1 Samuel 10 - Old Testament Quechua Wanca（QVW）

1Chayćhümi Saulpa umanman asayticta Samuel jillpuycula. Jinalculmi muchaycul nin: “Tayta Diosmi canan ćhulaycuśhunqui aclacuśhan Israel caśhtacunäpa puydïnin canayquipä.

2Canan liculmi Benjamin ayllup allpanćhu Selsa lädućhu, Raquel pampaläśhancäpa lädunćhu ishcay umricta talinqui. Talïluptiqui paycunamari nipäcuśhunqui: ‘Ashishayqui ćhina aśhnucta talïlunñam. Ñatac papäniqui manañam aśhnucunäpïchu llaquisha cayan, sinuꞌa amcunapïtañam. Chaymi: “¿Imactatan chulïta talinäpä lulayculläman?” niyan’ nil.

3Chaypïta Taborćhu encina lanta caśhanman ćhälulmi quimsa nunawan tincunqui. Paycunam Tayta Diosta alawa Bet-elta liyalcan. Jucninmi apayan quimsa malta capischacta, juccäñatac quimsa tantacta, juccá wacuyćhu bïnucta.

4Paycuna limaycälil ishcay tantacta uycuśhuptiquim ćhasquiycunqui.

5Chaypïta Tayta Diospa Gabaa ulꞌunmanmi linqui. Chay cayan Filisteo läducunap pilyänincunap caśhan-cascaćhümari. Chay malcaman yaycuśhayquićhümi Diospa willacünincunawan tincunqui. Paycuna Diosta alawana ulꞌupïtam jiꞌalpayalcämunꞌa Dios willaśhanta willacuśhtin; tucänincunapis arpacunacta, quïnacunacta, tinyacunacta tucaśhtinmi puntanta śhapämunꞌa.

6Chayćhümi Tayta Diospa Ispiritun anman sumä munaywan śhamuptin paycunawan cusca willacuyta allacuycunqui; muśhü nunamanñamari muyunquipis.

7Cay nishäcunaca lluy lulacacüluptinꞌa atipäśhayquimannu imactapis lulaycuy; quiquin Tayta Diosmari amwanña cayan.

8Chaypïta Gilgal malcamanmi puntachcanqui. Chayćhümi anćhish muyun alcamanqui pulanchic uycunapä, jinaman allin cawsaśhanpi cäcäta uycunapäpis. Chayćhüñam nishayqui imacta lulanayquipäpis” nil.

9Chay Samuel caśhanpïta licuptinmi Tayta Dios Saulpa śhunꞌunta allinman muyuycachila. Chay muyunllamari Samuel nishannu lluy lulacacüla.

10Chaypïtam uyway nunanwan Gilgal ulꞌüman ćhäläliptin Diospa willacünincuna yalälälimun. Chayćhu Tayta Diospa Ispiritun śhaycamuptinmi paycunawan willacula.

11Ñatac unaypïta lluy lisïcunämi willacücunäwan Saul willacücuyaptin ninacücuyalcan: “¿Cispa chulin Saulta imatan pasälun? ¿Canan Saulpis willacüchun caña?” nil.

12Chayćhu jucnin cäcämi nin: “¿Mayanmá caycunap taytan?” nil.

Chaypïtam cay limay cala: “¿Saulpis willacüñachun?” nil.

13Chaynu willacuyta camacälulmi ulꞌuman Saul ćhäla.

14Chayćhümi Saultawan uyway nunanta tiyun nin: “¿Maytatan lipäculanqui?” nil.

Niptinmi Saul: “Ćhina aśhnu ashïmi lipäculá. Manaña talilmi Samuelman tapucü lipäculá” nin.

15Niptinmi: “Samuel ima nipäcuśhuśhayquitapis, má willaycamayꞌari” nin.

16Niptinmi: “Ćhina aśhnucunaca talïsha caśhantam niycäliman” nin.

Ñatac manamá willalañachu mandacü cananpä Samuel nishantá.

17Chaypïtam Samuel jinantin Israel caśhtacunäta Tayta Diospa ñawpäninman, Mizpa malcaman juntüchin.

18Chayćhümi lluy Israel caśhtacunäta nin: “Israel caśhtacunäpa Tayta Diosninmi nin: ‘Yaꞌami Egiptopïta am Israel caśhtacunäta julamulac. Lluy mandacücuna ñacachipäcuśhuśhayquipïtapis yaꞌami libraycälilac’ nil.

19Amcunañatacmi ichá imaymana ñacaycunapi, sasachacuycunapi libraycuśhüniqui Tayta Diosniquita ipanchälälinqui: ‘Mandacüta upämay’ nil. Chaynu munapäculꞌa canan má, Tayta Diospa ñawpäninman ayllunpa-cama, wasinpa-cama śhapämunqui” nil.

20Chaynu israelpi lluy ayllucta-cama Samuel aśhuycachiptinmi Benjamin ayllu aclaśha cala.

21Benjamin ayllucta lluy aśhuycachimuptinñatacmi Matrip wasin aclaśha cala. Chay wasipïmi Cispa chulin Saul aclaśha cala. Chaymi payta ashil mana talilachu.

22Jinalmi Tayta Diosta caśhan tapupäcula: “¿Cayman Saul śhamulachun?” nil. Niptinmi Tayta Dios nin: “Payꞌa cargacunäpa ćhawpinćhümi pacalayan” nil.

23Chaymi wayra-wayra lilcälil pacaläśhanpïta Saulta puśhälälimun. Chaynu nunacunäpa ćhawpinćhu śhäcuyaptinmi jatun-caray captin mayanpis umruncamalla ćhäpäcula.

24Chayćhümi jinantin malcäta Samuel nin: “Licapäcuy, Tayta Dios aclaśhan nunäta. Jinantin malcanchicćhu paynuꞌa manam mayanpis canchu” nil.

Niptinmi lluy malcaca cushicuypi bïbacuyalcan: “¡Mandacüca cawsachun!” nil.

25Chaypïtam Samuel malcantinta willaycula mandacücäpa imacuna lulaynin caśhantapis. Chayta juc libruman isquirbiyculmi Tayta Diospa chuya carpanman ćhulaycula.

26Chaypïtam wasinta-cama cuticulcänanpä Samuel nila. Saulpis Gabaaćhu cä wasinmanmi licula. Liwshipäcula Tayta Dios callpanchaśhan pilyaypa ishpisha-ishpisha umricunam.

27Ñatac mana allin nunacunam nipäcun: “¿¡Caylächućh salbämachwan!?” nil. Chaynu mana cäpa licalmi ima rigälullactapis mana uycapäculächu. Saulñatacmi ichá mana uyalïtuculachu.