Ezequiel 26 - Old Testament Quechua Wanca（QVW）

Tiro malcap cuntranmi willacun

1Babiloniaman prïsu puśhapämäśhanpïta ćhunca jucniyu watañam pasäla. Chay watap wamä quillap, wamä muyunninćhümi Tayta Dios niman:

2“Wañucülla nuna, Tiro malcam Jerusalenta caynu cushipan: ‘¡Maynu allinmi! Jerusalenpa puncun camacaycüśhañamá cacuyan; nigusyuncunaman manañamá imapis atajamänanchic canñachu. Chayurá canan maqui juntañamá yaꞌanchic caśhun; payñatacmi cala maquillaña canꞌa’ nil.

3“Chaymi yaꞌa Tayta Dios ní: Tiro malca, ampa cuntrayquim cayá. Lamarcäćhu yacuca sumä-sumä mächimuśhannümi ampa cuntrayqui achca nasyuncunacta caćhamuśhä.

4“Jinaptïmi am Tiro malcap pilayquicunacta pampaman muyuchipäcunꞌa; türriquicunactapis tunichipäcunꞌa. Chay malcapïta aśhta ñutu allpancunactapis pichaypamá pichaycüśhä. Pasaypi calanyäśha lumictanüllañamá caćhaycüśhä.

5Chay lamarćhu cäca luminüllañamá quïdälunꞌa, challwa chaläcunaca challwa chalacunta chaquichinanpä cäcänüllañamá quïdälunꞌa. Chay malcaca juc nasyuncunap waycäśhamá canꞌa.

6Chay lamar patanćhu cäcunäpis ispädawan camacaycüśhamá capäcunꞌa. Chaynüpamá mayan caśhäta yaćhaycälinꞌa. Yaꞌa Tayta Diosmari niyá.

7“Awari, yaꞌa Tayta Diosmi ní: Tiro malca, nurti lädupïmi Babiloniap mandacünin Nabucodonosorta cuntrayqui caćhamuśhä. Mandacüpïpis sumä-sumänin mandacüca śhamunꞌa cawalluncunawan, pilyapä carritancunawan, silläda nunancunawan, achca pilyänincunawanmá.

8Chay lamar patanćhu yaćhäcunätam ispädawan wañuchipäcunꞌa. Malcap muyülïninta cunćhaycul, pilap ipancunamanpis allpacunacta juntuyculmá pilyänincuna atajachicuyü-cama yaycapäcunꞌa.

9Murällayquicunacta murälla tunichinapä cäcunawanmá tanꞌalächinꞌa. Türriquicunactapis jatućhäćhä-cama armacunawanmá pampaman muyüchinꞌa.

10Chay achca-achca cawalluncunawan capatacyaylla yaycapämuptinmi pulbulla taycüśha cacunꞌa. Carritancuna, sillädancuna pampaman muyüchisha pilap, puncup yaycapämuptinmi suynaynincunawan malcayquip mürallancuna śhaśhapäcunꞌa.

11Cälliquicunactapis cawalluncunamá jalutacülunꞌa. Malcayquita ispädawanmá camacaycülunꞌa. Alli-cama paradïruyquicunapis pampaman muyüchishamá canꞌa.

12Ima cäniquicunactapis waycäśhunquimá, lanticunayquipä cäniquicunacta suwäśhunquimá, murällayquita pampamanmá muyuchinꞌa, tuqui-cama palasyuyquicunacta mana caśhanmanmá muyüchinꞌa, aśhta lumiquicunallacta, iluyquicunallacta, allpayquicunallactapis lamarcämanmá wicapalpülunꞌa.

13Chaynüpamá cushicuy taquiquicunacta camacäśhä; arpayquicunap waꞌaynin manañamá uyalishañachu canꞌa.

14Pasaypi calanllan chaꞌa chaꞌamannümi muyüchishayqui. Challwa chalacucunacta chaquichinapä cayäcämannümi licalïchishayqui. Manañamá caśhan śhalcachishachu canqui. Chaynu cananpä yaꞌami niyá; yaꞌa Tayta Diosmari niyá.

15“Am Tiro malcactam yaꞌa Tayta Dios niyac: Cućhpayalcächishuptiqui, dañädüśha cäcunaca apalcaćhayalcaptiqui, lluy camacaycüśha cacuyalcaptiqui, ¿manachun lamarpa patanćhu malcacunaca chucchupäcunꞌa imamá?

16Lamar patanćhu cä puydïcunämi dispächunpïta jiꞌalpapäcunꞌa; sacunnincunactapis juluculcanꞌamá, burdäśha-cama müdanancunactapis luśhticulcanꞌamá. Sumä manchälälisha-camamá pampällaćhüña täcapäcunꞌa; camacaycuśhayquita licapäculmari sumä-sumä chucchupäcunꞌa.

17Jinalmi amcunapi aya taquicta taquipäcunꞌa:

“ ‘Ay, sumä lisisha Tiro malca,

lamar patanćhu yaćhäcuna,

lluypa alawäśha, lamarcäćhüpis sumä munayniyu,

muyülïniquićhu malcacunätapis manchachïcäta,

¿imanuypamá camacaycüśhunqui?

18Chaynu cućhpäluptiquimá lamarpa patanćhu

lluy malcacunaca chucchupäcun.

Camacaycüśha caśhayquipïtamá lamarpa ćhawpinćhu

cä malcacunäpis catcatapäcun’ nil.

19“Yaꞌa Tayta Diosmi ní: Chunyä malcaman, pulumäśha malcamanmi yaꞌa muyüchishayqui. Lamarcäpi sumä-sumä yacuctam ishpichimuśhä amta ñitïshunayquipä.

20Chay punta-punta malcacuna caśhancämanmá amta jitalpüśhayqui. Cay allpap śhunꞌunćhu caśhancunämanmá jiꞌalpapäcunqui. Chaypi manañamá cutipämunquiñachu; nï tuquish cayniquiwan cay cawsäcuna caśhancämanpis śhapämunquiñachu.

21Pasaypi manchanaśhmanmari muyüchishayqui. Maynüpa ashipäculpis manañamá talipäcuśhunquiñachu. Yaꞌa Tayta Diosmi niyá” nil.