1Tayta Diosmi nin:
“¡Jerusalen śhalcuculcul acchiy!
¡Acchiqui ćhämunñamá!
¡Tayta Diospa sumä cayninmi amćhu chipipicyayan!
2Tutapayllam lluy allpäta ñitilayan;
yanawyayllam nasyuncunäta ñitilayan.
Ñatac Tayta Diospa sumä acchinmi amcunaćhu chipipicyanꞌa;
sumä cayninmi amcunaćhu camalaycunꞌa.
3Acchiquim nasyuncunäta caminaycunꞌa.
Mandacücunäpis acchiquip chipipicyayninwanmi puśhaycuśha canꞌa.
4“Jerusalen, ñawiquita sumäta licaćhacul
muyülïniquicunacta licaćhacuy.
Anmanmari lluy-lluy śhacayalcämun.
Calu-calucunapïlämi chuliquicuna śhacayalcämun.
Wamla chuliquicunactapis malayllanćhümi apayalcämun.
5Lamarcäćhu cä ćhaniyücunätamá apayalcämun;
nasyuncunäpa cänincunactamá ćhächipämuśhunqui.
Chayta licaptiquimá ñawiquipis acchinꞌalä;
śhunꞌuyquipis cushicuypi paćhcanꞌalä.
6Madian, Efa läducunapïtamá
achca-achca camïllucuna juntaycamuśhunqui;
Saba lädućhu yaćhäcunämari ürucunacta,
insinsiucunacta apapämul Tayta Diosta alawapäcunꞌa.
7Cedar lädućhu uwishcunätapis ampämi juntuycamunꞌa.
Nebaiot lädućhu ulu uwishcunäpis maquiquićhümari caycunꞌa
uycuna patacćhu śhunꞌüpänu uycamänayquipä.
Ćhasquiyculmi sumä caynïwan alawana wasicta
tuquish-tuquishllaman licaliycachishä.
8“¿Pucutaynüña śhamücunaca mayancunamá?
¿Ulpaynu puñunanman pälïcunaca mayancunamá?
9Calu lamar patanćhu cäcunämari
yaꞌaman chalapaculcal śhacayalcämun.
Tarsis lädu barcucunämi chuliquicunacta
calu-calupi apacuśha puntayalcämun.
Paycunamari Tayta Diosniquita,
Israelpa Chuya Tayta Diosninta sumä
lulaycuśhanpi alawaycapäcunanpä
illaynincunacta, üruncunacta apayalcämun.
10“Murällayquicunactapis mana Israel läducunämari śhalcachipäcunꞌa;
mandacünincunapis sirbïniquiñamá capäcunꞌa.
Piñälächimaptiquimari mućhuchipäculac;
cananñatacmi ichá llaquipaynïta camalaycälichishayqui.
11Achca nasyuncuna cänincunacta apapämunanpämari
malcayquip puncun imaypis quićhalayanꞌa;
tutapapis muyunpapis manamá wićhacunꞌachu.
Llallïsha mandacücunäpis anmanmi puśhaycamuśha capäcunꞌa.
12Sirbiyta mana munaśhüniqui nasyuncunacá camacaycüśha,
pampaman muyüchishamari canꞌa.
13“Alawana wasïta tuquishllacta
lulaycunayquipämi Libano lädupïta apapämunꞌa:
sumä-cama pinocunacta, bojescunacta, ciprescunactapis.
Yaꞌapa ćhaquí jaluśhan wasi, altuman juluycuśhamá canꞌa.
14Ñacachipäcuśhüniquip chulincunamá
ñawpäniquiman uyshuycälimunꞌa.
Lluy usuchishüniquicunäpis ćhaquiquimanmá uyshuycälimunꞌa.
Paycunam: ‘Tayta Diospa malcan,
Israelpa Chuya Sionnin’ nipäcuśhunqui.
15“Masqui am jamuyäśha, ćhïnisha,
jitäśha cayaptiquipis yaꞌami wiña-wiñaypä
altuman juluycuśhayqui;
lluy milayniquicunapä cushicuyninmari caycunqui.
16Nasyuncunämi sumä allinnin
micuycunactalä upäcuśhunqui;
mandacücunämi cänincunapïlä apapamuśhunqui.
Chaynüpamá yaćhanqui yaꞌa Tayta Dios salbäniqui caśhäta;
Jacobpa sumä munayniyüca libraycüniqui caśhäta.
17“Brunsicta uycunactá üructam uycuśhayqui;
Jïrructa uycunactá illaytam,
cullucta uycunactá brunsictam;
lumicta uycunactá jïrructamari uycuśhayqui.
Jawca cawsaycämi caminaycuśhunqui;
tincüninman licaycuycämi puśhaycuśhunqui.
18Wañuchinacuycuna malcayquićhu manañamá uyalishañachu canꞌa.
Pampaman muyuchinacuyca, pulumachisha
caycunaca allpayquićhu manañamá canꞌañachu.
Aśhwanpa murällayquicunacta ‘Salbacümi’ nipäcunquiñamá;
puncuyquicunactapis ‘Alawaycuna’ nipäcunquiñamá.
19“Yaꞌa Tayta Diosniquimari wiña-wiñaypä acchiqui caycuśhä;
Yaꞌa Tayta Diosniquim sumä cayniqui caycuśhä.
Chaymari intica muyunpa acchishunayquitapis manaña munanquichu;
quillaca tutap acchishunayquitapis nï munanquiñachu.
20Intiqui manañamá jiꞌalpunꞌañachu;
quillayquipis manañamá chincaycunꞌañachu.
Tayta Diosniquiñamari wiña-wiñaypä acchiqui caycunꞌa;
llaquicuyniquicunapis camacanꞌañamá.
21“Lluy malcayquiñamá allincäta lulä-cama caycälinꞌa;
wiña-wiñaypämi allpanćhu caycälinꞌa.
Lantacuśhá lantacta quiquïmi chillquichimuśhä;
caynu lulaycuśha sumä caynïta altuman julaycamänanpämi.
22Ashllay cäcämi walanganpi (1,000) milanꞌa;
tacsha malca cäcämi jatun nasyunman muyunꞌa.
Yaꞌa Tayta Diosmi timpunćhu chaynu lulaycuśhä” nil.
Who We AreWhat We EelieveWhat We Do
2025 by iamachristian.org,Inc All rights reserved.
