Job 33 - Old Testament Quechua Wanca（QVW）

Eliumi Jobta anyapan

1“Chayurá Job, cay nishäta uyalimay;

limaśhäta sumäta uyaliycuy.

2Shimïta quićhaycüñam,

limayta allacuycüñam.

3Allin śhunꞌüpïmi limayní yalaycamun;

rasuncällactam allú limaycamun.

4Tayta Diospa Ispiritunmi lulaycamäla;

Sumä Munayniyücäpa jäcaycuyninmi cawsaycachimäla.

5Canan má, Tayta Job, atipalꞌa limalimuyꞌari;

niycamänayquipä alistacuy.

6Tayta Diospa ñawpäninćhuꞌa ampis yaꞌapis chay cuscallam canchic;

allpäpïmá yaꞌapis lulaśha calá.

7Chayurá manam imapi manchacamänayqui canchu;

manamá imanaśhayquipischu.

8“Am caytanümá nilanqui,

cananpis caytanu nilcuśhayquitam uyalilcú:

9‘Chuya, mana juchayümi cá;

ima mana allintapis manamá lulayculächu.

10Chaynu cayaptïpis Tayta Diosꞌa juchachaycamanmi;

ćhïnicüninpämi licaycaman.

11Cadinawanmi ćhaquïtapis watäman;

mayćhu pulishätapis licapayämanmi’ nil.

12“Má, chaynu nishayquiwanꞌa pantäśham cayanqui;

Tayta Diosꞌa nunacunäpïta mas munayniyümá.

13¿Imapïmá paywan chalanacuyanqui?

¿Ampa tapucuyniquicunacta niycuśhunayquilächun imatá?

14Tayta Diosꞌa imaymanapmari limapaycamanchic.

Ñatac nunaca manamá tantianchicchu.

15Waquinćhuꞌa suyñuyninchicpam willapämanchic;

jucćhuꞌa puñuptinchicmi licachimanchic

ütac wañüśha puñuyaptinchic,

ütac pasalpüśha puñuyaptinchicpis.

16Payꞌa linlillanchicćhümi limapaycamanchic;

anyapaycuyninwanmá manchachimanchic.

17Chaynu lulaycun mana allincäpi japächaycamayninchicwanmá;

nunatucuyninchicpi japächaycuyninwanmari.

18Chaynüpam wañuycäpi salbaycamanchic;

chaynüpam ispädapi libraycamanchic.

19“Waquinćhuꞌa ishyaycunawanmi mućhuycachimanchic,

tullunchiccunaćhu sumä-sumä nanaycunawan.

20Chaymi ima micuytapis millachicunchic,

sumä mishquinnin micuytapis ćhïnicunchic.

21Jinaptinmi masta-masta aychanchic chaquilpuyan;

tullunchiccunapis camalayanñam.

22Cawsayninchicmi wañuycämanña jiꞌacuycuyan;

cawsayninchicmi wañuycäpa patanćhüña cayan.

23“Ñatac walanganpi cä anjilcunäpi jucllayllapis

llaquipaycul allin cawsä nuna caśhanta limalcamuchun,

24llaquipaycunanpä Tayta Diosta ruygacapuchun:

‘Wañunanpïta salbaycullay;

pudirninta taliycüñam’ nil.

25Jinaptinmi aychanpis walaśhpanülä caycunꞌa;

müsu caśhannülä caycunꞌapis.

26Tayta Diosta mañacuptin uyaliycunꞌam;

sumä cushicuywanlämi paywan tincuycunꞌapis.

Payꞌa allin caśhanmanmi cutiycachinꞌa.

27Jinaptinmi lluypa puntanćhu ninꞌa:

‘Juchapaculämi, mana allincätam lulayculá.

Ñatac payꞌa tincünïmanchu manamá mućhuycachiman.

28Aśhwanpa wañuycäpïmi salbaycaman.

Canan acchïta licaycülämi’ nil.

29“Chaynümi Tayta Dios cutipalcul-cutipalcul

nunacunäwan lulaycun.

30Wañuycäpi salbaycun,

acchi cawsaycäta licaycunanpämari.

31“Job, sumäta uyaliycamay;

limaśhäcama upälla tuquicta uyaliycuy.

32Juchannä rasunpa caśhayquita yaćhaycuytam munayá.

Imapis ninayqui captinꞌa, má niycamayꞌari.

33Imapis mana ninayqui captinñatacmi ichá upällalla uyalimay.

Yaꞌami yaćhayniyu cayta yaćhachishayqui” nil.