1Tayta Diosnillay, salbaycallämay.
Yacućhümi anualpuyälläña.
2Sumä-sumä siniamanmi śhaticacüllá.
Manamá maycäman chalapacunäpis canñachu.
Luli-luli yacumanmi jiꞌalpüllá; mayu lïcämi aysayälläman.
3Ayaycaćhaytapis pishipälüñamá.
Cuncäpis chascälunñamá.
Tayta Diosnïta alcayaptí ñawilläpis aspacalpunñamá.
4Yanꞌalpi ćhïnimänïcunaca ächäpïpis mas-masñamá milälälin.
Yanꞌalpi pampaman muyuchimayta munäcunaca
achca-achcamanñamá muyülälin.
Mana suwacuśhäpïtamá cutichinätapis munapäcun.
5Tayta Diosllay, am yaćhayanquimá luclunu caśhäta.
Juchäcuna ampïta manamá pacaycuśha canmanchu.
6Sumä munayniyu Tayta Diosnillay,
chalapacüniquicuna yaꞌa-laycu amari pinꞌayćhu capäcuchunchu.
Israelpa Tayta Diosnin, ashïniquicuna juchä-laycu
amari uyshulächisha capäcuchunchu.
7Taytallay, am-laycumá imaymana ñacayta pasalá.
Pinꞌacuypïmi cäräpis pampäćhu cala.
8Wawꞌi-caśhäcunapä juc nunanüñamá cayá.
Mamäpa wawincunapä mana lisishanüñamá cayá.
9Alawana wasiquita cuyaynïwanmi sumä-sumä wañupacú.
Cuntrayquicuna nishuśhayquicunämá yaꞌacta ćhaypa-ćhaycaman.
10Micuytapis caćhaycul waꞌaśhtin mañacuptïpis
paycuna jamuyapämanmi.
11Llaquicuypi shicacü müdanawan
ćhulacuptïpis limacalcäman, asipäcalcämanmi.
12Puncućhu täcücunäpis yaꞌallapïñam limaculcan.
Shincacunäpis yaꞌallapïñam taquincunaćhu sumachiculcan.
13Yaꞌañatacmi am Tayta Dioslläta mañacamullac uyaliycamänayquipä.
Sumä llaquipayniquićhuꞌari yanapaycallämay.
Chalapacuna caśhayqui-laycuꞌari salbaycallämay.
14Sumä siniaman jiꞌalpunäpïta julaycallämay.
Ćhïnicünïcunapïtawan sumä-sumä yacucunäpïta libraycallämay.
15Mayuca amari apamächunchu.
Manchanaśh wayuca amari micamächunchu;
wañuyca amari millpamächunchu.
16 Tayta Diosnillay, sumä-sumä llaquipayniyu caśhayqui-laycuꞌari uyaliycallämay.
Ancha-ancha cuyacuyniyu caśhayqui-laycuꞌari licaycallämay.
17Cay uyway nunallayquipi amari pacacuycuychu.
Sumä ñacayćhümá cacuyällá; jucllañari uyaliycallämay.
18Aśhuycamulꞌari libraycallämay.
Ćhïnicünïcunap maquinpïtari julaycallämay.
19Am tuquictamá yaćhayanqui palamäśhancunacta,
pinꞌayman ćhulamäśhancunacta, jalutacamäśhancunactapis.
Yaćhayanquitacmá mayancuna ćhïnicünïcuna caśhancunactapis.
20Chay palamäśhancunäwanmá śhunꞌulläpis llaqui-llaquiña cayällan.
Mana callpayu jucmanyäśhañamá cayällá.
Mayanpis llaquipaycamänanta ashiptïpis manamá pipis canchu.
Cunsuylaycamänanpä ashiptïpis manamá mayanpis canchu.
21Micanämaptinpis jayaptamá micälächiman.
Yacunämaptinpis binagrictamá upyälächiman.
22Paycunap fistachacuynincuna quiquinpa cunca cuchuynincunaman muyuchun.
Trampancunaman licalichun palpupäcunanpä.
23Manaña licapäcunanpä ñawincuna aspachun.
Lluy imawanpis ñitichicüśha pasaypi curculächunpis.
24Piñacuyniquita paycunamanꞌari ćhaycachiy.
Sumä timpuyä rabyacuyniquita paycunamanꞌari alcansachiy.
25Yaćhanancunapis pulumächun.
Carpancunapis chunyachun.
26Llaquiman am ćhulaśhayqui nunactamá paycuna ñacachipäcun.
Dañädüśhayqui nunap nanayninpïmá äśhaycaćhapäcun.
27Chay mana allin lulaśhanpïta mana allincäwanꞌari cutiycachiy.
Tincüninman cäraycuyniquićhüpis cäraycuśhaläri cachunpis.
28Paycunacta wiña-wiñaypä allin cawsayćhu canapä librupïpis chincachiyꞌari.
Chuya nunacunäwan ćhulaśha amari cachunchu.
29Tayta Diosllay, ñacayćhu yaꞌa cäcäta salbaycallämay.
Llaquićhu cayäcäta śhalcachillämay.
30Tayta Diospa śhutintamá taquicunawan alawäśhä.
Sulpäta ucuynïwanmá altuman juluycuśhä.
31Chaynu lulaycuśhäpïmi Tayta Diosní mas-mastalä cushicunꞌapis.
Wäcacta uycuśhäpïtapis ütac shilluyu wälayu
malta wäcacta uycuśhäpïtapis mastalämari cushicunꞌa.
32Chayta licalmá chaynu ñacä wacchacunäpis cushiculcanꞌa.
Tayta Diosta ashïcunäpa śhunꞌuncuna callpanchaculcanꞌamá.
33Wacchacunäta Tayta Dios uyaliycunmari.
Ćhänalayä malcanta manamá unꞌaycunchu.
34Lluy cawsäcuna, janay pachäpis, cay allpäpis,
lamarcunäpis Tayta Diosta alawapäcuy.
35Sion malcactam Tayta Dios salbaycunꞌa.
Judapa malcancunactam caśhan śhalcachinꞌa.
Chay malcaćhu uywaynin nunancuna yaćhapäculmi tacyapäcunꞌa.
36Aśhta chulincunactapis tücachinꞌamá.
Tayta Diosta cuyäcunämi chayćhu yaćhapäcunꞌa.
Who We AreWhat We EelieveWhat We Do
2025 by iamachristian.org,Inc All rights reserved.
