1 Reyes 1 - Old Testament Quechua Wanca（QVW）

Abisag wamlam mandacü Davidta licaycun

1Mandacü David anchap yaśhayäluptinmi maynüpaña chusicunawan aytupäcuptinpis mana unulilañachu.

2Chaymi nunancuna nipäcula: “Mandacü taytallay, manalä umricta lisï wamlacta ashïlälipamuśhayqui; pay licaycuśhunayquipä, puñuśhayquićhu unuchishunayquipäpis” nil.

3Nilcälilmi jinantin Israelpi tuquinnin wamlacta ashimü liculcan. Chaymi Sunem lädu Abisag wamlacta talilcälil mandacü Davidman puśhapäcamula.

4Chay wamla tuquishllam cacula. Paymi mandacücäta licaycula. Ñatac mandacüca manam Abisag wamlawan calachu.

Adoniasmi mandacüpa quiquillan ćhulacun

5Chay timpućhu Davidpa chulin Adoniasmi alcayan ampa mandacuyniquićhu pudirniqui mayannin täcunanpä niycunayquitapis.

21Chaynu mana lulaptiquiꞌa wañucuptiquim yaꞌactawan wawí Salomonta ipanchäpa licapämanꞌa” nil.

22Chaynu mandacücäta Betsabe niyällaptinmi willacü Natan ćhämun.

23Chaymi mandacü Davidman willaycälila: “Willacü Natanmi ćhämun” nil. Natanñatacmi mandacü Davidpa puntanman yaycuycul pampäcama uyshucuycula.

24Chayćhümi Natan nin: “Mandacü taytallay, ¿amchun nilanqui Adonias pudirniqui mandacü cananpä?

25Paymi malcanpi canan jiꞌalpalcamul wäcacunacta, uwishcunacta sïbäśha uywacunacta ćhipïchin uycunanpä. Ayächimuntacmi am mandacücäpa lluy chuliquicunacta, sasirdüti Abiatarta, pilyäcunap puydïnincunactapis. Paycunawanmi micuśhtin upyaśhtin: ‘¡Mandacü Adonias cawsachun!’ nil apalcaćhayalcan.

26Ñatac yaꞌa sirbïniquita, sasirdüti Sadocta, Joiadapa wawin Benaiacta, jinaman sirbïniqui Salomontapis manam ayachipämanchu.

27Chaynu lulananpä ¿am mandacü taytallächun nilanqui? ¿Nunayquicunaman mana willayculchun pudirniqui mandacüca cananpä ćhulälunqui?” nil.

Salomontam mandacüpä David japächaycun

28Niptinmi Betsabeta mandacü David ayächin. Chaymi mandacücäman yaycuycul ñawpäninćhu pay śhäcuyäla.

29Chayćhümi mandacüca limalicula: “Imaymana llaquipïta libraycamäní Tayta Diospa ñawpäninćhümi limalicú.

30Israelpa Tayta Diosninta śhaycaycachilmari limaliculac: ‘Yaꞌapa pudirní mandacuynïćhu wawiqui Salomonmi canꞌa; dispächüćhümari täcunꞌa’ nil. Chay limalicuśhäcämi canan lulacacüśha caycunꞌa” nil.

31Niptinmi mandacücäpa puntanman Betsabe unꞌulacuycul pampaman umantapis ćhulaycul nin: “Mandacüní tayta David pasaypipä cawsachun” nil.

32Chaypïtam mandacü David ayachimula sasirdüti Sadocta, willacü Natanta, Joiadapa wawin Benaiactapis.

Paycuna ćhälaliptinmi David nin:

33“Nunäcunawan canan lipäculmi chulí Salomonta muläman sillalcachil Gihon läduman puśhapäcunqui.

34Chayćhümi sasirdüti Sadocwan, willacü Natan Israelpa mandacünin Salomon cananpä llushiycul japächapäcunꞌa. Amcunañatacmi curnitillacta tucaśhtin ‘¡Mandacüninchic Salomon cawsachun!’ nil apalcaćhapäcunqui.

35Chaypïtam cutipämunqui cay dispächüćhu pudirní mandacü cananpä. Paytamari Israelpa, Judapa mandänin cananpä aclayculá” nil.

36Niptinmi mandacücäta Joiadap wawin Benaia nin: “Chaynu cachun. Mandacünïpa Tayta Diosninpis chaynu cananpä munaycuchun.

37Am mandacünïwan Tayta Dios caśhannu chuliqui Salomonwanpis caycuchun. Mandacüní Davidpïpis mas jatun paypa mandacuynin caycuchun” nil.

38Chaypïtam sasirdüti Sadoc, willacü Natan, Joiadap chulin Benaia, jinaman Ceret, Pelet läducunäpis mandacü Davidpa mulanman Salomonta sillalcachil Gihon läduman puśhapäcula.

39Chayćhümi sasirdüti Sadoc chuya carpapïta wälaćhu cä asaytiwan Salomonpa umanman jillpuycul japächala. Jinalculmi curnitillacta tucapäcuptin lluy nunacunäpis: “Mandacü Salomon cawsachun” nil apalcaćhapäcula.

40Chaypïtam jinantin malcaca quïnacunacta tucaśhtin, cushicuypi apalcaćhaśhtin ipanta atipämula. Chaynu alli-allicta apalcaćhapäcuptinmi pampäpis śhaśhacuyänüña cala.

41Ñatac Adoniasꞌa lluy ayachishancunäwan micuyta camacalpuyalcalmi chay lüyamücäta uyalïlälin. Joabpis curnitilla tucamuśhanta uyalïlulmi: “Imapïćha chaynüpaña malcaćhu lüyacayalcämun” nin.

42Niyällaptinlämi sasirdüti Abiatarpa chulin Jonatan ćhämun. Chaymi Adonias nin: “Pasaycamuy Jonatan; am allinnin nunacá allin willacuytaćh apayämunqui” nil.

43Niptinmi Jonatan nin: “Manamá allintachu. Mandacüninchic tayta Davidmari Salomonta mandacüpä ćhulälun.

44Jinaman Sasirdüti Sadoctam, willacü Natantam, Joiadap chulin Benaiatam, jinaman Ceret lädu Pelet läducunätapis niycülunmi mandacücäpa mulanman Salomonta sillalcälichil puśhapäcunanpä.

45Chaynu Gihon läduman ćhaycachilmi mandacüpa japächaycapäcula sasirdüti Sadocwan willacü Natan. Jinalcul cushicuywan apalcaćhaśhtin cutipämuptinmi malcaćhu lüyaylla cacuyan. Chaytam canan uyaliyalcanqui.

46Cananꞌa Salomonñam mandacücäpa dispächunćhu pudirnin täcuyan.

47Jinaman mandacücäpa lluy nunancunapis lilcälilmi mandacüninchic Davidta allin cananpä nicuyalcan: ‘Ampïtapis mas lisishacta Salomonta Tayta Dios lulaycuchun. Mandacuyniquipïtapis mas allinlä Salomonpä caycuchun’ nil. Quiquin Davidpis cämanćhümi Tayta Diosta alawäcuyan:

48‘Israelpa Tayta Diosnin alawäśha cachun. Paymi licaycachiman dispächüćhu pudirní taycuycuśhanta’ ” nil.

49Chaynu nishanta uyalïlälilmi Adoniaspa ayachishancunaca sumä manchäśha śhalcacalcälil wicta-cayta lluy liculcan.

50Adoniasñatacmi Salomonta manchacuyninwan chuya carpaman ayicula. Chayćhümi uycuna patacpa wäla-niläninman chalapacüla.

51Chaypïtam Salomonman jucnin willaycula: “Amta manchaculmi Adonias uycuna patacpa wälaniläninman chalapacüśha niyan: ‘Cay nunallanta ispädawan mana wañuchimänanpä mandacü Salomon limalicamächun’ ” nil.

52Niptinmi Salomon: “Allin nuna captinꞌa manam jucllay ächallanpis chincanꞌachu. Ñatac mana allinca payćhu captinꞌa wañunꞌam” nin.

53Nilculmi Salomon chay chuya carpapïta puśhachimula. Jinaptinmi Adonias ćhaycul mandacü Salomonpa puntanman uyshuycula. Chayćhümi Salomon: “Wasiquita licuy” nin.