Numeros 11 - Old Testament Quechua Wanca（QVW）

Israel caśhtacunaca quijaculcäśhanpïtam nin

1Juc muyunmi Israel caśhtacunaca ñacaynincunapïta Tayta Diospa cuntran limapäcula. Chaynu limaśhanta Tayta Dios uyalïlulmi sumä piñacülul ninacta caćhalpaycamul jamapäcuśhanpa muyülïninta camacaycüla.

2Jinaptinmi malcaca waꞌaśhtin Moisesta ruygaculcäla. Jinaman Moisespis Tayta Diosta ruygacuptinmi ninaca lluy wañüla.

3Chaynu Tayta Diospa ninan paycunacta lupäluptinmi chay sityucta Tabera nipäcula.

4Chay Israel caśhtacunäman juc caśhtacuna yaycamücunämi micuyllapi wañupacuyalcäla. Paycunawan apachiculculmi Israel caśhtacunaca waꞌashtin nipäcula: “¡Mayanćha aychacta uycamachwan!

5Mayćhülä Egiptoćhu dinbaldilla micuśhanchic challwaca cayan. Chaynütacmi pipinup, duraśhnucunap, pürucunap, sibuyllacunap, äjuscunap janallanćhu caculanchic.

6Ñatac cananꞌa micuypïmi wañuyanchic. Cananꞌa cay Maná nishancällactamá walan-walanpis licayanchic” nil.

7Chay “Maná” nishan micuyca culandrup mujunnümi cala; culurninñatacmi bedelio nishannu tunꞌuśh cala.

8Chaytam malcaca pallamü yalapäcula. Jinalculmi aꞌalcul ütac iyalcul juc mancaćhu yanupäcü cala ütac tantactapis lulapäcü cala. Aśhnayninpis muśhü wamä yalamü asaytinümi cala.

9Chay jamapäcuśhancäman tutap śhullipämuptinmi Maná nishanca licalimü cala.

10Chaynu yaćhaśhancunap puncunćhu ayllucunaca waꞌaśhantam Moises uyalïla. Chaynu jinapäcuśhanmi Tayta Diospa piñacuyninta sumä-sumä walächila. Moisespis mana allinpatacmi licala.

11Chaymi Tayta Diosta Moises nin: “¿Cay uywayllayquita imapïmi mana allinpä licamanqui? ¿Imapïmi mana llaquipaycamanquichu? ¿Imapïmi jinantin malcäta yaꞌap janäman ćhulaycämunqui?

12¿Yaꞌapa waćhacuśhächun ñuñucuśhächun imamá, unay awquilluncunap limalicuśhayqui malcaman malacuśhalä ćhäyächinäpä?

13¿Yaꞌa maypïmi caychica nunapä aychacta julämuśhä? Awćhuśhtinmi yaꞌaman śhapäcamun: ‘Micapäcunäpä aychacta upämay’ nil.

14Caychica nunawan yaꞌa japallá manam atipämanchu. Yaꞌallapá ancha-anchap sasam.

15Caynu jinalla ñacayta pasachimänayqui captinꞌa ama chaynu callaychu, wañüchimayña. Llaquipaycamaptiquiꞌa cay sasa ñacaycunäpi jamacümanñaćh” nil.

16Niptinmi Tayta Dios nin: “Jinantin Israel caśhtacunäpi anćhish ćhunca lisishayqui puydï yaśhancunacta juntuycuy. Jinalcul tincuna carpap puncunman puśhay, amwan cusca alcapäcunanpä.

17Chayman yaꞌa jiꞌalpalcamulmi amwan limaśhä. Chayćhümi amćhu cä ispirituyquipïta paycunaman ćhulaycuśhä, yanapäśhunayquipä. Chayćha malcaca japallayquip janällayquićhüñachu nï caycunꞌa.

18“Malcätañatacmi ninqui: Waꞌapäcuśhayquitam Tayta Dios uyaliycun. Chaymi wälapä chuyanchaculcanqui aychacta micapäcunayquipä. Amcunamari waꞌaśhtin Tayta Diosta nipäculanqui: ‘¡Mayanćha aychacta uycamachwan! ¡Egiptoćhuꞌa imapapis janallanćhümi calanchic!’ nil. Chaymi Tayta Dios canan aychacta uycapäcuśhunqui micapäcunayquipä.

19Manamá juc, ishcay, picha, ćhunca, ishcay ćhunca muyuncunallachu micapäcunqui.

20Sinuꞌa quillantinmi micapäcunqui aśhta cunca tunäcama, millachiculcänayquicama. Caynu canꞌa amcunawan cayä Tayta Diosta jitapapäcul ‘imapälä Egiptopi yalamulanchic’ nil waꞌapäcuśhayquipïmari” nil.

21Niptinmi Moises: “Cay malcaćhu süta paćhac walanga (600,000) cayalcá wayapanllanlämari. ¡Chaychun quillantinmi aychacta micapäcunqui niyämanquimanlä canpis!

22¿Mayćhümi chaychica nunapä wäcapis, uwishpis ćhipinapä canman? ¿Camanmanchućh lamarcäpi lluy challwacta challwämuptinchicpis?” nin.

23Niptinmi Tayta Dios nin: “¿Tayta Dios uchuy munayniyüllachun imamá? Cananmi licanqui nishänu lulanäta ütac mana lulanätapis” nil.

Israelcunäpa anćhish ćhunca puydïnincuna Moisespa yanapänin cananpämi nin

24Niptinmi Moises malcäman lilcul Tayta Dios nishanta willala. Jinalculmi anćhish ćhunca puydï yaśhacunäta juntuycul carpap puncunćhu cachila.

25Chayćhu cayaptinmi Tayta Dios pucutaypa śhunꞌunćhu jiꞌalpalcamul Moiseswan limala. Chayćhümi Moisespa cä ispiritunta uycula chay anćhish ćhunca (70) puydï yaśhacunäman. Chaynu ispiritun paycunaćhu cayaptinmi Tayta Diospa willacüninnu limacuyalcan. Chaypïtá caynu manañam mastá pasalañachu.

26Ñatac Eldadwan Medad aclaśha cayalcalpis carpaman mana lipäculmi jamapäcuśhallanćhu quïdaculcäña. Chaynu mana liyalcaptinpis Tayta Diospa uśhan ispiritun paycunamanpis ćhämulam. Jinaptinmi chay caśhancäćhu Diospa willacüninnu limapäcula.

27Chayćhu juc walaśhñatacmi Moises caśhanman lilcul nin: “Eldadwan Medadmi Tayta Diospa willacüninnu jamapäcuśhanćhu limacuyalcan” nil.

28Niptinmi Moisespa yanapänin Nunpa chulin Josue nin: “Tayta Moises chaycunacta lulanantá mićhacuy” nil.

29Niptinmi Moises: “¿Yaꞌapi imbidicunquichun imatá? Maylä Tayta Dios ispiritunta malcantinman uycuptin lluypis willacü capäcunman” nin.

30Chaypïtam Moiseswan Israel yaśhacunaca jamapäcuśhanman caśhan cuticalcämula.

Tayta Diosmi llutucunacta licalichin

31Chaypïta Tayta Dios lamar lädupi waywacta talcächimuptinmi alli-alli llutucunacta apämula. Chaycunam jamapäcuśhanman lluy palpälälimul juc muyun pulinamannu maśhtacacälälila, altunmanpis juc mitrunümi cacula.

32Chaymi nunacunaca chay muyun, chay tuta, chay walantinninpis llutucta chalay-chalay cayalcan. Ashllacta juntücämi ćhunca muntunta juntüña. Jinalculmi jamapäcuśhanpa muyülïninman lluy chaquichipäcula. nipäcula, micuyllapi wañuyalca malcacta pampälälishanpïta.

35Chay Kibrot-hataavapïta pasapäculmi Hazerot ulꞌüman ćhäpäcula. Chayćhümi quïdaculcäla.