Proverbios 13 - Old Testament Quechua Wanca（QVW）

1Yaćhayniyu chulica taytanpa limapäśhanta ćhasquicunmi;

mana manchacuyniyücäñatacmi ichá anyapäśhanta nï uyalïtucunchu.

2Allincällacta limäcá allincätamá ćhasquiycun;

ishcay cära nunacunämi ichá mana allincällapi wañupacuyalcan.

3Shiminta sujitacücá cawsaynintam licacuycun;

anchap limäcäñatacmi ichá quiquillan mana allinninta ashicuyan.

4Illa nunaca maynu munayalpis manamá taliyta atipanchu;

allin lulä nunäñatacmi ichá imactañapis munaśhanta taliycun.

5Allin nunaca articuycunacta ćhïnicunmi;

mana allin nunäñatacmi ichá ćhïnichicuyllactawan pinꞌayllacta apamun.

6Allin nunäta allin tincüllanman lulaśhancunam imapïtapis licaycun;

mana allincäñatacmi ichá juchasapa nunäta pampaman muyuchin.

7Waquincuna rïcutuculcan imanpis mana cayaptinmá;

waquincunañatacmi ichá sumä cäniyu cayalpis mana cäniyünu capäcun.

8Rïcu nunäta cänincunam cawsayninta libraycun;

waccha nunätañatacmi ichá mayanpis nï licayta munanchu.

9Allin nunacunäpa cawsaynin juc acchinümi cushichin;

mana allin nunacunäpa cawsayninñatacmi ichá wañüśha acchinu cayan.

10Nunatucuycá pilyullactam talcachin;

yaćhaycäñatacmi ichá allin uyalicücunäwan cayan.

11Mana allincunawan talisha illaycá licalcunapäpis manamá tacyanchu;

lulapacuyninwan ashllap-ashllap juntucücämi ichá cäniyüman muyun.

12Alcaśhanca mana lulacacuptinꞌa śhunꞌunmi nanaycun;

munaśhanca lulacacüluptinñatacmi ichá sumä cushicun.

13Imapis lulananpä camachishanta jamuyäcunacá camacaycüśham canꞌa;

imapis yaćhachishanta cäsucücäñatacmi ichá allincäta ćhasquiycunꞌa.

14Yaćhayniyücäpa yaćhachicuyninꞌa cawsachicü pucyunümá,

wañuycäpa maquinpïtapis libraycunmá.

15Allin tantiayniyücunacá cuyachicunmi;

ipanchä nunäñatacmi ichá mana allinćhu camacan.

16Allin tantiayniyu nunacá yaćhaywanmi lulaycun;

luclüñatacmi ichá sumä-sumä luclu-cayninpi alawacun.

17Juyu mana allin willacücá ñacaycunactamá apamun;

rasuncällacta willacücäñatacmi ichá allinta apaycamun.

18Limapäśhanta mana uyalicücunacá wacchayäśha, uyshulächisham canꞌa;

anyapäśhanta ćhasquicücunacá altuman juluycuśham canꞌa.

19Munaśhanca lulacacüluptinꞌa sumämi cushicun;

luclucunäñatacmi ichá mana allincäpi japächacuyta nï munapäcunchu.

20Yaćhayniyücäwan pulïcá yaćhayniyümi canꞌa;

luclucunäwan pulïcäñatacmi ichá mana allinćhu camacanꞌa.

21Juchasapacunäta mana allincällamá aticaćhan;

allin nunacunäñatacmi ichá allincällacta ćhasquipäcun.

22Allin nunaca willcancunapäwanlämá tücäninta caćhaycun;

juchasapa nunacunäpa cänincunañatacmi ichá allin nunacunapäña caćhaycüśha cayan.

23Wacchacunap ćhaclanćhu micuy tuqui-tuquimá cayan;

ñatac tincüninman mana licaycuycämi pichaypa-pichaycülun.

24Chulinta mana lawćhaycücá manamá cuyanchu;

cuyäcäñatacmi ichá timpullanćhu asutiycun.

25Allin nunaca maćhaycälinan-camam micapäcun;

juyu mana allin nunacunäñatacmi ichá imaypis manaña maćhaycul cayalcan.