1Lluy caycunacta Mardoqueo yaćhälulmi llaquicuypi müdanantapis laćhyälun, shicacü müdanawan ćhulacülun, umanmanpis ućhpacunacta jillpucuycul jinantin malcaćhu apalcaćhaśhtin pulila.
2Chaynu jinaśhtinmi palasyup puncuncamalä ćhälun. Chaynu müdanayütá palasyuman manamari yaycachiychu cala.
3Chaynütacmi mandacücäpa camachicuynin ćhäśhan lluy malcacunäćhüpis Israel läducunaca sumä llaquicuypïta ayunapäcula, waꞌapäcula, awćhupäculapis. Waquinnincunañatacmi shicacü müdanacunawan ćhulaculcul ućhpa jananćhu capäcula.
4Chaynu Mardoqueo lulaśhantam Esterta sirbï walmicunäwan cä capäśha nunacunaca willaycälälila. Chaymi Ester sumä llaquicülul allin müdanawan müdacunanpä Mardoqueoman apachila. Mardoqueoñatacmi ichá cambiacuyta nï munalachu.
5Jinaptinmi Esterta jucnin licaycünin capäśha Hatacta ayalcachil, Ester caćhälun Mardoqueo imapi chaynu lulaśhanta, ima pasaśhantapis yaćhaycamunanpä.
6Chaymi palasyup puncunpa chimpan läsaćhu Mardoqueo täcuśhancäman Hatac lila.
7Chayćhümi Mardoqueo willaycula imapi chaynu lulaśhantapis, jinaman Israel läducunäta lluy wañuchinanpä Aman ayca illayta mandacücäman pägayta munaśhantapis.
8Chaynütacmi lluy wañuchisha cananpä Susa malcaćhu mandacüca camachishanpa cupyantapis Esterman apachila, tuquicta yaćhaycunanpä. Jinaman mandacücäman aśhuycul caśhtancunap faburnin mañacamunanpäpis niyculamari.
9Chaymi Hatac cutilcul Mardoqueo lluy nishanta Esterman willaycula.
10Chaypïmi Ester yapañatac Hatacta cutichila Mardoqueoman caynu nil:
11“Quimsa ćhunca (30) muyunñam mandacüca mana ayachimanchu. Jinaman paypa lluy yanapänincunapis jinantin malcäpis tuquictam yaćhapäcun mandacüca mana ayachiptin quiquillanpi lïcätá walmictapis wayapactapis wañuchinanpä caśhanta. Ñatac mana wañuchishachu canman quiquin mandacüca chalaläśhan üru bäranta chacchaycullaptinmari” nil.
12Chaynu Ester nishanta Mardoqueoman willaycuptinmi,
13payñatac caynüta nichimula: “Ester, ¿Israel lädu cayalpis, ‘palasyućhu caśhä-laycu salbacüśhäćha’ niyanquichun imatá?
14Sïchuśh upällacuycul imactapis mana niptiquiꞌa, Israel läducunäta libraycü juc lädupïmi śhamunꞌa. Ñatac amꞌa lluy aylluntinmari wañupäcunqui. Ichaćh caynu sasachacuycunaćhu malcayquita yanapänayquipäpis mandacücäpa walmin licalilanqui” nil.
15Chaynu nichiptinmi Ester yapañatac willacachila:
16“Susa malcaćhu cä lluy Israel läducunaca yaꞌapïta ayunapäcunanpä juntuycuy. Quimsa muyun, quimsa tutari ima micuyllactapis yacullactapis ama upyapäcuchunchu. Yaꞌapis sirbïní walmicunäwanćha ayunapäcuśhä. Jinalculćha camachicuymannu yaycunapä mana cayaptinpis mandacücäman yaycuśhä masqui wañüchimänan captinpis” nil.
17Niptinmi Mardoqueo lilcul Ester nishantanülla lulaycamula.
Who We AreWhat We EelieveWhat We Do
2025 by iamachristian.org,Inc All rights reserved.
