1 Samuel 3 - Old Testament Quechua Wanca（QVW）

Tayta Diosmi Samuelta ayan

1Samuelmi tacshallalä cayal sasirdüti Elita yanapäla Tayta Diosta sirbiyta. Chay timpucuna Tayta Dios manamari anchap mayantapis limapälachu, nïtac suyñunpapis nilachu.

2Eli yaśha cayninwanmari manaña tuquictachu licala. Paymi juc tuta cämanchu puñuyäla.

3Samuelñatacmi Tayta Diospa wasinćhu limalicuśhan babulca caśhancäćhu puñuyäla. Chay tuta michïrupis walayaptinlämi,

4Samuelta Tayta Dios ayala: “Samuel, Samuel” nil.

Niptinmi Samuel: “Cayćhümi cayá” nin.

5Nilculmi Eli caśhanman lilcul: “Cayćhümi cayá. ¿Imapämi ayamälanqui?” nin.

Niptinmi Eli: “Yaꞌa manam ayalacchu. Cutiycul puñucamuy” nin.

Niptinmi Samuel cutiycul puñucuycula.

6Ñatac caśhanmi Tayta Dios ayala: “Samuel, Samuel” nil.

Chaymi Samuel śhalcuculcul Eli caśhancäman yapa lilcul: “Cayćhümi cayá. ¿Imapämi ayamälanqui?” nin.

Niptinmi Eli: “Iju, yaꞌa manam ayalacchu. Cutiycul puñucaycamuy” nin.

7Chay timpu Tayta Diosta manalämi Samuel lisilachu. Chaymi shimintapis manalä tantialachu.

8Quimsa cutićhu Tayta Dios Samuelta ayaptinmi śhalcuculcul Eli caśhanman pasacula: “Cayćhümi cayá. ¿Imapämi ayamälanqui?” nil.

Chayćhümi Eli tantiälun quiquin Tayta Dios Samuelta ayaśhanta.

9Chaymi nin: “Cutiycul puñucaycamuy. Sïchuśh ayaśhuptiqui ninqui: ‘Tayta Diosllay, uyway nunallayqui uyaliyacmi. Nimay jinalla’ ” nil.

Niptinmi Samuel cutiycul caśhan puñucuycula.

10Chaypïta Tayta Dios śhalcamulmi aśhuycul punta ayaśhannülla caśhan ayan: “Samuel, Samuel” nil.

Niptinmi Samuel: “Uyway nunallayqui uyaliyacmi. Nimay jinalla” nin.

11Niptinmi Tayta Dios nin: “Israelćhümi sumä llaqui lulayta lulaycuśhä. Chayta uyalicunäpa aychanmi sumä-sumäta shillillinyanꞌa.

12Chay muyunmi sasirdüti Elita, aylluntinta nishäta lluy lulaycuśhä.

13Niläñamari chulincunap juchancunapïta wiñaypä cäraycunäta. Chulincuna yaꞌacta jalutacayalcämaptinpis, payꞌa manam uchuyllapis piñapayculachu.

14Chaymi Elipa ayllunpa cuntran limalicú: masqui uycamaptinpis, cañaywan uycamaptinpis cay mana allin lulaśhanpïta manam pampachaśhachu canꞌa” nil.

15Chaypïta Samuel puñucuyculmi chay wälaña Tayta Diospa wasinta quićhaycula. Ñatac chay uyalishantá manchaculam sasirdüti Eliman willaycuyta.

16Eliñatacmi ayalcul Samuelta nin: “Cuyaśhá iju, Samuel” nil.

Niptinmi: “Niycamay, taytay” nin.

17Niptinmi Eli: “¿Imactam Tayta Dios nishulanqui? Imallactapis mana pacaycamallal lluyta willaycallämay. Imallactapis pacaycämaptiquiꞌa Tayta Diosninchicmi sumäta mućhuycachishunqui” nin.

18Chaymi Samuel imallactapis mana pacaycul lluy-lluyta willaycula.

Eliñatacmi nin: “Payꞌa Tayta Diosmari. Imam munaśhanmannu lulaycuchun” nil.

19Samuelñatacmi wiñayäla; paytam Tayta Dios ñawillanchu caycachil willacuśhanta lluy lulaycula.

20Lluy Israel caśhtacunaca, Dan ayllupïta allaycul aśhta Beerseba malcäcamamari yaćhapäcula Tayta Diospa willacünin Samuel rasunpa caśhanta.

21Ñatac Tayta Diosꞌa Silo malcaćhümi Samuelman licalilcamul-licalilcamul limapä cala. Chayćhümari Tayta Dios willacuyninta willaycü cala.