Deuteronomio 32 - Old Testament Quechua Wanca（QVW）

1“Janay pacha, cay nishäcäta uyalimay;

cay pacha, shimí limaśhanta uyalimay.

2Yaćhachicuyní tamyanu ćhaycuchun;

limayní śhullinu ćhaycuchun,

pastucunäman puwa tamya ćhäcänu,

lantacunäman tamya tamyäcänu ćhaycuchun.

3 Tayta Diospa sumä caynincunactam willacuśhä.

¡Tayta Diosninchictari altuman juluycäliy!

4Paymi pacaycamäninchic wancaca;

lluy lulaśhancuna tincüllanmanmi, lulaynincuna lluy cällanmanmi.

Payꞌa rasunpa Diosmi, payćhuꞌa manam ima mana allinllapis canchu.

Payꞌa tincüllanman, cällanman lulämari.

5“Pasaypi juyu, mana allincunallacta luläcuna,

Tayta Diosta jalutacücuna, chulinnu capäcunayquipäpis

manamá allinchu capäcunqui.

6Pasaypi tullu uma luclucuna,

¿chaynüpachun Tayta Diosta cutiycachinqui?

¿Manachun pay camaśhüniqui taytayqui imatá?

Paymari lulaśhulanqui, tacyaycachishulanqui.

7Punta timpucunäta licaycäliy;

awquilluyquicuna caśhan watacunäman tantiaycäliy.

Taytayquicunacta tapuculcaptiquim willaycälishunqui;

awquilluyquicunam tantiaycälichishunqui.

8Sumä munayniyu Tayta Dios nasyuncunäpä

tücänincunactam unanchaycula,

nasyuncunäpä culindancunactapis ćhulayculam,

munayniyu sirbïnincuna ayca capäcuśhanmannu.

9“Tayta Diospa tücäninꞌa aclacuśhan malcanmi;

paypa tücänin Jacobpa milaynincunallamari.

10Paycunacta chunyäcäćhu,

chaqui allpa pulbulla muyuyäcäćhümi talïla.

Ama-pacha nilmi caminaycula;

ñawi luluntanümi licaycula.

11Mallwancunacta pälichinanpä cä

ishnanpä altunninćhu muyuycaćhayä ancanümi

Tayta Diospis laplancunacta camaycul julaycamuśhulanqui;

jinalmi laplanpa jananćhu apapäcuśhulanqui.

12Quiquin Tayta Diosllamari caminaycälishulanqui,

manamá mayan taytachapis yanapayculachu.

13Paymi allpäpa altunnin ulꞌucunäman ishpichila,

ćhaclacunäpä wayuynintam micaycachila;

aꞌacäpi yalachimuśhan mishquictam, asaytictam upyaycachila.

14Wäcacunap nätaśhnintam, uwishcunap lichintam micachila.

Malta uwishcunacta, Basan lädućhu cä ulu uwishcunacta,

allinnin ulu capishcunactamari micachilapis.

Trïguctapis allinnintam micachila;

übapi apchïsha allinnin bïnuctam upyachilapis.

15“Ñatac Jesurunca

imaypis mana lisishan taytachacunaman,

chayllala ćhämuśhä muśhü taytachacunaman,

awquilluyquicuna mana alawaśhan taytachacunamanmari uycapäcula.

18Camaśhüniqui aꞌacäpïta unꞌälälinquimá;

cawsayta uśhüniqui Tayta Diospïta unꞌälälinquimá.

19“Chaynüta licälulmi Tayta Dios sumä piñacüla;

jinalmi walaśh wamla chulincunapïta muyuculcula.

20Chaymi nin: ‘Paycunapïta pacacuycuśhäña;

má imanuyshi camacapäcunꞌa.

Rasunpa pasaypi mana allin nunacunamari,

mana chalapacuna chulicunamari.

21Amcunamari mana rasun Diosta alawayniquiwan sïlacayalcächimanqui;

mana bälï taytachacunawanmari piñayalcächimanqui.

Chaymi yaꞌapis mana rasun malcawan sïlacachishayqui;

mana tantiayniyu malcawanmari piñacuyman ćhulaśhayqui.

22Piñacuynïmi sumä-sumä walälun,

cay pachap śhunꞌuntapis lluymi lupälunꞌa.

Cay allpätapis lluy cusichantintam camacaycülunꞌa,

ulꞌucunäpa sapintapis walälunꞌam.

23Paycunamanmari mana allincunäta tawapaycüśhä;

flïchacunactapis paycunamanmi ćhächishä.

24Micuy wanawan, calur ishyaywanmi wañupäcunꞌa,

imaymana ishyaywanmi camacapäcunꞌa;

munti uywacunawan bininuyu culibrap

caćhüśhacunam wañupäcunꞌa.

25Chulincunapis cällicunäćhümi ispädawan wañupäcunꞌa;

wasincunaćhüpis manchacuycällam muyucunꞌa.

Müsu lasaccunäpis, ñuñücunäpis yulä

umacunäpis wañupäcunꞌam.

26Paycunacta caluman chiꞌichiytam pinsalá;

manaña yalpaśha cananpämi cay pachäpïta chincachiyta munalá.

27Ñatac ćhïnicücunäpa jamuyäcuynintam manchaculá;

jinaman nunatucuyninwan caynu ninanta manam munalächu:

“Lluy caycunacta Tayta Dioschu manam lulala;

yaꞌanchicmi munayninchicwan caycunacta lulalanchic” ’ nil.

28“Israel malca, amcuna pasaypi mana

yaćhayniyu, mana tantiayniyümi capäcunqui.

29Sïchuśh yaćhayniyüllapis capäculꞌa caycunacta tantiapäcunquimanmi;

imanuy camacapäcunayquitapis yaćhapäcunquimanmi.

30¿Imanuypatá walangantin nunacunacta jucllaylla aticaćhäla?

¿Imanuypatá ćhunca walangantin nunacunacta ishcaylla aticaćhäla?

Chaynu lulaycula wancanu licaycünin

Tayta Dios ćhïnicünincunacta maquinman ćhulaycamullaptinmá.

31Paypa wancanꞌa manamá Wancanchicnüchu.

Chaynu caśhanta ćhïnicüninchiccunapis yaćhanmi.

32Paycunap üba lantanpis Sodomap übanmi,

Gomorrap lantancunam;

übancuna bininuyü-camam,

rasimuncunapis pasaypi ćhacćhä-camam.

33Bininunpis culibraypa bininunmi;

culibraycunap sumä wañuchicü bininunnümari cayalcan.

34“Lluy caycunacta ćhulalayächïmi;

ćhaniyu pacactanümi pacalayächí.

35Yaꞌapam cutichicuycá; yaꞌami tincüninman uycuśhä.

Timpunćhümi ćhaquin lluchcälunꞌa.

Cäraycuśha canan muyunca jiꞌacaycayämunñamá;

üran ñaćhapacaycayämunñamari.

36“Malcan mana callpayüña cayaptin

Tayta Diosmi malcanta yanapaycunꞌa.

Callpasapacunäpis mana callpayücunäpis

manaña captinmi Tayta Dios uywaynincunacta llaquipaycunꞌa.

37Chayćhümi ninꞌa: ‘¿Mayćhütan canan taytachayquicuna cayan?

¿Mayćhütan pacacuśhayqui wancanu cäca cayan?

38¿Mayćhütan wira-cama uycapäcuśhayquip wilanta micü taytachayqui cayan?

¿Mayćhütá bïnu uycapäcuśhayquita upyäca cayan?

¡Payꞌari yanapäniqui śhalcamuchun!

¡Payꞌari pacaycüniqui śhamuchun!

39Cananꞌari licapäcuy yaꞌalla rasun Tayta Diosca caśhäta.

Yaꞌapïta manam juc Tayta Dios canchu.

Yaꞌapa maquilläćhümi wañuchinäpäpis cawsachimunäpäpis,

dañädunäpäpis allinyachinäpäpis cayan.

Maquïpïta manamá mayanpis ayinmanchu.

40Yaꞌami janay pachäman maquïta pallalcul limalicú:

Rasunpa wiñay simpri cawsaśhänu,

41chipyayä ispädätam lïmäśhä;

cäraycunäpämi maquïćhu chalaläśhä.

Ćhïnicünïcunactam cutichicüśhä,

tincüninmanmi ćhïnimäcunäta uycüśhä.

42Flïchäcunam yawarwan shincacalälinꞌa.

Ispädäñatacmi aychawan amïlunꞌa;

wañücunäpa, puśhaśhä cäcunäpa yawarninwan,

ćhïnicünïcunap puydïnincunap umancunawanmari amïlunꞌa’ nil.

43“Nasyuncuna, Tayta Diospa malcanwan cushiculcay.

Uyway nunancunap yawarninpïta paymi cutichicülunꞌa.

Ćhïnicünincunacta cutichicülunꞌamari;

paymá malcanta allpanta pampachaycunꞌa” nil alawäla.

44Chayurá Moisesmi Nunpa chulin Josuewan jinantin Israel caśhtacunäman lipäcul caynu alawacuywan niycälila.

45Chaynu taquicta Moises niyculmari jinantin malcäta nin:

46“Canan lluy nipäcuśhäman sumäta tantiaycäliy. Chaymi chuliquicunactapis cay camachicuyta niycuptiqui lulayman ćhulapäcunꞌa.

47Cay nishäcunaca amcunapä manamá yanꞌalchu; caycunapïmi cawsapäcunayquipis ütac manapis. Cayta uyaliculcalꞌa Jordan mayup chimpanćhu duyñuchaculcänayqui allpaćhu achca watam cawsaycälinqui” nil.

Limalicuśhan allpacta calullapïtam Moisesta licachin

48Chay muyunllam Moisesta Tayta Dios nin:

49“Abarim läduman liy; jinal Nebo ulꞌuman ishpiy. Chaymi cayan Moab lädućhu Jericopa chimpanćhu. Chaypïtam Israel caśhtacunäta uycuná Canaan allpacta licanqui.

50Chay ulꞌu ishpishayquićhümi wañucunqui. Jinalmi awquilluyquicunawan juntunacamü linqui, wawꞌi-caśhayqui Aaron Hor ulꞌüćhu wañucul awquilluyquicunawan juntunacuśhannu.

51Awari, Zin chunyäcäćhu, Cadesćhu cä Meriba mayućhu, israelcunäpa puntanćhümari ipanchapämälanqui; manamá altuman julapamälanquichu.

52Chaymi Israel caśhtacunäta uycuná allpaman manaña yaycunquichu. Calullapïtañamari licanqui” nil.