2 Reyes 16 - Old Testament Quechua Wanca（QVW）

Juda lädućhu Acazmi mandacun 2Cro 28.1-27

1Israel lädućhu Remaliaspa chulin Peka ćhunca anćhishniyu (17) wataña mandacuyaptinmi Juda lädućhu Jotampa chulin Acaz mandacuyta allaycula.

2Ishcay ćhunca (20) watanta liyalmi mandacuyta pay allaycula. Paymi ćhunca sütayu (16) wata Jerusalenpïta mandacula. Ñatac Tayta Diospa puntanćhu awquillun Davidnüchu manamari allincunäta lulaycula.

3Aśhwanpa Israel lädup mandänincunap mana allin lulaynincunactamari atichila. Jinalmi chay malcayu nunacuna millachicuy lulaśhancunactanu paypis chulinta taytachaman cañaycapula. Chay Israel läducunäpa ñawpäninpïta Tayta Dios alapacuśhan nunacunänümari cay nunacunäpis lulapäcula.Deut 12.31.

4Chaynütacmi ulꞌucunäćhu cä uycunacunäćhu, ulꞌunpalcücunäćhu, pallaysapa sumä lantacunäpa lulïnincunaćhüpis uycapäcula, insinsiucunactapis cañaycapäcula.

5Chay timpum Siriap mandacünin Rezinwan Remaliaspa chulin Israel lädup mandacünin Peka lipäcula Jerusalenta Acazwan pilyä. Chaynu cunćhalayalcalpis mandacü Acazta manamá llalliyta atipapäculachu.Isa 7.1.

6Chay timputacmi Edom lädup mandacünin nasyunninpä Elat malcacta cutichicula. Chay Elat malcaćhu cä Juda lädu nunacunätá alapacülamá. Jinalculmi Edom nunacunaca canancama chayćhu yaćhayalcan.

7Jinaptinmi Acaz caćhala Asiriap mandacünin Tiglat-pileserman willacünin caynu nimunanpä: “Cay nunallayqui chuliquinümi callá. Chayurá camacaycämänanpä cä Siriap mandacüninpïta, Israel lädup mandacüninpïta libraycallämayꞌari” nil.

8Chaynütacmi Tayta Diospa alawana wasinćhu, palasyunćhu cä illaycunäta, ürucunäta juntuycul Asiriap mandacüninman rigalaycunanpä apachila.

9Asiriap mandacüninñatacmi mañacuyninta uyaliycul Damasco malcacta camacaycunanpä śhamula. Chayćhümi llallilcul mandacünin Rezinta wañüchin, lluy nunacunätañatac Kir malcaman prïsu puśhaculcan.

10Chaypïta Asiriap mandacünin Tiglat-pileserwan tincunanpä Damasco malcaman Israel lädup mandacünin Acaz lilmi chayćhu uycuna patac imanuy caśhantapis licala. Chaymi uycuna patac imanuy lulaśha cananpäpis juc plänucta sasirdüti Uriasman apachila.

11Chaynu Damasco malcapi mandacü Acaz plänu apachimuśhanmannümari lulaycula. Mandacüca Damascopïta manaläpis cutimuptinmi sasirdüti Urias lulayta camacäla.

12Chaymi mandacüca Damascopïta ćhaycamul uycuna patacta licälul chayman aśhuycul uywacta uycula.

13Jinaman ćhacla micuy uycuśhanta, cañaywan uycuśhantapis jićhaywan uycuywanmi uycula. Chaynütacmi allin cawsaśhanpi uycunanpä uycuśhancunäpa yawarninwanpis uycuna patacman chächuycula.

14Ñatac Tayta Diospa alawana wasinpa puntanćhu brunsipïta cä uycuna patactamExo 27.1-2; 2Cro 4.1. muśhü uycuna patacpa nurti lädunman ćhuläla. Chayurá ishcaynin lädup ćhawpinćhümi cayäla.

15Chaypïtam sasirdüti Uriasta mandacü Acaz nin: “Cay sumä uycuna patacćhümi cañaywan uycuyta wälanpa tardinpa uycunqui. Jinaman mandacücäpa ćhacla micuy uycunanta, cañaywan uycunantapis uycunqui. Chaynütac nunacunäpa uycapäcuśhanta, cañaywan uycapäcuśhanta, jićhaywan uycapäcuśhantapis chayćhümi uycunqui. Lluy uycapäcuśhancunap, cañaywan uycapäcuśhancunap yawarnintañatacmi uycuna patacman chächuycunqui. Ñatac brunsipïta uycuna patacmi ichá Tayta Dioswan yaꞌa limanäpä canꞌa” nil.

16Chaynu mandacü Acaz nishanmannüllam sasirdüti Urias lluy lulaycula.

17Chaypïtam mandacü Acaz maqui päcunap täcunan tablacunäta juluchila. Chaynütac brunsipïta luläśha wäcacunäpa jananćhu1Rey 7.23-39; 2Cro 4.2-6. cä istanquictapis juluchila. Jinalculmi lumiwan impidräśha cä pampäman ćhulachila.

18Jinaman Asiriap mandacüninpa śhunꞌunpänu cananpämi Tayta Dios alawana wasinćhu jamana muyunćhu jamananpä cä cuartup atacunta julächila. Chaynütac mandacücäpa yaycunan puncuntapis julächilamari.

19Ñatac Acazpa mandacuyninćhu lluy lulaśhancuna Juda lädu mandacünincunap isquirbishan librunćhümi cayan.

20Mandacü Acaz wañucuptinmiIsa 14.28. awquilluncuna pampaläśhan Davidpa Malcan nishanman pampälälila. Paypa pudirnin chulin Ezequiasñamá mandacüca cala.