1 Reyes 16 - Old Testament Quechua Wanca（QVW）

1Chaypïta Hananipa chulin Jehutam Baasapa cuntran ninanpä Tayta Dios nin:

2“Pasaypi mana cäpi śhalcalcachilmi Israel malcäpa puydïninpä yaꞌa ćhulayculac. Amñatacmi ichá Jeroboamnu Israel malcäta juchapacachilanqui. Chaywanmari piñachimälanqui.

3Chaymi Nabatpa chulin Jeroboamwan lulaśhänu amtapis lluy aylluyquicunactapis camacaycüśhä.

4Malcaćhu wañü aylluyquicunacta allꞌucunallam micapäcunꞌa. Ćhaclaćhu wañüniquicunactañatacmi pälï wisculcuna micapäcunꞌa” nil.

5Ñatac Baasap mandacuyninćhu lluy lulaśhancuna, llallishancuna Israel lädu mandacünincunap isquirbisha librunćhümi cayan.

6Baasa wañucuptinmi Tirsa malcaćhu awquilluncuna caśhanman pampämula. Pudirninñatacmi chulin Ela mandacü cala.

7 Tayta Diosmi Hananipa chulin willacü Jehuwan willacachila Baasap cuntran, jinaman ayllunpa cuntran. Chaynu willacachila mana allin lulaynincunawan piñachiptinmi. Camacaśhan Jeroboampa aylluncuna lulaśhannu lulapäcuśhanpïmari willacachila.

Israel lädućhu Elami mandacun

8Chaynu ishcay ćhunca sütayu (26) wata Juda lädućhu Asa mandacuyaptinmi Israel läducunäta Baasap chulin Ela mandacuyta allaycula Tirsa malcapi. Ishcay watallamari Ela mandacula.

9Ñatac pilyänincunap puydïnin Zimrim mandacü Elapa cuntran śhalcula. Paymi parti carritancunap puydï licänin cala. Juc muyunćhüñatacmi Tirsa malcaćhu puydï yanapänin Arsap wasinćhu mandacü Ela upyayal shinca cayäla.

10Chayman Zimri ćhayculmi wañüchin. Jinalmi pudirninña mandacü yaycula. Chay pasala Juda lädućhu ishcay ćhunca anćhishniyu (27) wataña Asa mandacü cayaptinmi.

11Chaynu mandacuyta allayculmi Baasap lluy ayllunta camacaycüla; umricunätá masqui ayllun ütac lisinacuśhan cacuptinpis lluymi wañüchila.

12Chaynüpam Tayta Dios willacü Jehuwan willacachimuśhannu Zimri camacaycüla Baasap lluy ayllunta.

13Chaynu camacaycüla Baasawan chulin Ela mana bälï taytacha lulapäcuśhanpïta, israelcunäta juchapacachishanpïta, Israelpa Tayta Diosnintapis piñachipäcuśhanpïtamari.

14Ñatac Ela mandacuyninćhu lluy lulaśhancuna Israel lädu mandacünincunap isquirbisha librunćhümi cayan.

Israel lädućhu Zimrim mandacun

15Chaynu Juda lädućhu ishcay ćhunca anćhishniyu (27) wataña Asa mandacü cayaptinmi Zimri mandacuyta allaycula. Zimri anćhish muyunllam Tirsa malcaćhu mandacula. Israelpa pilyänincunamari Filisteo lädu Gibeton malcacta camacananpä ćhulanacüśha cayalcäla.

16Chay ćhulanacüśha caśhanćhümi pilyäcunaca uyalïlälin: “Mandacü Elatam Zimri wañüchin” nïta. Chaymi chay muyunlla pilyäcunäpa puydïnin Omri nishanta mandacüninpä ćhulälälin.

17Jinaptinmi Omri lluy Israel pilyänincunawan Gibeton malcacta caćhaycul Tirsa malcawan pilyananpäña cunćhacuycun.

18Chaynu malcaca lluy cunćhäśhaña caśhanta licälulmi Zimri palasyu lulinman yaycucuycul lulipïta ninacta sindiycülun. Chaynüpam Zimri chayćhu wañüla.

19Chaynüpa wañula Tayta Diospa ñawquin mana allincunacta lulaśhanpïmi; Jeroboamnu mana allincunacta lulal israelcunätapis juchapacachishanpïtamari.

20Ñatac Zimri mandacuyninćhu lluy lulaśhancuna, mandacü Elapa cuntran śhalcuśhanpis Israel lädu mandacünincunap isquirbisha librunćhümi cayan.

Israel lädućhu Omri nishanmi mandacun

21Chaypïtam Israel läducunaca ishcay partiman laquinacälälin: Partim Ginatpa chulin Tibni nishanta mandacüninpä munapäcula; juc partiñatacmi Omri nishanta munapäcula.

22Ñatac Omri mandacünin cananta munäcunämi Ginatpa chulin Tibni munäcunäta llallïlälila. Chaynüpa Tibnipis wañüluptinmi Omri nishanña mandacü cala.

23Juda lädućhu quimsa ćhunca jucniyu (31) wataña Asa mandacuyaptinmi Israel lädućhu Omri nishan mandacuyta allaycula. Ćhunca ishcayniyu watam mandacula; süta watam Tirsa malcapïta mandacula.

24Chay mandacü Omri nishanmi Semerpïta lantïlun Samaria ulꞌucta, süta ćhunca sütayu (66) quïlu illaywan. Chayćhümi murällayu malcacta śhalcächila. Jinalculmi Samaria nïta śhutichäla punta duyñun Semer caśhanpïta.

25Mandacü Omri nishan Tayta Diospa ñawquin mana allincunactam lulala. Punta mandacücunaca juchapacuśhanpïtapis piyurtalämari lulala.

26Paypis Nabatpa chulin Jeroboamnu mana allincunacta lulalmi israelcunätapis juchapacachila. Taytachancunacta alawachishanwanmari Israelpa Tayta Diosninta piñachila.

27Ñatac Omri mandacuyninćhu lluy lulaśhancuna, llallishancunäpis Israel lädu mandacünincunap isquirbisha librunćhümi cayan.

28Mandacü Omri wañucuptinmi Samariaman pampälälila. Pudirninñatacmi chulin Acab mandacü cala.

Israel lädućhu Acabmi mandacun

29Juda lädućhu quimsa ćhunca pusäniyu (38) wata Asa mandacuyaptinmi Omrip chulin Acab mandacuyta allaycula Israel lädućhu. Samariapïta ishcay ćhunca ishcayniyu (22) watam mandacula.

30Ñatac Omrip chulin Acab Tayta Diospa ñawquin mana allintam lulala; punta mandacücunäpïtapis piyurtalämari.

31Nabatpa chulin Jeroboam mana allin lulaśhanpïtapis mas piyurnintalämi lulala; Sidon malcap mandacünin Et-baalpa wawin Jezabelwanmi casaracülunpis. Jinalmi chay taytachan Baalta alawala, sirbila.

32Chay taytachan Baalpa alawana wasictawan uycuna patactalämi Samariaćhu śhalcachipulapis.

33Jinaman Asera mamachacta alawananpäpis ilucta śhalcachilam. Chaywanmi punta mandacücunäpïpis mas-mastalä Israelcunap Tayta Diosninta piñachila.

34Acab mandacü cayaptinmi Bet-el malcayu Hiel nuna Jerico malcacta caśhan śhalcachila. Śhalcachiyta allaycuptinmi mayur chulin Abiram wañucun. Malcap puncuncunacta ćhulaptinñatacmi śhullca chulin Segub wañucun. Chaynu lulacäla Nunpa chulin Josuewan Tayta Dios willacachishannümari.