1Tayta Dios sumä allinmi Israel läducunäwan,
chuya śhunꞌuyücunäwan.
2Ñatac yaꞌam ichá ñaćha-ñaćha palpüllá.
Uchuc-uchucllanpïmi ñaćha-ñaćha saytacacüllá.
3Nunatucücunaca, juchasapacunaca
allin cäniyüman muyupäcuśhanta licalmari imbidiculá.
4Paycuna wañuycäta manamá imapis uculcanchu.
Paycuna sumä cawsay-cawsaymá cayalcan.
5Paycuna manamá juccunänüchu ñacaycunacta pasayalcan.
Manamá juccunanüchu supayapachisha cayalcan.
6Chaymi aläjapacüśhanu nunatucuyninwan cayalcan.
Chipyayäwan müdapacüśhanu juyu lulaynincunawan cayalcan.
7Mana allincällañamá südayninpïpis yalayämun.
Śhunꞌunpïpis juyu lulaycunällañamá yalatityayämun.
8Suyla cäracuyculmá mana allinta lulapäcun.
Nunatucüśhamá camacaycälälinanpä limapäcun.
9Paycunam nipäcun: “Janay pachäpis yaꞌapamá.
Cay pachäćhu lluy-lluy cäcunäpis yaꞌapamá” nil.
10Chaymi malcaca payta atiyalcan.
Lluy nishancunamanmá chalapaculcan.
11Paycunamá nipäcun: “¿Imanuypatá Tayta Dios yaćhanꞌa?
¿Janay pachäćhu cä Dios yaćhayniyülächun cälunman imatá?” nil.
12Licay, caynümá mana allin nunacunaca.
Mana ñacallalmá alli cäniyüman mas-masta muyuyalcan.
13Chayurá ¡imapämá bäliman chuya śhunꞌuyu caśhäpis!
¡Ima allinmá mana allin lulaypïta maquïta paꞌacuśhäpis!
14Walan-walanmá ñacachisha calá.
Walan-walan achicyaptin mućhuchishamá calá.
15Sïchuśh paycunapnu tantiayní captinꞌa
milayniquicunactaćh ipanchayäman cala.
16Cayta tantiaycuytamari munalá.
Ñatac sumä sasamá caculläña.
17Ñatac Tayta Diospa chuya wasinman yaycunäcama manamá yaćhalächu;
chayćhülämá mana allin nunacunaca mayman linantapis tantiälú.
18Paycunacta lluchcananmanmi ćhulaycülunqui.
Mana cäman muyunanpämi tanꞌaycülunqui.
19Unꞌaypïmá pampaman muyüchisha licalïlälinꞌa.
Manchacuycämá camacaycülunꞌa.
20Tayta Diosllay, maynümi puñüca licaćhacülul chay pasacü muspaśhanta juclla unꞌälun;
chaynu unꞌäśhactamá paycunacta am caćhaycülunqui.
21Piñacuywan sumä timpuyaptïmi śhunꞌullá nanaypa-nanaycula.
22Pasaypi luclu calmá mana tantialächu.
Pasaypi uywanümá puntayquićhu calá.
23Chaynu cayalpis amwanmá imaypis cayculá.
Allï maquïpïmá puśhaycamanqui.
24Limapayniquiwanmá puśhaycamanqui.
Chaypïtá altuman juluycuśhactam ćhasquiycamanqui.
25¿Pïllämá janay pachäćhu cayan?
¡Amllamá cayanqui! Amwan cayalñá cay allpäćhu
manañamá imactapis munächu.
26Masqui aychäwan śhunꞌullá pasa-pasaypiña cayaptinpis,
Tayta Diosmá śhunꞌulläta tacyaycachiman;
payllamá wiña-wiñaypä tücäní.
27Taytallay, ampïta laquicücunaca wañupäcunꞌamá.
Ipanchäniquicunacta camacaycülunquimá.
28Yaꞌapäñatacmi ichá Tayta Diosllaman aśhuycuyca sumä allin.
Am Tayta Diosllämi sigüru pacaycamäní caycunqui,
lluy lulaycuśhayquicunacta willaycunäpä.
Who We AreWhat We EelieveWhat We Do
2025 by iamachristian.org,Inc All rights reserved.
