Jeremias 17 - Old Testament Quechua Wanca（QVW）

Juda läductam juchanpïta mućhuchin

1Tayta Diosmi nin:

“Juda lädup juchan lumi śhunꞌunćhu jïrrupi cä sinsilwan,

diamante aläja lumip puntanwannülämi isquirbïsha cayan.

Chay juchancuna uycuna patacpa

wäla-niläninćhüpis isquirbïshamari cayan.

2Chulincunapis yalpalayalcanmá

lapisapa lantacunap lulincunaćhu cä

mamacha Aseracta,

altu ulꞌucunäćhu cä uycuna patacnincunactapis.

3Ćhaclacunäćhu ulꞌucunäćhu cäcunätapis yalpalayalcanmá.

Chay jinantin altu ulꞌuyquicunaćhu

juchaculcäśhayquipïmá lluy cäniquicunacta,

illayniquicunacta suwapäcuśhunayquipä camachishä.

4Uycuśhá allpa tücäniquitapis caćhaycapäcunquimá.

Jinamanꞌa mana lisipäcuśhayqui nasyunćhümá

ćhïnicüniquicunap uywaynin capäcunqui.

Chaynu capäcunqui sumä mana wañucälil

wiña-wiñaypä walayä lupayä ninanu cä

piñacuynïta śhalcachipäcuśhayqui-laycumá” nil.

5 Tayta Diosmi nin:

“Nuna-masillanman chalapacücá mana allinpä licaśhamari canꞌa.

Nunacunallap callpallanman chalapacücá mana allinpä licaśhamari canꞌa.

Śhunꞌun yaꞌaćhu mana cäcunacá mana allinpä licaśhamari canꞌa.

6Chay nunaca chunyäcäćhu wiñä jaćhanümá canꞌa.

Allinca ćhämuptinpis manamá licanꞌachu.

Aśhwanpa chaqui chunyäcäćhu cä jaćhacunänümari cacunꞌa;

mana mayanpis yaćhaśhanćhu pasaypi allpaćhu jaćha wiñäcänümá cacunꞌa.

7“Yaꞌa Tayta Diosman chalapacamäcäñatacmi ichá

allinpä licaycuśha capäcun;

yaꞌallaćhu alcaycücá allinpä licaycuśhamari cayalcan.

8Chaynu nunaca mayup patanćhu

lantäśha lantanümá cayalcan.

Yacu lulinman sapichacüśha lantanümá cayalcan.

Lupayca ćhämunantapis manamá manchacunchu.

Lapincuna imaypis birdi-birdillamá cayan.

Usya timpućhüpis manamá awinchu

nï wayuytapis śhaycunchu.

9“Má, nunap śhunꞌunꞌa pasaypi artishmá cayan;

lluy imapïpis sumä mana allinninmá cayan.

¿Mayanllá nunap śhunꞌunta lisiycunmanmá?

10Yaꞌa Tayta Dios nunacunäpa pinsaśhanta lisiycüca,

nunacunap śhunꞌunta tantiaycücämi ichá imanuy

cawsaśhanmannu-cama tincüta uycuśhä,

lulayninmannu-cama tincüta pägaycuśhä” nil.

11Ingañacuyllawan rïcuyä nunacá,

jucpa luntunta üllayä culluśhcänümá cayan.

Callpanćhülä cayaptinmari lluy cänincuna caćhaycülunꞌa;

wañucunan jiꞌacaycayämuptinꞌa pasaypi luclu wacchanüñamá camacanꞌa.

12Tayta Diosllay, am caśhayqui alawana wasica sumä allinmá.

Allaycuyninpïpis sumä-sumämá cayan.

13Israelpa chalapacuśhan Tayta Diosllay,

ampi japächacücunaca pinꞌayćhümá capäcunꞌa.

Cawsayta uycü pucyunu cä, am Tayta Dioslläta

caćhaycuśhuśhayquipïtamari

ñutu allpallaćhu śhutin isquirbïsha cayaptin chincacücänu capäcunꞌa.

14 Tayta Diosllay, jampiycamaptiquiꞌa allinyaycuśhämi.

Salbaycamaptiquiꞌa salbacuśhämá.

Amllamari alawaycuná canqui.

15Nunacunaca asipalcul-asipalculmi nipäman:

“¿Imayñatá Tayta Diospa willacachimuśhancunaca pasanꞌa?

Jucllañari lulacacuchun” nil.

16Chaynu niyalcämaptinpis mućhuycachinayquipächu

yaꞌa manamá mañaculac.

Nïtac paycunapä ñacay timpucuna

śhamunantapis manamá munalächu.

Am tuquictamari yaćhanqui ima nishätapis;

ampa ñawpäniquićhümari niläpis.

17Amari manchachimaychu.

Ñacaycunaćhu cayaptí pacaycünïmari am caycunqui.

18Aticaćhamänïcunactá pinꞌayman ćhulaycüluy.

Yaꞌactá amari pinꞌayman ćhulaycallämaychu;

paycunacta manchacuypi chucchüchiy;

yaꞌactá amari chucchuchillämaychu.

Paycunamanꞌari ñacaycunacta caćhaycüluy;

paycunactari lluy camacaycüluy.

Jamana muyunpïmi nin

19 Tayta Diosmi niman: “Juda lädup mandacünincuna yaycuśhan yalamuśhan puydï puncuman lilcul chayćhu śhäcuy. Chaynütac Jerusalenpa lluy puncuncunamanpis lilcul chayćhüpis śhäcuy.

20Chayćhümi ninqui: ‘Juda lädup mandacünincuna, Juda lädu nunacuna, Jerusalenćhu yaćhäcuna, cay puncunpa yaycücuna, Tayta Dios nishanta uyalipäcuy.

21Tayta Diosmi nin: Cawsayniquita licaculcay. Jamana muyuncäćhuꞌa ima cargactapis amaña apayalcayñachu; amatac Jerusalenpa puncunpapis yaycayalcächiyñachu.Neh 13.15-22.

22Jamana muyuncäćhuꞌa wasiquicunapi amam ima cargactapis julupäcunquichu nï ima lulaytapis lulapäcunquichu. Aśhwanpam awquilluyquicunaman nishänu jamana muyuncäta yaꞌapä japächaycälinqui.Exo 20.8-10; Deut 5.12-14; Isa 58.13-14.

23Chay awquilluyquicuna manamá cäsucalcämälachu nï uyaliycälimälachu. Aśhwanpam cullucaycälil mana uyalïtucamälachu nï ćhasquïtucalcämälachu.

24“ ‘Tayta Diosmi nin: Yaꞌa nishäta rasunpa uyaliculcal, jamana muyuncäćhu ima cargactapis malcap puncunpa mana apaycul, jinaman jamana muyuncäta yaꞌapä japächaycul ima lulaytapis mana lulapäcuptiquiꞌa,

25mandacücunapis puydïnincunapis cay malcap puncunpa imaypis yaycapäcunꞌa yalapämunꞌam. Cay Jerusalenćhu Davidpa milaynin mandacü imaypis dispächunćhu taycuycunꞌam. Mandacücunaca lluy yanapänincunawan carritacunaćhu jinaman cawalluman sillacälälisham pasapäcunꞌa. Paycunawantacmi Juda lädu nunacunäpis, Jerusalenćhu yaćhäcunäpis yaycapäcunꞌa. Cay Jerusalenćhu wiña-wiñaypämari yaćhapäcunꞌa.

26Chaymanmi śhapämunꞌa Juda lädup malcancunapi, Jerusalenpa muyülïnincunapi, Benjamin allpapi, Sefela lädupi, Neguevpi, Neguevpa ulꞌuncunapïtapis. Paycunam Tayta Diospa alawana wasinman cañaywan uycunacta, ćhacla micuy uycunacunacta, insinsiuctapis jinaman sulpäta ucuyninwan uycunacunactapis apapämunꞌa.

27Ñatac mana cäsucalcämal, jamana muyuntapis mana japächaycul Jerusalenpa puncuncunap cargacunacta apaycapäcuptiquiꞌa malcap puncuncunactamá cañaycüśhä. Chaymi Jerusalenpa palasyuncunapis lupälunꞌa. Chay nina walayäca mana wañuchiyta atipanamá cacunꞌa’ ” nil.