Proverbios 4 - Old Testament Quechua Wanca（QVW）

Allincäćhu caycuy sumä allinmi

1Iju, taytayquip limapäcuynincunacta uyaliculcay;

allin tantiayniyu canayquipä sumäta ćhasquiculcay.

2Allin yaćhachicuytamá yaꞌa yaćhaycälichic;

chayurá limapäśhäta ama caćhaycapäcuychu.

3Yaꞌapis papänïwan ishpïmi calá;

mamäpa japallan cuyayninmi calá.

4Papänïmi limapämäla: “Limapäśhäcäta

śhunꞌuyquiman ćhulaycuy;

lluy yaćhachishacta uyalicuptiquiꞌa bïdayqui canꞌamá.

5Yaćhayta ashiycuy, tantiayta ashiycuy;

limapäśhacta ama unꞌaycuychu nï caćhaycuychu.

6Yaćhachicuycäta mana caćhaycuptiquiꞌa licaycuśhunquimá;

yaćhachicuycäta cuyaptiquiꞌa ñawillanćhümá caycachishunqui.

7Lluy ima puydïpïpis, ¡yaćhaycäta ashiycuy!

Ima cäniquicunapïtapis, ¡tantiaycäta ashiycuy!

8Yaćhaycäta cuyaptiquiꞌa altumanmi juluycuśhunqui;

yaćhaycäta śhunꞌuyquiman ćhulaycuptiquiꞌa altunninmanmi ćhulaycuśhunqui.

9Chaymi sumä adurnäśhanu caycunqui;

tuquish-tuquish curunawannu altuman juluycuśha caycunqui” nil.

10Iju, limapäśhäcäta uyalimay;

nishäcäta ćhasquicamaptiquiꞌa achca watamá cawsaycunqui.

11Yaꞌami yaćhaycäpa caminunpa caminaycuśhayqui;

allin caminunpam puśhaycuśhayqui.

12Pulilpis manamá mitcacacunquichu;

wayra-wayra lilpis manamá chapicacunquichu.

13Limapäśhäman sumäta chalapacuy, ama caćhaycuychu;

śhunꞌuyquiman ćhulaycuptiquiꞌa cawsaytamá uycuśhunqui.

14Mana allin nunacunap caminunman ama jaluycuychu;

juyucunäpa puliyninćhu ama puliycuychu.

15Chay caminunman uchucllapis ama jaluycuychu; aśhucuy.

Chaycunapi aśhulcul juc lädunpa pasacuy.

16Paycuna mana allin lulayninta lulaycälinancamamá puñuytapis mana taliycälinchu;

mayantapis palpachinancamamá imchiycuytapis nï taliycälinchu.

17Mana allin lulaycämá mirindan;

juyu lulaycunämá upyanan.

18Allin nunäpa puliyninñatacmi ichá achicyaśhan muyuncäpa chipyayninnu;

masta-masta chipyayan muyunca sumä chipyalpunancamamá.

19Mana allin nunäpa puliyninñatacmi tutawyaycänu;

imawan mitcaculcäśhantapis manamá yaćhapäcunchu.

20Iju, limapäśhäcunacta ćhasquicamay;

nishäcunacta uyalicamay.

21Chayćhu ñawiqui caycuchun;

chayta śhunꞌuyquiman ćhulaycuy.

22Chayta talïcäpá cawsaymi,

aychanpäpis jampimá.

23Lluy ima licacuycuśhayquipïtapis śhunꞌuyquita masta licacuycuy;

chaypïmá cawsayca yalamun.

24Mana allin limaycunacta shimiquipi wicapay;

articuycuna shimiquićhu ama cachunchu.

25Ñawiqui allincällacta licachun;

ñawpä śhamücällaman ñawiqui quićhacacuchun.

26Maypa pulishayquitapis sumäta licacuycuy;

lluy caminuyquicuna allin caycuchun.

27Cay läduman nï wic lädumanpis amari aśhulcuychu;

mana allincäman amari jaluycuychu.