2 Reyes 17 - Old Testament Quechua Wanca（QVW）

Israel lädućhu Oseasmi mandacun

1Canan má, Juda lädućhu Acaz ćhunca ishcayniyu (12) wataña mandacuyaptinmi, Israel lädućhu mandacuyta allaycula Elapa chulin Oseas. Paymi Samariapïta isun wata mandacula.

2Ñatac Tayta Diospa ñawquin mana allincunactamá lulala. Manatacmari Israel lädućhu punta mandacücunänüchu anchap mana allinta lulala.

3Asiriap mandacünin Salmanasarmi mandacü Oseaswan pilyä lila. Chayćhu llallilcul uywayninman muyüchiptinmi alcabäla pägäninña Oseas licalïla.

4Chaynu cayäśhanpïmi mandacü Salmanasarpa cuntran Oseas śhalcülun. Jinalmi Asiria mandacücäman watan-watan pägaśhan alcabälactapis manaña pägalachu. Jinaman Egiptop mandacüninman So nishanmanpis willacünincunacta caćhäla yanapänanpämi. Chaycunacta mandacü Salmanasar yaćhälulmi mandacü Oseasta carsilman wićhächila.

5Jinalculmi Asiriap mandacünin jinantin Israel läduman yaycaycälil Samariacta cunćhalapäcula quimsa wata.

6Ñatac isun wataña Oseas mandacuyaptinmi Samaria malcacta Asiriap mandacünin pudiracuycula. Jinalmi Asiriaman lluy Israel läducunäta prïsu puśhalcul Gozan lädu, Habor mayup lädunćhu cä Halah nishanman, jinaman Medo läducunap malcancunamanpis lluy ćhulaycula, chayćhu yaćhapäcunanpä.

7Chaynu pasala Egiptop mandacünin Faraonpa maquinpi julamuśhan Tayta Diospa cuntran, Israel läducunaca mana allincunacta lulaśhanpïmi. Jinaman lluy taytachacunacta alawapäcuśhanpïmari.

8Chaynütac chaynu pasala ñawpäninpïta Tayta Dios alapacuśhan malcacunap custumrincunacta lulaśhanpïmi, jinaman Israel lädup mandacünincunap mana allin lulaynincunacta jinalla atichishanpïmari.

9Chaynütacmi Israel läducunaca Tayta Diosninta pacallap jalutaculcäla altunnincunaćhu taytachacunap uycuna patacta lulapäcuśhanwan. Chaynu lulapäcula lluy malcacunäćhümi; täpananpä cä turripi aśhta sumä murällaśha cä jatućha malcacunäcamamari.

10Chaynütacmi altunnin ulꞌucunäćhu, pallaysapa lantacunäpa siquincunaćhüpis mamacha Aserap liträtuncunacta, jinaman lumipi śhaywacunactapis śhalcachipäcula.

13Chaymi lluy Israel läducunätawan Juda läducunäta Tayta Dios anyapäla willacünincunawan tantiänincunawan cay nil: “Mana allin lulayniquicunacta caćhaycapäcuyña. Sirbïní willacünïcunawan awquilluyquicunaman yaćhachishäcunacta, camachishäcunacta, limaśhancunactari lluy lulaycäliy” nin.

14Niptinpis paycuná manam cäsuculcälachu; aśhwanpa Tayta Diosman mana chalapacü awquilluncunanüpis pasaypi cullu linli-camam capäcula.

15Chaymi yaćhachishancunacta, awquilluncunaman limalicuśhanta, jinaman camachishancunactapis jalutacälälila. Mana ćhaniyu taytachacunaman muyucalcälishanpamari paycunapis mana ćhaniyüña capäcula. Masqui Tayta Dios mićhacuyaptinpis muyülïninćhu cä malcacunap anla lulaynincunactamá atichipäcula.

16Tayta Diosninpa nishancunacta unꞌaycälilmi brunsipïta fundïsha ishcay malta wäcaniläta, mamacha Aserap liträtunta lulälälila. Jinaman sïlüćhu cä uyllurcunätawan taytacha Baaltam alawapäculapis.

17Chaynütac wamla-walaśh chulincunactapis cañaywanmi uycälila; rüjacunamanpis licacücunämanpis lipäculamá.Deut 18.10. Chaynu mana allin lulaycunallaćhüña jicutapäculmi Tayta Diosta piñachipäcula.

18Chaymi Israel läducunäwan Tayta Dios sumä piñacülul paycunacta alapacüla. Juda läducunällactañam chayćhu caćhaycüla.

19Chaypi Juda läducunäpis Tayta Dios nishanta manatacmari lulaycapäculachu. Aśhwanpa Israel lädu mana allin lulapäcuśhancunactamá atichipäcula.

20Chaymi lluy Israel läducunäta Tayta Dios caćhaycüla. Waycänincunap maquinman ćhulayculmari pinꞌayćhu uyshulächila; jinaman lädunpïtapis alapacülamá.

21Chaynu Davidpa milayninpi Israel läducta Tayta Dios julüluptinmi, Nabatpa chulin Jeroboamta mandacüninpä ćhulälälin. Jeroboamñatacmi Tayta Diospi lluy japächalcachil, sumä juchacunacta lulachila.

22Chaynu Jeroboampa mana allin lulaynincunacta Israel läducunaca lulapäculmi, mana caćhaycapäculachu.

23Chaymi willacünincunawan willacachimuśhannu lädunpïta Tayta Dios wicapäla. Jinaptinmi Israel läducunäta Asiriaman prïsu puśhaculcäla. Chayćhümi canancama cayalcan.

Samaria malcamanmi juc caśhta nunacunacta taycachin

24Chay Asiria lädup mandacüninmi Israel läducunäpa pudirnin Samaria malcaman puśhälun Babiloniapi, Cutapi, Avapi, Hamatpi, Sefarvaimpi nunacunacta pudiracaycälinanpä. Paycunam Samariap lluy malcancunaćhu yaćhapäcula.

25Paycuna chayćhu yaćhayta allaycapäcul, Tayta Diosta manam alawapäculachu. Chaymi Tayta Dios liyuncunacta caćhämuptin waquintá lluy wañülächila.

26Jinaptinmi Asiriap mandacüninman willaycapäcula: “Samariaman puśhaśhayqui nunacunaca manam chay malcayu taytachanta imanuy alawapäcunanpäpis yaćhapäcunchu. Chaymi paycunap taytachan liyuncunacta caćhämuptin wañuchicuyan” nil.

27Niptinmi Asiriap mandacünin nin: “Chay malcapi prïsu puśhamuśhayqui jucnin sasirdüticta cutichiy, chayćhu yaćhamunanpä. Chayćha paycunacta yaćhachinꞌa chay malcap taytachanta imanuypa alawana caśhantapis” nil.

28Chaymi Samariapi prïsu puśhaśhan jucnin sasirdüticta cutichila, Bet-el malcaćhu yaćhal Tayta Diosta imanuypa alawayta yaćhachinanpäpis.

29Ñatac paycuná malcanpi taytachanta-camam lluy lulacälälin. Jinalculmi altunninćhu lulapäcuśhan uycunancunaman ćhulaycul alawapäcula.

30Ñatac Babilonia nunacunacá Sucot-benot taytachantam lulacälälin, Cuta läducunacá Nergal taytachanta, Hamat läducunacá Asima taytachanta,

31Ava läducunacá Nibhaztawan Tartac taytachancunacta, Sefarvaim läducunacá Adramelectawan Anamelec taytachancunacta lulaycälilmi alawayninwan chulincunacta cañaycapäcula.

32Jinaman Tayta Diostapis alawapäculam. Ñatac sasirdütincunapä quiquincunapïtam mayantapis ćhulälälï cala, ulꞌüćhu cä uycapäcunanpä cäcunäćhu alawayninwan uycapäcunanpä.

33Chaynu Tayta Diosta alawayalcalpis nasyunninćhu custumrinmannü-camam taytachancunactapis jinallatac alawapäcula.

34Canancamapis chay punta custumrinmannu lulapäculmi Tayta Diostá mana alawapäcunchu. Jacobpa śhutinta Israel śhutiman muyuchï Tayta Dios camachicuyninta, yaćhachicuyninta Jacobpa milayninman uycuśhancunacta manamari manchacuywan cäsuculcanchu.Gen 32.28; 35.10.

35Israelcunäman Tayta Dios limaliculmi caynu nin: “Taytachacunamanꞌa amam uyshuycapäcunquichu, alawapäcunquichu, sirbipäcunquichu, nïtac uycapäcunquipischu.Exo 20.5; Deut 5.9.

36Aśhwanpa sumä munayninwan Egiptop maquinpïta julaycamuśhuśhayqui Tayta Diosllactam manchaculcanqui, alawapäcunqui.Deut 6.13. Payllactamari alawapäcul uycapäcunquipis.

37Jinaman isquirbiycul uycuśhá yaćhachicuyta, nishacta, camachicuyta lulaymanmi ćhulaycälinqui. Amamari taytachacunacta manchacuywan alawapäcunquichu.

38Amcunaman limalicuśhanta amamá unꞌapäcunquichu. Amatacmari taytachacunamanpis manchacuywan uyshuycapäcunquipischu.

39Aśhwanpa Tayta Diosllayquitam manchacuywan alawaycälinqui. Payllamari lluy ćhïnicüniquicunap maquinpïta libraycälishunqui” nil.

40Chaynu nishantapis chay nunacunacá mana uyalicuyculmi punta custumrincunacta jinalla lulapäcula.

41Chaynümari chay nunacunaca Tayta Diostapis taytachancunactapis sirbipäcula. Awari, canancamapis milaynincuna awquilluncunanümari lulayalcan.