Salmos 106 - Old Testament Quechua Wanca（QVW）

Israelcunaca cullu linli capäcuśhantam nipäcun

1¡Tayta Diosta alawapäcuy!

Sumä allin caśhanpïta Tayta Diosta sulpäta uycapäcuy.

Llaquipäcuynin wiña-wiñaypämá.

2¿Mayantá Tayta Dios sumä lulaycuśhancunäta willaycuyta atipanman?

¿Mayanmá tincüninman alawaycuyta atipanman?

3Maynu cushicuymi allin tincüllanman lulaycücunäpá.

Maynu cushicuymi imaypis allin cällanman licaycücunäpá.

4 Tayta Diosllay, malcayquita llaquipaycul yalpalcallämay.

Salbanayquipä śhamulꞌari yalpalcallämay.

5Chayćha aclaśhayquicunap allin lulayninta licayculläśhä,

malcayquip cushicuyninwan cushiculläśhä,

nunayquicunawanpis alawaycälilläśhayqui.

6Taytäcunanümari yaꞌacunapis juchacta lulälälillá.

Mana allincunactamá lulälälí; juyu-camamá capäculá.

7Awquillücuna Egiptoćhu cayalcalpis

sumä-cama lulayniquicunacta manamá tantiapäculachu.

Ancha-anchap llaquipaycuśhayquitapis manamá yalpalcälilachu.

Aśhwanpamá Puca Lamarćhu cuntrayqui śhalcälälila.

8Chaynu captinpis Tayta Diosñatacmi salbaycula

śhutinta allinpä licachicuyninwan, munayniyu caśhanta tantiananpä.

9Millapayllanwanmá Puca Lamarcäta chaquïchila.

Chay luli wayunpamá chaqui allpapnu chimpaycachila.

10Chaynüpamá ćhïnicünincunap maquinpïta salbaycula.

Chaynüpamá cuntrapartincunap munayninpïta juluycula.

11Ćhïnicünincunactañatacmi ichá yacuca ñitïla.

Manamá licachillapäpis cawsayniyu quïdayculachu.

12Chaylämá Tayta Diospa limalicuśhanman

awquillücuna chalapaculcäla.

Taquicunawanmá alawapäcula.

13Ñatac ishcay quimsa muyunpïtá,

Tayta Dios lulaycuśhancunäta unꞌälälilañamá.

Tayta Dios imacunacta limapaycunantapis manañamá alcaycälilachu.

14Chunyäcäćhümi śhunꞌunpa munaśhallantaña

uycunanpä Tayta Diosta jicutapäcula.

15Payñatacmi mañaculcäśhancunäta uycula.

Jinaman wañuy ishyaytamá paycunaman ćhaycachila.

16Chay jamapäcuśhancunaćhüpis Moisespïtamá imbidiculcäla.

Tayta Dios japächaycuśhan Aaronpïtamá imbidiculcäla.

17Chaymi allpaca quićhacacülul Datanta millpucalpula.

Abiramtapis atïnincunactawanmá chincacaycachila.

18Chaynütacmi ipanchäcunämanpis nina latäla.

Chay juchasapa juyu nunacunätamá ninaca lupäla.

19Horeb ulꞌućhümá uña wäcactanu taytachacta lulälälin.

Chay luläśha taytachamanmá unꞌulacaycälin.

20Sumä cä Tayta Diosta caćhayculmá,

chaynu jaćha micü wäca taytachaman muyucalcälila.

21Salbaycünin Tayta Diostá unꞌälälilamá.

Egiptoćhu sumä-cama lulaycunacta lulaycücätá unꞌälälilamá.

22Cam nishan allpaćhu milagrucunacta lulaycücätá,

Puca Lamarćhu sumäcunacta lulaycücätá unꞌälälilamá.

23Tayta Diosñatacmi camacaycünanpä cacuyäla.

Jinaptinmi aclacuśhan Moises ćhawpićhu śhaycucuycul

Tayta Diospa piñacuyninta pasächila, manaña camacänanpä.

24Tayta Dios limalicuśhanman mana chalapaculcalmá

sumä tuqui-tuqui allpacta jitapäla.

25Chucllancunaćhümari jamuyapäcula.

Tayta Diostamá mana uyalïtuculcälachu.

26Jinapäcuptinmi chunyäcäćhu camacaycünanpä

maquinta chacchalcul limalicula,

27juc nasyuncunaman malcan uyshuycälinanpä,

jinantin malcacunäman chiꞌichisha capäcunanpä.

28Baal-peor taytachap sirbïninmanmá muyucalcälila.

Mana cawsayniyu taytachacunaman uycuśhancunätamá micapäcula.

29Mana allin lulaynincunawanmá Tayta Diosta piñachipäcula.

Jinaptinmi paycunaćhu juyu ishyay sumä timpula.

30Finees nunañatacmi allin tincüninman lulaycula.

Chaylämi juyu ishyayca śhaycüla.

31Chaylämi chuyapä Tayta Dios licaycula,

imaycamapis lluy milaynincunaćhu yalpaśha cananpä.

32Meriba yacućhümi Tayta Diosta piñälächila.

Chaymi Moisespa cawsayninpä sasa-sasa cacula.

33Chaynu cullu linlicuycul alli-allicta piñachipäcuptinmá

shimin chalaśhantaña Moises limäla.

34Jinaman Tayta Dios chincachipäcunanpä

nishan malcacunätamá paycuna mana camacaycülachu.

35Aśhwanpamá chay mana allin malcacunäwan

jucllachanacuycul mana allin lulaynincunactaña lulayta atichipäcula.

36Taytachancunactamá alawapäcula.

Chaycunamá cunca cuchuynin caycula.

37Wamla walaśh chulincunactapis

Achatucunäman uycälinanpämá wañuchipäcula.

38Mana juchayücunap yawarnintamá jićhapäcula.

Mana juchayu chulincunactamá wañuchipäcula.

Canaan lädu taytachacunamanmá uycapäcula.

Chay yawarwanmá allpaca juchayu licalïla.

39Chay mana allin lulaynincunawanmá anlatacälälin.

Chaynu lulaynincunawanmá waticacälälin.

40Chaymi Tayta Dios malcanpä sumä-sumä piñacüla.

Tücänin malcanta millachicülañamá.

41Juc nasyuncunap munayninmanñamá jitaycüla.

Ćhïnicünincunap maquinćhüñamá capäcula.

42Ćhïnïcünincunamá ñacachipäcula.

Paycunap munayninmanmá uyshuycapäcula.

43Tayta Dios achca cuti libraycuyaptinpis,

paycuna manamá cäsuculcälachu.

Chaymá juchancunapïta uyshulächisha capäcula.

44Chaynu llaquillaćhu capäcuśhanta licalmi,

jinaman ayaycaćhapäcuśhanta uyalilmi,

45paycunaman limalicuśhanta Tayta Dios yalpäla.

Sumä-sumä cuyacuyniyu cayninwanmá

paycunacta llaquipaycul mana camacayculachu.

46Ćhïnicünincunap maquinćhu cäcunätapis llaquipaycunanpämá

ćhïnicünincunap śhunꞌunta llampuchaycula.

47 Tayta Diosnillay, salbaycälillämay.

Lluy nasyuncunäpi cutiycälichillämay,

chuya śhutiquita alawapäcunäpä, cushisha altuman julaycälinacpä.

48¡Israelpa Tayta Diosnin wiña-wiñaypä

allinpä licaśha cachun!

Jinantin malcaca: “Chaynu cachun” nil nipäcuchun.

¡Tayta Diosta alawapäcuy!