Ezequiel 33 - Old Testament Quechua Wanca（QVW）

Malcap willacünin nuna malcap licänin cananpämi nin Eze 3.16-21

1Chaypi Tayta Diosmi niman:

2“Wañucülla nuna, malcayquita niycamuy: ‘Mayan nasyunpa cuntran gïrracta puśhamuptïpis, chay malcam jucnin nunanta aclaycunan, malcanpa licänin cananpä.

3Paymi ćhïnicünincuna pilyananpä śhacayämüta licälul curnitillacta tucanꞌa malcanta willaycunanpä.

4Mayanpis chay curnitilla tucaśhanta uyaliyal mana cäsucuycul cayaptin, ćhïnicünincuna wañüchiptinꞌa quiquinmi juchayu canꞌa.

5Awari, curnitillacta uyaliyal imactapis mana lulaśhanpïta quiquinmá juchayu canꞌa. Cäsuculꞌa cawsayninta salbaycunmanćha cala.

6Ñatac ćhïnicücunaca śhacayämüta licayalpis malcanta willaycunanpä curnitillacta mana tucaptinꞌa chayćhu cäcunäta wañüchinꞌamá. Chay nunacunaca jina juchayüllamari wañupäcunꞌa. Ñatac chay nunacuna wañuśhanpïta malcap licänin nunamá yaꞌacta niycamänan canꞌa’ nil niycamuy.

7“Chayurá am wañüculla nunactamá, Israel malcap licäninpä ćhulayac. Chaymi yaꞌa nishacta uyaliycamal paycunaman willaycunqui.

8Chay mana allin nunacunäta yaꞌami niyá: ‘Wañunquim’ nil. Niyaptïpis chay mana allinninpïta wanacunanpä mana willaycuptiquiꞌa, chay nuna juchanpïtamá wañunꞌa. Ñatac chay nuna wañuśhanpïta anmi niycamänayqui canꞌa.

9Chay mana allin lulayninta caćhaycunanpä willaycuptiqui, mana uyalïtucuptinñatacmi ichá juchanpïta wañunꞌa. Ñatac amꞌa cawsayniquitam salbaycunqui.

10“Am wañucülla nuna, Israel malcacta niycamuy: ‘Amcunam nipäcunqui: Mana allin lulaynïcunam, juchäcunam ñitilayalcäman. Chaynu piswalpuyalcal, ¿imanuypañamá cawsapäcuśhä?’ nil.

11Yaꞌa Tayta Diosñatacmi rasunpa cawsaśhänu ní: Mana allin nunaca wañunanta manamá munächu. Aśhwanpa mana allin lulayninta caćhaycul cawsanantamari muná. Am Israel malca, ¿imapïmá wañuyta munapäcunqui? Mana allin lulayniquita, juchayquita caćhaycuyñari.

12Am wañucülla nuna, malca-masiquicunacta niycamuy: ‘Allin lulaycü nunaca mana cäsucüña licalïluptinꞌa allin lulaśhancunapis manamá salbaycunꞌachu. Ñatac mana allin lulä nunaca chay lulaśhanpi wanacuptinꞌa, chay mana allin lulaśhanpi manamari wañunꞌachu. Chay allin lulä nunaca juchacülulꞌa manamá cawsanꞌachu nï chay allin lulaśhan-laycupis.

13Sïchuśh allincäta lulä nunacta “Cawsanquim” nil niyaptïpis payñatac allin lulayninman chalapacüśha mana allin lulaycunacta lulaptinꞌa, manañamá chay allin lulaynincuna yalpalcuśhachu canꞌa. Sinuꞌa chay juchacta lulaśhanpïtamá wañunꞌa.

14Ñatac juchasapäta nïman: “Wañunquim” nil. Chaynu niyaptïpis payñatacmi juchanpïta wanaculcul allincämannu, tincücämannu lulaycunꞌa.

15Chay müdana chalaläśhantapis cutiycachil, suwacuśhantapis cutiycachil camachicuy nishanmannu cawsaycul, ima mana allintapis mana lulaycuptinꞌa rasunpa cawsanꞌamá. Manamá wañunꞌachu.

16Jucha lulaśhancuna manañamá yalpalcuśhachu canꞌa. Pay allincämannu tincücämannüñamá cawsaycunꞌa’ nil.

17“Chaynu captinpis malca-masiquicunam nipäcun: ‘Tayta Diospa licaycuynin manamá tincüninmanchu’ nil. Rasunpa quiquincunamá allincämannüchu mana cawsaycälin.

18Allincäta lulaycü nunaca, allincäpïta japächaculcul juchacta luläluptinꞌa chay juchan-laycumari wañunꞌa.

19Ñatac juchasapa nunaca juchanta caćhaycul allincämannu, tincücämannu cawsaycuptinꞌa, chay allin lulaśhan-laycumari cawsaycunꞌa.

20Israel malca, amcunamá nipäculanqui: ‘Tayta Diospa licaycuynin manamá tincüninmanchu’ nil. Ñatac imanuy cawsapäcuśhayquimannu-camam yaꞌa cäraycälishayqui” nil.

Jerusalen pampaman muyuchisha cananpämi nin

21Má, prïsu puśhaśha capäcuśhäpïta ćhunca ishcayniyu watap, ćhunca quillap picha muyunninćhümi Jerusalenpi ayimü nuna yaꞌaman ćhaycamul niman: “Jerusalen malcam ćhïnicüninchicpa maquinćhüña cacuyan” nil.

22Chay ayimü nuna manaläpis ćhämuptin anyan tardiñam Tayta Dios munayninwan shimïta upächimäla. Chay walantin muyun ayimü nunaca ćhämuptinñatacmi shimïta quićhaycäman.

23Chayćhümi Tayta Dios niman:

24“Wañucülla nuna, chay pulumäśha cä Israel lädućhu nunacunämari caynu niyalcan: ‘Abraham japallan cayalpis cay allpätam duyñuchacuycula. Yaꞌanchicꞌa achcamá cayanchic. Chayurá jinantin nasyuntalämi duyñuchacuycuchwan’ nil.

25Chaymi paycunacta ninqui: Tayta Diosmi nin: Amcuná, yawarniyu aychactamá micuyalcanqui, taytachayquicunactamá alawayalcanqui, nunacunätapis wañuyalcächinquimá. ¿Chaynu cayalcalchun jinantin nasyuntalä duyñuchacuyta munayalcanquimanpis imatá?

26Amcuná wañuchiyllacta ćhapäcuna, taytachacunacllacta alawäcuna, mansibacuycunallacta jicutäcunam capäcunqui. ¿Chaychun jinantin nasyuntalä duyñuchacuyta munayalcanquimanpis imatá?” nil.

27Aśhwanpa caynu niycamuy: Tayta Diosmi nin: Rasunpa, pulumäśha malcacunäćhu yaćhäcunaca gïrrawanmi wañupäcunꞌa. Ćhaclacunäćhu cäcunäta munti uywacunawanmá micächishä. Palasyucunaćhu, maćhaycunaćhu cäcunaca juyu ishyaywanmá wañupäcunꞌa.

28Jinaman chay nasyuncäta pulumäśha pasaypi chunyämanmi muyüchishä. Israelpa ulꞌuncuna camacaycüśhamá quïdapäcunꞌa. Chayninpa manañamá mayanpis pasapäcunꞌañachu. Chay sumä munayninpi nunatucüśha caynin mana cämanñamá muyunꞌa.

29Paycuna millachicuy lulaycunacta lulaśhanpïtamá camacaycüśhä, pasaypi pulumäśha, chunyä capäcunꞌa. Chaylämari yaꞌa Tayta Dios caśhäta yaćhapäcunꞌa.

30“Canan má, am nunap chulincäpïmi malca-masiquicuna murällacunäćhu, wasicunap puncuncunaćhu limayalcan. Quiquin-pulamá ninaculcan: ‘Tayta Dios imam willachimuśhanta uyaliycü lishun’ nil.

31Chaynu ninaculmi caśhayquiman śhapämul willacuśhayquita ñawpäniquićhu lluy uyalïtuculcan. Ñatac manamá lulayman ćhulapäcunchu. Shimillanwanꞌa mishquichiculcanmá; śhunꞌunñatacmi ichá lägacuycunällacta ashiyalcan.

32Paycunapá, cuyanacuypi mishqui taquicta sumä taquïcänümá am cayanqui. Jinaman arpa tucäcätanümá licaycälishunquipis. Paycuna nishayquita uyaliyalcalpis manamá cäsuculcanchu.

33Ñatac nishayquicuna lluymi lulacacunꞌa; lulacacuptinñatacmi yaꞌapa willacüní paycunaćhu caśhanta yaćhapäcunꞌa” nil.