1 Samuel 26 - Old Testament Quechua Wanca（QVW）

Saulta yapa wañuchinanpä cayaptinpis David manam wañuchinchu

1Chaypïtam Zif malcayu nunacunaca Gabaaćhu Saul caśhanman ćhälälil nipäcun: “Chunyäcäpa chimpan Haquila ulꞌućhümi David pacacüśha caćhäla.

5Chaymi Saul jamaśhanman David lila. Chayćhümi Saul mayćhu puñuśhantapis licamula. Chaynütac pilyänincunap puydïnin Abner mayćhu puñuśhantapis licäla. (Abnerꞌa Nerpa chulinmi cala.) Chaynu Saul lluy nunancunap cunćhäśha jamapäcuśhanpa ćhawpinćhu puñuśhantam David yaćhälun.

6Chaypïtam David tapula Het caśhta Ahimelectawan Sarviap chulin, Joabpa wawꞌi-caśhan Abisaita cay nil: “¿Mayantan liwshimanman Saul jamapäcuśhanman?” nil.

Niptinmi Abisai: “Yaꞌami amwan lishä” nin.

7Chaymi Saul jamapäcuśhanman chay tutalla Davidwan Abisai lipäcula. Chay jamapäcuśhanpa ćhawpinćhümari Saul puñuyäña januanćhu lansanpis listullaña śhäcuyä. Muyülïnićhüñatacmi Abnerwan lluy nunancuna puñuyalcäña.

8Chayćhümi Davidta Abisai nin: “Cananmi ćhïnicüniquicunacta maquiquiman Tayta Dios ćhulaycamun. Cananmari wañüchishä; quiquillanpa lansanwan pampäman labäśha canꞌa. Jucllamari wañülunꞌa” nil.

9Niptinmi David nin: “Ama wañuchiychu. ¿¡Mayanpis Tayta Diospa japächacuśhanman maquinta ćhulaycüca manachun mućhuchisha canꞌa imatá!?

10Ñatac quiquin cawsä Tayta Diosmi mućhuycachinꞌa, masqui pilyućhu ütac wañunan muyuncäćhüpis.

11Tayta Dios aclacuśhan mandacücäta wañuchinäpïtá pay libraycamächun. Aśhwanpa januanćhu cä lansantawan yacu apacunta apaculcul licuśhun” nil.

12Nilculmi januanćhu cä lansantawan yacu apacunta apaculcul David liculcan. Lluy-lluy puñuyalcalmi mana mayanpis musyapäculachu nï licapäculachu. Quiquin Tayta Dios wañuy-wañuyta puñüchiptinmari mana licaćhaculcälachu.

13Chaypïtam David chimpanćhu cä ulꞌup puntanman chimpälun. Chay caśhanpïta calu chimpaćhülämari Saul cayäla.

14Chay ulꞌupïtam David callpa-callpawan ayaycaćhacuyan Abnertawan lluy pilyänincunacta: “Abner, ¿uyaliyämanquichun?” nil.

Niptinmi Abner: “Mandacücäta ayaycaćhayänayquipä ¿¡mayantá am canqui!?” nin.

15Niptinmi: “¡Israel caśhtacunäćhu mayanllá yaꞌanuꞌa caycunmantá niyanquichun imatá! ¿Chaychun mandacüniquita mana täpaycunquimanchu cala? Malcäpïmari jucnin yaycülun mandacüniquita wañuchinanpä.

16Ima cätatá lulälunqui. Cawsä Tayta Dios aclacuśhanta mana täpaśhayquipïta wañuchisham capäcunayqui. Má, ashipäcuy mandacücäpa januanćhu lansan, yacu apacun caśhancäta” nil.

17Chayćhümi Davidpa limaynin caśhanta Saul tantialul nin: “David iju, ¿ampa limayniquichućh?” nil.

Niptinmi David: “Mandacüní taytallay, yaꞌamari cayá.

18¿Imapïtá cay nunallayquita ancha-anchapña ashiyämanqui? ¿Imactamá lulällá? ¿Ima mana allintatá lulällá?

19Mandacü taytallay, ama chaynu caychu, cay uywayllayquita uyaliycallämay. Sïchuśh cuntrá śhalcunayquipä Tayta Diospa munaynin captinꞌa payman uycuptí allichacunꞌaćh. Ñatac nunacunapi captinꞌa quiquin Tayta Dios tincüninmannu mana allinpä licachun. Chay-laycumari Tayta Diospa aclacuśhan malcanpïta alapacüśha cayá; chaywanmi taytachacunacta alawanäpäña jitalpayalcäman.

20Tayta Dios caśhanpi calućhu yawarní jićhaśha canantá manamari munächu. Israelpa mandacünin ¿imapïtá usanu cayäcällacta ashï yalämunqui? Ulꞌucunäćhu llutuctanu ashiyämanqui” nin.

21Niptinmi Saul nin: “David iju, cuticamuy. Mana allintam lulällá. Pasaypi mana umayu luclunümi lulällá. Amñatacmi cawsaynïta ama-pacha niycunqui” nil.

22Niptinmi David: “Mandacüní, cayćhümi lansayqui cayan. Jucnin nunayquita cutichinanpä caćhamuy.

23Quiquin Tayta Dios mayantapis lulaśhanmannu, chalapacuśhanmannu tincüta uycuchun. Masqui Tayta Dios aclacuśhan mandacücäta maquïman ćhulaycayämaptinpis manam maquïta pallalculächu.

24Chayurá canan cawsayniquita ama-pacha nishämannu Tayta Dios cawsaynïtapis ama-pacha niycamal ima llaquicuycunapïtapis libraycamächun” nin.

25Niptinmi Saul nin: “David iju, allinpä licaycuśha caycuy. Anmi imaymana jatućha lulaycunacta lulaycunqui; lluy imaćhüpis allinmari caycunqui” nil.

Chaypïtam Saul wasinta cuticula; Davidñatacmi pasacula.