Deuteronomio 8 - Old Testament Quechua Wanca（QVW）

Chunyäcäćhu yanapäśhanta mana unꞌapäcunanpämi yalpachin

1“Tayta Dios awquilluyquicunaman limalicuśhan allpäman yaycapäcunayquipä, chayćhu milapäcunayquipä, cawsapäcunayquipä canan willaśhac camachicuycunäta lulayman lluy ćhulaycäliy.

2Yalpaycuyꞌari quiquin Tayta Diosniqui jinantin chunyäcäćhu tawa ćhunca (40) wata pulichipäcuśhulanqui ñacachipäcuśhunayquipämi, jinaman śhunꞌuyqui imanuy caśhantapis tantiananpämi. Chaynütac camachicuyninta lulayman ćhulaśhayquitapis yaćhaycunan-laycum.

3Masqui ñacachil micanayta pasachilpis awquilluyquicunapis mana lisishan ‘Maná’ nishan micuytam micachipäcuśhulanqui. Caywanmi yaćhachishulanqui: ‘Manam tantallawanchu nunaca cawsanchic. Aśhwanpa Tayta Diospa lluy nimäśhanchiccämi cawsachimanchic’ nishanta.Mat 4.4; Luc 4.4.

4Chay jinantin tawa ćhunca (40) watacunaca müdaläśhayqui müdanayquipis manam mawcalachu, ćhaquiquipis manam nanatilachu.

5Sumäta tantiapäcuyꞌari, juc tayta chulinta lawćhaycuśhannümi Tayta Diosniqui amcunactapis lawćhaycuśhulanqui.2Sam 7.14; Sal 89.32; Prov 3.11-12; Heb 12.5-11.

6Tayta Diosniquip nishancunacta lulayman ćhulaycul manchacuywan yaćhachicuyninćhu cawsaycäliy.

7Quiquin Tayta Diosniquimari pucyuyu sumä allin allpacta uycuyäśhunqui jinantin pampacunäpi ulꞌucunäpi yalamü yacuyüta.

8Chay allpäćhu trïgupis, siwäpis, übaspis, ïguspis, granadillapis, ulïbuspis, mishquipis manamá pishiycunchu.

9Chay allpäćhu manam micuy nï imapis pishiycuśhunquichu. Chay allpäćhu aꞌacunäpïta jïrructam julapäcunqui; ulꞌuncunapïpis cubrictam julapäcunqui.

10Chayćhu allinta micapäculmi maćhaycapäcunqui. Chaynu allin allpaman ćhulaycuśhuśhayquipïmi Tayta Diosniquita altuman julaycälinqui.

11“Yanꞌalätac Tayta Diosniquita unꞌälälï imanquiman. Cay nishac willacuyninta, camachicuyninta, yaćhachicuyninta ama unꞌapäcuychu.

12Yanꞌalätac allinta maćhapacuycul, allin-cama wasicta lulacuycul jawca yaćhayalcal,

13wäcayqui, uwishniqui miläluptin, illayta üructa anchap tawacuycul, lluy ima cäniquipis allinña cacuyaptin,

14anchap nunatucülunquiman, jinaman Egiptop uywaynin yaćhaśhayquipi quiquin Tayta Diosniqui juluśhuśhayquitapis unꞌalunquiman.

15Quiquin Tayta Diosniquimari manchachicuy jatu-jatun chunyäninpa puśhapäcuśhulanqui. Chay juyu culibraycunap, ćhupa apaläcücunap, mana yacuyu chaqui allpacunapmi caminaycapäcuśhulanqui. Paytacmari pasaypi anä wancapïta yacucta yalalcachimul uycapäcuśhulanquipis.

16Chay chunyäcäćhu awquilluyquicuna mana lisipäcuśhan ‘Maná’ nishan micuytam micachipäcuśhulanqui. Chaynüpam allinniquipä cananpä ñacachipäcuśhulanqui, jinaman śhunꞌuyqui imanuy caśhantapis licaycapäcuśhulanqui.Ose 13.5-6.

17Yanꞌalätac śhunꞌuyquićhu nicuyalcanquiman: ‘Cay imapis cänïcuna callpäwan, munaynïwan talicuśhämi’ nil.

18Aśhwanpa Tayta Diosniquita yalpapäcuy. Paymi ima cäniquicunapis cananpä callpacta, munayta canan uycuśhunqui, awquilluyquicunaman limalicuśhanta tacyalpachinanpä.

19“Ñatac Tayta Diosniquita unꞌaycul juc taytachacunaman muyuculcul sirbiptiquiꞌa, uyshuycuptiquiꞌa rasu-rasunpa lluy camacaycüśhamari capäcunqui.

20Tayta Diosta mana uyaliculcaptiquiꞌa malcap pasaśhayquicunäta camacaycüśhannümá amcunactapis camacaycälälishunqui” nil.