Isaias 38 - Old Testament Quechua Wanca（QVW）

Ezequiasmi ishyälun 2Rey 20.1-11; 2Cro 32.24-26

1Chay muyuncunaćhümi mandacü Ezequias ishyälul pasaypiña cayäla. Chaymi Amozpa chulin willacü Isaias watucuycü lil nin: “Tayta Diosmi caynu nin: ‘Manañam allinyanquimanñachu; aylluyquicunacta incaracuyña, tistamintucuyña; wañucunquiñamá’ ” nil.

2Niptinmi Ezequias pila läduman muyuculcul Tayta Diosta mañacula.

3Llaqui-llaquicta waꞌaśhtinmari nin: “Tayta Diosllay, rasunniquimannu, munaśhayquimannu llapan śhunꞌüwan ñawpäniquićhu imaypis cawsaycuśhäta yalpalcullayꞌari” nil.

4Chaypïtam Isaiasta Tayta Dios nin:

5“Ezequiasman lil caynüta nimuy: ‘Awquilluyqui Davidpa Tayta Diosnin yaꞌami cayá. Mañacuyniquita uyaliycümi; waꞌacuyniquitapis licaycümi. Chaymi ćhunca pichayu (15) wata mastalä cawsaycunayquipä niycuc.

6Amtapis malcactapis Asiriap mandacüninpa maquinpïta yaꞌami libraycuśhayqui. Cay malcacta ñawilläćhümá caycachishä.

7Caynu nishäca lulaycuśha cananpa tantiapäcunayquipä caycunam pasanꞌa:

8Intïpa llantuyninwan grädasninćhu Acaz tantiaśhancätam ipaman ćhunca grädasta cutichishä’ ” nil. Chay nishannüllamari intïpa llantuynin ćhunca gradas ipaman rasunpa cutila.

9Judapa mandacünin Ezequias ishyaśhanpi allinyälulmi cay taquicta isquirbila:

10“Yaꞌami niculá: ‘¿Allin callpayüllalä

cayalchun sipultüraman jiꞌacalpuśhä imamá?

¿Cay camallañachun cayćhu cawsaycuśhä imamá?’ nil.

11Cay allpäćhu Tayta Diosta

manañaćhá imaypis licaśhächu;

cay allpäćhu cawsäcunäta, mayantapis

manañaćhá licaśhächu.

12Cawsaynïta apacunmá;

uwish michïpa chucllantanümá cawsaynïta quitäman.

Awäca aytuśhancänümá cawsaynïta

cuchulcul juclla juläman.

Juc tutallapämá cawsayní camacälun.

13Achicalcunancamamari walächi alcaycullalá.

Ñatac liyunnümi lluy tullücunactapis pay camacaycäman.

Juc muyunllaćhümá unꞌaypi camacaycäman.

14Liwlishcänümá waꞌacullá; ulpaycänümá llaquipä waꞌacullá;

ñawïpis aspanancamamá sïlüta licapayällá.

Tayta Diosllay, ñacayćhümi cayällá;

yanapaycallämayñari.

15“Ñatac ¿cay ishyaycäta pay quiquin

uycayämaptinꞌa imactañamá yaꞌa nïman?

Śhunꞌüćhu llaquicuy caśhan-laycumá cayćhu cawsaśhäcama,

mana nunatucullal walan-walan cawsayculläśhä.

16Tayta Diosllay, lawćhaycuyniqui allinmá;

allincäman, cawsaycämanmari ćhaycachin.

Anmá allinyaycachimanqui;

anmá cawsaycäman cutiycachimanqui.

17Awari, cay llaquicuynïmá

yaꞌapa allin caycula.

Sipultürapïtamari libraycamanqui;

lluy juchäcunactamari

pampachaycamanqui.

18Wañüśhacunaca manañamá alawapäcuśhunquiñachu;

wañuyca manañamá altuman juluycuśhunquiñachu;

sipultüraman jiꞌalpücunäpis manañamá

limalicuśhayquiman alcaycälinꞌañachu.

19Canan yaꞌa alawaycuśhänüpis

cawsäcunällamá alawaycälishunquiman.

Chalapacuna caśhayquipïta taytacunämari

chulincunacta willapapäcunꞌa.

20Awari, ¡Tayta Diosmi salbaycaman!

Chaymi cawsaśhanchiccama Tayta Diospa

alawana wasinćhu imaypis arpacunacta

tucaśhtin alawaycuśhun” nil.

21Má, Ezequiaspa sirbïnincunactamari Isaias puntacta nila: “Ïgusta aꞌalcul Ezequiaspa dañädunman ćhulaycuy. Chayćha allinyälunꞌa” nil.

22Ezequiasñatacmi tapula: “¿Imanuypatan Tayta Diospa alawana wasinman linäpä tantiaśhä?” nil.