1Mandacü Taytallay, Diosnillay, altumanmi juluycuśhayqui.
Wiña-wiñaypämi śhutiquita alawaycuśhayqui.
2Walan-walanmi allinpä licaycuśhayqui.
Wiña-wiñaypämi śhutiquita alawaycuśhayqui.
3 Tayta Dios sumä-sumämi.
Payꞌa maynu-maynu alawaycunamá.
Sumä caynin mana tantiayta atipanamá.
4Milay śhamücunäpis milaynincunacta lulayniquicunapïta willaculcanꞌamá.
Sumä-cama lulaycuśhayquicunätamari willanaculcanꞌa.
5Paycuna sumä cayniquipi, munayniquipïmá limaycälinꞌa.
Yaꞌapis äśhalayllaman camana lulaycuśhayquicunämanmi tantiapaycuśhä.
6Paycuna munayniquiwan sumäcunacta
lulaycuśhayquicunapïmá sumachipäcunꞌa.
Yaꞌapis maynu sumä munayniquipïtamá willacuśhä.
7Paycuna sumä llaquipayniquipïtamá willaculcanꞌa.
Tincüninman lulaycuśhayquipïtamá cushisha taquipäcunꞌa.
8 Tayta Diosꞌa, cuyacuyniyümi, llaquipayniyütacmi.
Ñacayta piñacü, ancha-anchap llaquipayniyümá.
9 Tayta Dios lluypäpis allinmá.
Lluy camaśhancunäta llaquipaycunmá.
10 Tayta Diosllay, lluy camaśhayquicunämá alawapäcuśhunqui.
Chalapacüniquicunamá altuman julaycapäcuśhunqui.
11Mandacuyniquip sumä cayninpi limapäcuchun.
Sumä munayniquiwan lulaśhayquicunapi limapäcuchun.
12Chaynüpamá munayniquiwan lulaśhayquicunäta
nunacunaca yaćhapäcunꞌa.
Chaynüpamá mandacuyniquip sumä cayninta lisipäcunꞌa.
13Mandacuyniqui wiña-wiñaypämá.
Milaycuna pasaptinpis gubirnuyqui manamá camacanchu.
Tayta Dios chalapacuna calmi lluy limalicuśhanta lulaycun.
Lluy lulayninćhüpis llaquipayniyümari.
14Lluy mitcacücunätapis Tayta Diosmá tacyaycachin.
Ñacäcunätapis paymá śhalcaycachin.
15Lluypis amllamanmá licapayalcämun.
Amñatacmi micunancunacta timpullanćhu uycunqui.
16Awari, maquiquita quićhayculmá lluy cawsayniyu
cäcunäman maćhaycälinancama allincäta uycunqui.
17 Tayta Diosꞌa imaćhüpis allin tincüllanman licaycümá.
Lluy lulaynincunaćhüpis llaquipayniyümá.
18 Tayta Diosꞌa ayacünincunap lädullanćhümá cayan.
Rasunpa mañacünincunap sircallanćhümá cayan.
19Manchacuywan cäsucünincunap munaśhanta lulaycunmá.
Ayacuynintapis uyaliyculmá salbaycun.
20Cuyänincunacta Tayta Dios ñawillanćhümá caycachin.
Mana allin nunacunätañatacmi ichá camacaycülunꞌa.
21 Tayta Diosllactamá shimïpis alawaycunꞌa.
Sumä chuya śhutinta lluy cawsäcunaca wiña-wiñaypä alawapäcuchun.
Who We AreWhat We EelieveWhat We Do
2025 by iamachristian.org,Inc All rights reserved.
