülulmi nin: “Alli-allicta maꞌallämay” nil. Niptinmi chay nunaca alli-allicta maꞌala.
38Jinalcuptinmi caminuman yalula mandacücäta alcä. Mana lisinanpäñatacmi juc lataśhwan ñawinta śhucupaculcul alcala.
39Chayćhu mandacüca pasayaptinmi willacüca apalcaćhaypa nin: “Cay nunallayqui pilyućhümi cayälá. Chayćhümi prïsu nunacta puśhalcamul jucnin pilyä niman: ‘Cay nunactam täpanqui. Ayicuptinꞌa pudirninmi wañunqui; ütac quimsa walanga illaytam päganqui’ nil.
40Ñatac cay nunallayqui wicta-cayta lulaycaćhaśhäcamam täpäśhá nunaca ayicuña” nil.
Niptinmi Israelpa mandacünin nin: “Quiquillayquim imanuy mućhuchisha canayquipäpis nïlunqui” nil.
41Niyällaptinmi ñawin śhucupacuśhanta willacüca julucülun. Chaymi willacüca caśhanta Israelpa mandacünin lisïlun.
42Chayćhümi willacüca nin: “Tayta Diosmi caynu nin: ‘Wañuchisha cananpä nunacta ayicunanpä caćhaycuśhayquipïmi pudirnin am wañunqui. Malcayquipis malcanpa pudirninmi wañunꞌa’ ” nil.
43Niptinmi Israelpa mandacünin llaquisha, piñäśha Samariaćhu cä palasyunman licula.
Who We AreWhat We EelieveWhat We Do
2025 by iamachristian.org,Inc All rights reserved.
