Jeremias 6 - Old Testament Quechua Wanca（QVW）

Jerusalentawan Juda läducta camacaycünanpämi willacun

1“ ‘Benjamin ayllucuna, pacacalcämuy; Jerusalenpïta ayipäcuy.

Tecoa malcaćhu curnitillacta tucapäcuy.

Bet-haquerem malcaćhu

juc siñalta śhalcachipäcuy.

Nurti lädupïmi jatun mućhuchicuy,

sumä ñacaycuna śhacayämun.

2Cuyayllapa cä tuquish Siontam camacaycüśhä;

3Sionpa cuntranmi uwish michïcuna

uwishnintin-uwishnintin śhapämuśhannu

pilyänintin-cama śhapämunꞌa.

Muyülïninćhümi carpancunacta śhalcachipäcunꞌa;

partinta-camamá chalacaycälinꞌa.

4Paycuna nipäcunꞌam:

“Paycunawan pilyapäcunayquipä allichaculcay.

Ćhawpi muyunmi camacaycüśhun.

Ñatac intica jiꞌacuycuyanñam;

tutäpis jananchicćhüñamá cacuyan.

5Chayurá tutanpaña yaycüśhun;

murällancunacta camacaycämuśhun” ’ ” nil.

6Sumä munayniyu Tayta Diosmi nin:

“Ilucunacta cuchuchimuy;

Jerusalenman yaycunapä murällap ipanman allpacta juntumuy.

Cay malcaćhu lluy ñacachïcunallañamari cayan;

cay malca mućhuycachishañamá canꞌa.

7Maynümi pucyupi yacuca yalayämun;

chaynümá Jerusalenpïta mana allinca imaypis yalayämun.

Suwacuycunalla, mana allin lulaycunallamari chayćhu cayan.

Dañädüśha cäcunallactawan ishyäcunallactamá licayá.

8Jerusalen, tantiacuyñari;

mana tantiacuptiquiꞌa ampïta japächacuśhämi.

Mana uyalicamaptiquiꞌa yanꞌalätac camacaycülucman,

yanꞌalätac chunyä allpaman muyüchicman” nil.

9Sumä munayniyu Tayta Diosmi nin:

“Maynümi üba cusichaćhu

quïdäcunäta ashipalpälin,

chaynümari quïdä israelcunätapis

lluy-lluy ashipalpälälinꞌa” nil.

10Nimaptinmi yaꞌa nilá:

“¿Mayan uyalimänanpämá willacuśhä?

¿Mayantamá anyapäśhä?

Linlin quillpäśha cayaptinmari mana uyalipäcunchu.

Tayta Diospa yaćhachicuyninta jamuyapäcunmá;

uyaliycuytapis manamá munapäcunchu.

11Yaꞌañatacmi Tayta Diospa

piñacuyninta willaycunäpä cayá.

Chayta manamá upälla uywacümanchu” nil.

Niptïmi Tayta Dios niman:

“Piñacuynïtam caminucunäćhu

awsä urucunällaman jillpuycüśhä,

chaynütac juntunacüśha cä müsucunämanpis.

Wayapapis walmipis, awquishpis sumä

awquishyäśhaña cäcunäpis prïsu puśhaśhamá capäcunꞌa.

12Ćhaclancunapis, wasincunapis,

walmincunapis jucpäñamá quïdapäcunꞌa.

Cay jinantin allpäćhu cäcunämanmari

maquïta ćhulaycuśhä.

Yaꞌa Tayta Diosmari niyá.

13“Uchuyllapis jatunpis

mana allincäwan lägacuycunallactamá ashiyalcan.

Willacücunäpis aśhta sasirdüticunäpis

ingañacuycällactañamá jicutayalcan.

14Malcäpa dañäduncunacta janä-janällantamá jampicaćhaycälin.

Jawcayay manaña cayaptinpis:

‘Jawcalla caycuy, jawcalla caycuy’ niyalcanmá.

15¿Chay pasaypi millachicuy lulapäcuśhancunapïta

pinꞌaculcanchun imatá?

Manamari uchuyllapis pinꞌacuynin canchu;

pinꞌacuy imanuy caśhantapis manamá yaćhapäcunchu.

Chaymi lawćhaycunäcäćhu palpupäcunꞌa;

mućhuycachiptí camacaycüśha capäcunꞌa.

Yaꞌa Tayta Diosmari niyá” nil.

Israel lädu mana cäsucuśhanpïtam nin

16 Tayta Diosmi malcanta nin:

“Caminu tincupuläcäćhu śhaycacaycälilꞌari,

allin punta caminucta licaycäliy.

Chay punta allin caminupi tapuculcal chayninpä pulipäcuy.

Chaypa lipäculmi

allin jamaycuyta talipäcunqui.

Amcunañatacmi: ‘Chayninpa manam lipäcümanchu’ nipäculanqui.

17“Yaꞌañatacmi täpäcunacta amcunapä ćhulaycul:

‘Curnitilla tucaśhanta sumäta uyalipäcuy’ nilá.

Amcunañatacmi ichá:

‘Manam uyalicuyta munapäcüchu’ nipäculanqui.

18“Chayurá nasyuncuna uyalipäcuy;

malcallay, sumäta tantiapäcuy ima pasaśhunayquitapis

19Jinantin allpa sumäta uyalimay.

Cay malcämanmi mana allinta apayämú;

mana allin lulaynincunap wayuynintamari ćhasquiycälinꞌa.

Limapäśhätapis manamá uyaliculcanchu;

yaćhachicuynïta licaytapis manamá munapäculachu.

20¿Imatá ucaman Saba lädupïta insinsiu apamuśhayquicunaca?

¿Imatá ucaman calu-calupïtalä tuqui aśhnä śhuꞌuśhcuna apapämuśhayquicunäpis?

Uycapämäśhayquicunaca manañamá śhunꞌüpänüñachu;

cañaywan uycamäśhayquicunaca manañamá munaynïpänüñachu.

21“Chaymi cay malca cućhpananpä

mitcacacunacta ćhulaycuśhä;

chayćha taytapis chulintin cućhpapäcunꞌa;

bisinunpis apanacuśhanwan camacaycüśha capäcunꞌa.

Yaꞌa Tayta Diosmari niyá” nil.

Nurti lädupi śhamunancäpïtam nin

22 Tayta Diosmi nin:

“Licapäcuy, nurti lädupïmi pilyäcuna śhacayämun.

Cay allpap manyancunapïmi sumä munayniyu nasyun śhalcämun.

23Flïchancunawan,

lansancunawanmi śhacayalcämun.

Mana llaquipayniyu juyu-camamá caculcällan.

Cawalluncunaman sillacälälisha śhapämuptin

lamarcäpa suynayninnümá suynaynin.

Sion nunacuna, juc nunanüllamá cuntrayqui śhacayalcämun” nil.

24Niptinmi Jerusalenćhu nunacunaca nipäcun:

“Sumä-cama capäcuśhanta uyalïlulmi

pasaypi mana callpayu licalïlälí.

Patayu walmip dulurninnümá

llaquicuyca ñiticalpäliman.

25Ćhaclacunäman amaña yalupäcuychu.

Caminunninta amaña pulipäcuychu.

Ćhïnicüniqui ispädantin listumá cacuyan;

manchacuyllañamá mayćhüñapis cacuyan.

26“Malcamasïcuna, shicacü müdanawan ćhulaculcay;

ućhpaćhu ućhpipäcuy.

Japallan wawin wañupacüśha walminu apalcaćhapäcuy;

camacaycüca janayquićhüñamari cacuyan” nil.

27Tayta Diosmi niman:

“Amtam, malcäćhu täpänu,

licänu canayquipä ćhulayculac.

Paycuna imanuy capäcuśhantapis

yaćhaycunayquipämari ćhulayculac.

28Paycuna pasaypi cullu linli-cama,

tumpacuycunallawan juntäśha-camamá cayalcan.

Brunsinu, jïrrunu capäculmá,

pasaypi mana allincällaćhu cayalcan.

29Má, jïrrucunaca chuya cananpämi

ninawan chulluchinchic.

Ñatac paycunap mana allinnin mana yalucäliptinꞌa

yanꞌal-yanꞌalñam chulluchïcäpis chulluchin.

30Paycunacta ‘wicapäśha illay’ nipäcunꞌañamá;

Tayta Diospa wicapäśhanñamari cayalcan” nil.