Isaias 58 - Old Testament Quechua Wanca（QVW）

Ayünu imanuy cananpämi nin

1Tayta Diosmi nin:

“Mana jamaycullal llapan callpayquiwan niycuy.

Curnitillanu sumä limaycuy.

Malcäpa mana allin lulaynintari anyäluy;

Jacobpa milaynincunap juchantari niycüluy.

2Tincünïmannu cawsä nunanüpis,

Tayta Diospa yaćhachicuyninta

cäsucünüpis paycuna walan-walanshi

ashiyalcäman; munaśhämannüshi puliyalcanpis.

Allin tincücämannu cäraycunätalämá mañapämanpis;

yaꞌaman aśhuycamü-tucunlämá canpis.

3Paycunamari nipäcun: ‘Amta imactapis mana

ucuśhuptiquiꞌa ¿imapämá ayunapäcuśhä?

Am mana tantiaycuyaptiquiꞌa ¿imapämá aychäta ñacachipäcuśhä?’ nil.

“Chaynu niyalcämaptinpis yaꞌami ní:

Amcuna ayunapäculꞌa quiquiquip munayllayquitamá ashipäcunqui;

yanapäniquicunactapis ñacachipäcunquimá.

4Amcuna ayunapäcul pilyayllaćhu, palanacuyllaćhu,

sumä tacanacuycunallaćhu capäcunayquipämari ayunapäcunqui.

Ñatac janay pachäćhu ayacuyniqui uyaliycuśha cananpä,

amari canan lulapäcuśhayquinuꞌa ayunapäcuychu.

5Amcuna ¿juc muyunlla llaquicunallayquipächun

ayunayalcanqui imamá?

¿Śhuꞌuśhnu uyshuycunallayquipächun,

shicacü müdanacunawan müdacunallayquipächun,

ućhpacunawan ćhulacunallayquipächun ayunayalcanqui imamá?

Chaytachun ¿ayünu niyalcanquiman imatá?

¿Chaychun Tayta Diospa śhunꞌunpänu cayanman imatá?

6“Śhunꞌüpänu cä ayünucá caynümá:

Yanꞌalpi ćhänäśha cäcunäta caćhaycuymi;

yüguwannu wataläcunäta pasquiycuymi;

ñacäcunäta libricta caćhaycuymi;

ima yüguctapis camacaycuymari.

7Ayunayca, micanäśhacunäman

ima micuyllayquitapis uycuymá;

pulicü wacchacunäta ćhasquiycuymá;

mana müdanayücunäta müdaycachiymá;

nuna-masiquicunacta imaypis yanapaycuymá.

8“Chaynu lulaycuptiquiꞌa wäla acchïnümá acchiqui acchiycunꞌa;

dañäduyquicunapis jucllamá allinyaycunꞌa;

tincüninman licaycuycämi ñawpäniquitapis puntaycunꞌa;

Tayta Diospa sumä cayninmá ipayquitapis śhaycamunꞌa.

9Ayacuptiquipis Tayta Dios uyaliycuśhunquimá.

Yanapaycuśhunayquipä mañacuptiquipis

‘cayćhümi cayá’ nishunquimá.

“Amcuna mayanmanpis sumä llasä yügu

ćhulaśhayquicunäta wicapapäcuy;

juccunacta ama jamuyapäcuychu nï yanꞌalcunapi tumpayalcaychu.

10Chaynütac micuypi cäcunäta uycuy;

sumä llaquiśha cäcunätapis yanapaycuy.

Chaynu lulaycuptiquiꞌa tutapäcäćhümi acchiqui acchiycunꞌa;

muyülïniquićhu cä tutapäcäpis ćhawpi muyun acchinümá caycunꞌa.

11Chaymi yaꞌa Tayta Dios imaypis michiycuśhayqui;

chaqui cäcunäćhüpis maćhaycüśhactamá uywaycuśhayqui;

callpayqui cananpämá callpanchaycuśhayquipis.

Chayurá tuqui rïgaśha wirtanümá caycunqui;

imaypis mana chaqui pucyunümá caycunqui.

12Milayniquicunam tunïsha cäcunäta caśhan śhalcachinꞌa;

punta cä simintuncunactamá allichanꞌa.

Chayurá amcunacta lisipäcuśhunqui: ‘Tunïsha pilacunacta śhalcachïca.

Pampaman muyüchisha wasicunacta allichäca’ nilmi.

Jamana muyunpïmi nin

13“Jamana muyuncäta ama jalutacuychu;

jamana muyuncäćhu munaśhayquita ama lulayaychu.

Aśhwanpa chay muyuncäćhu allin cushicuyćhu caycäliy;

Tayta Diospa chuya muyunnin,

sumä caynin caśhanpïta allinpä licaycäliy.

Quiquiquip munayniquita mana lulallal,

juyu limaycunacta mana limallalmari

jamana muyuncäta altuman juluycälinqui.

14Chaynu lulayculmari yaꞌa Tayta Diosćhu

sumä cushicuyta taliycunqui.

Altunninmanlämi yaꞌa ćhulaycuśhayqui.

Chayćhümi taytayqui Jacobpa tücänincunapi micaycachishayqui.

Yaꞌa Tayta Diosmari niyá” nil.