1Alawaycuśhá Tayta Diosnillay,
amari upällacuycuychu.
2Mana allin nunacunäwan casquishcunämá yaꞌap cuntrá limapäcun.
Yanꞌal articunawanmá tumpapäman.
3Ćhïnicuy limaycunallawanñamá muyupayämanpis.
Yanꞌal-yanꞌalpïñamá ruydupapäman.
4Cuyacuyniyu caśhä-laycumá ćhïnicünïcuna śhalcälälin.
Yaꞌañatacmi ichá paycunapïta amllacta mañacamullá.
5Allincäta lulaycuptïpis mana allincäwanmá cutiycälälichiman.
Cuyaśhäpïpis ćhïnicuywanmá cutiycälälichiman.
6Chaynu nunacta cäraycunanpä,
mana allin cäraycünin nunacta ćhulaycapuy.
Tumpäcäpis chayćhu tumpachun.
7Cäraycuśhancäćhu mućhuycachisha cananpäri yaluycuchun.
Mañacuynincuna cunca cuchuynin caycuchun.
8Ashchay watacunallañari cawsaycuchun.
Lulaynincunamanpis juccunañari yaycapäcuchun.
9Chulincunapis mana taytayü-mamayü licalipäcuchun.
Walminpis japanyäśhaman muyuchun.
10Chulincuna purinquichunu mañapacuśhtin pulipäcuchun.
Pulumäśha wasincunapi alapacälälisha micunanpä ashipäcuchun.
11Mañä nunacunaca ima cänincunactapis apaculcächun.
Ima armacuśhancunactapis mana lisisha nunacunäri waycälälichun.
12Amari paytapis nï quïdä japallan chulincunactapis
mayanpis llaquipaycuchunchu, śhalcuycuchunchu.
13Milaynincuna lluy camacächun.
Śhutinpis pasaypipä chincächisha cachun.
14Taytanpa juchancunacta Tayta Dios yalpaycuchun.
Mamanpa mana allin lulaśhancunacta ama unꞌaycuchunchu.
15Paycunap mana allinnincunacta
Tayta Dios imaypis ama unꞌachunchu.
Cay allpäćhu mana yalpaśha cananpä chincachichun.
16Payꞌa llaquipäcuyta manamá yaćhalachu.
Mana cäniyücunäta, wacchacunäta,
llaquisha cäcunäta wañuchinancamamá aticaćhala.
17Ñacachiyllapi limay wañupacuśhanmannuꞌari quiquinpis ñacayćhu cachun.
Juccuna allin cananpä mana munaśhanmannuꞌari
quiquintapis mana allinpä licaycuchunchu.
18Mana allin limaycunallawanmari müdanawannüpis müdacülun.
Chay yacunu aychanman pasaycuchun, asaytinu tullunman yaycuchun.
19Mana allinca punchunu ñitilächun.
Waćhacunu ćhïla-ćhïlacta imaypis chalalächun.
20Caynuꞌari tumpamänïcunätawan
cuntrá limäcunäta Tayta Dios pägaycuchun.
21Ñatac am Tayta Diosnillay,
śhutiquita cuyaśhayqui-laycuꞌari yanapaycallämay.
Sumä cuyacuyniyu caśhayqui-laycuꞌari libraycallämay.
22Pasaypi llaquićhu pïlläpis mana cäniyümi cayällá.
Śhunꞌüpis pasaypi llaquićhümá cayällan.
23Tardilpuptin llantuycänümá chincalpuyällá.
Waywaca apaśhan paćhcaśhcänümá cayällá.
24Manaña micuptïmá unꞌulnïcunapis chucchuyällanña.
Micuypïmá tullunllanña cayällá.
25Nunacunäpa asipäculcänanmá cayällá.
Licapämal ñuquicaćhalcul-ñuquicaćhalculmi jamuyapäman.
26 Tayta Diosnillay, yanapaycallämay.
Llaquipayniyu caśhayquimannuꞌari salbaycallämay.
27Ampa maquiqui caśhanta tantiapäcuchunꞌari.
Am Tayta Dios lulaycuśhayquita yaćhapäcuchunꞌari.
28¿Imatá ucaman paycuna mana allin canäpä licayalcämaptinpis?
Amꞌa allinpamá licaycamanqui.
Paycuna camacapämänanpä listu cayaptinpis pinꞌaymanmá ćhulaycunqui.
Cay nunallayquitañatacmi ichá cushiycachimanqui.
29Tumpamänïcunaca pinꞌaywan ñitichicüśha cachun.
Pantayca punchunu pitwilächun.
30Yaꞌañatacmi Tayta Dioslläta sumä-sumä alawaycuśhä.
Achca-achca nunacunap ćhawpinćhümá alawaycuśhä.
31Mana pïllanpis cäniyücunäta śhalcuśhanpïtamá,
wañunanpä cäraycücunäpa maquinpi salbaycuśhanpïtamari alawaycuśhä.
Who We AreWhat We EelieveWhat We Do
2025 by iamachristian.org,Inc All rights reserved.
