Miqueas 2 - Old Testament Quechua Wanca（QVW）

Ñacachïcunaca mućhuycachisha cananpämi willacun

1Ay, imanuylä capäcunꞌa puñuśhanćhüpis

mana allin lulayllactaña pinsäcunaca,

mana allin lulaycunällamanña muspapacücunaca.

Maquillanćhu ima lulananpäpis munaynin cayaptinmá

achicäluptin-pacha pinsaśhanta lulaćhaculcan.

2Awari, juccunap ćhaclancunacta munalꞌa ućhïlälinmá;

juccunap wasinta munalꞌa chalacaycälinmá.

Duyñuntawan lluy wasintintamá, nunantawan

lluy cänintintamá artillanwan munäta mana munäta quitälun.

3Chaynu cayaptinmi Tayta Dios nin:

“Cananꞌa, yaꞌami paycunaman mana allinta ćhaycachishä;

chay ñacaypïta manamá ayinꞌachu.

Sumä llaquicuy timpu ćhämuptinmari

manaña nuna-nunachu pulipäcunꞌa.

4Chay muyunćhümi ćhïnicüniquicuna asipapäcul

cay llaqui taquicta taquipapäcuśhunqui:

‘Pampaman muyüchishañamá licalïlunqui.

Tayta Diosniquim ćhaclayquicunacta yaꞌacunamanña uycäläliman.

Ćhaclayquicunacta quitäśhunquiñamá.

Jucpa maquinmanñamá ćhulaycülun’ ” nil.

5Chaymi Tayta Diospa malcanćhu manaña

ćhaclayquicunacta aypuycü pipis canꞌañachu.

Willacüpa pasachicücunäpa cuntranmi willacun

6Nunacunäñatacmi niman:

“Amaña ima pasananpïpis willacuyayñachu.

Manamari ima mana allinpis pasanꞌachu” nil.

7Am Jacobpa milaynincunam nipäcunqui:

“¿Tayta Diospa pasinsian camacälunñachun imamá?

¿Caynüchun paypa lulaynincuna imatá?

¿Manachun allincämannu cawsäcunäta

yaćhachicuynin yanapaycun imatá?” nil.

8Tayta Diosñatacmi nin:

“Amcuna malcämá anyan capäculanqui;

cananñatacmi ichá cuntrá licalïlälinqui.

Gïrrapi jawca cutïcunätapis ćhïnicüniquitanümá

müdanancunactapis ućhiyalcanqui.

9Wasinpïtamá walmicunäta alapacälälinqui.

Yaꞌa uycuśhá chulincunap cänincunactapis quitälälinquimá.

10“¡Śhalcuculcul wayraña liculcay!

Cay manañamari jawca jamaculcänayquichu.

Mana allin lulaycällacta timpuyalcächilmá

pasaypi millachicuyman muyülächinqui.

11Sïchuśh articuyninwan

willacüpa pasachicüca śhamul ninꞌa:

‘Bïnupïwan sidrapïmi willaycälishayqui’ nil;

chaynu willacücätañatacmi ichá amcuna cushisha ćhasquipäcunqui.

Tayta Dios malcanta libraycunanpämi willacun

12“Jacob, lluy malcantintamá juntuycälishayqui.

Israel, lluy quïdänintintamá juntuycälishayqui.

Canćhanman uwishta juntuycücänu,

pastucunäman juntuycücänu juntuycuptïmá lüyatityapäcunqui.

13Caminucta quićhayculmi amcunap puntayquita lishä.

Puncucta quićhaycuptïmi amcuna yalapäcunqui.

Amcunap ñawpäniquitamá yaꞌa mandacüca lishä;

yaꞌa Tayta Diosmari caminaycälishayqui” nil.