Proverbios 3 - Old Testament Quechua Wanca（QVW）

Imanuypa yaćhayniyu canapäpis

1Iju, cay yaćhachicuynïta ama unꞌaychu;

limapäśhacta śhunꞌuyquiman ćhulaycuy.

2Chayćha achca watacuna cawsaycachishunqui;

allin jawcayaytam taliycachishunqui.

3Cuyacuycätawan chalapacuna caycäta ama imaypis caćhaycuychu:

cullartanu cuncayquiman wallacüluy,

tablamannu śhunꞌuyquiman isquirbiycuy.

4Chaymi Tayta Diospa llaquipayninćhu caycunqui;

nunacunäpis allin yaćhaywan tantiaywanmi licaycuśhunqui.

5Llapan śhunꞌuyquiwan Tayta Diosman chalapacuy;

quiquiquip tantiayllayquimanꞌa amari chalapacuychu.

6Ima lulaśhayquićhüpis Tayta Diosta yalpaycuy;

paymá allin caminunpa puśhaycuśhunqui.

7Ama yaćhätucuychu; aśhwanpa Tayta Diosta

manchacul mana allin lulaycunäpi aśhucuy.

8Chaymá aychayquipä jampin,

tulluyquicunacta tacyaycachin.

9Ima cäniquicunawanpis Tayta Diosta altuman juluycuy,

chaynütac wamä lluy cusichayquicunawanpis.

10Chaymi pilwayquicuna juntay-juntay caycunꞌa;

bïnu ćhulacuyquicunapis jićhay-jićhayña caycunꞌa.

11Iju, Tayta Diospa piñacuyninta ama jitapaychu;

pay anyaycuśhuptiquipis ama piñacuychu.

12Maynümi juc tayta cuyaycuśhancunäta sumäpa ishpiycachin,

chaynümi cuyaśhancätá Tayta Dios asutiycun.

13Cushicuchun yaćhaycäta talïca;

cushicuchun tantiaycäta ćhasquïca.

14Yaćhaycämi illaycäpïpis mas ćhaniyu;

yaćhaycäpa wayuyninmi sumä ürupïpis mas-mas allinlä.

15Yaćhaycämi alli-cama aläja lumicunäpïpis mas ćhaniyu;

yaćhaycäwanꞌa manamá maynu sumä-sumäcunapis tincuchisha canmanchu.

16Allï maquinwanmi cawsayta uycun;

ichü maquinwanñatacmi rïcuyaytawan altuman juluycuśha cayta uycun.

17Caminuncunapis maynu tuquimá;

pulishancunap puliycuy jawca cawsaycuymá.

18Ashïcunäpá yaćhayca cawsaymi;

yaćhaycäta uywäcunäpá maynu cushicuymi.

19 Tayta Dios cay pachäta yaćhaywanmá tacyaycachila;

janay pachäta tantiaywanmá lulaycula.

20Yaćhayninwanmá lamarcätapis laquïla;

sïlüpïtam pucutaycäpis śhullincunacta caćhalpamun.

21Iju, yaćhayniyu caycuy;

tantiayniyu cayta ama unꞌaycuychu.

22Chaymá cawsayniqui ampa caycunꞌa;

chaymá cullarniquinu aläjayqui caycunꞌa.

23Chayćha mana manchalillal jawca pulinqui;

ima mana allinmanpis manamá palpunquichu.

24Puñunayquiman jitalacuyculpis manamá imapi manchalinayqui canꞌachu;

puñucuyculpis jawcallamá puñucunqui.

25Unꞌaypi ima ñacay ćhämuptinpis manamá manchalinayqui canꞌachu;

juyu mana allin nunacunäman sasachacuycuna ćhäśhanpis manamá manchachishunquichu.

26 Tayta Diosmá amwan canꞌa;

paymá ima trampaman palpunayquipïpis libraycuśhunqui.

27Mayanpis mañacuśhuptiquiꞌa uycuy;

cayäpuśhuptiquiꞌa yanapaycuy.

28Chaynütac yanapänayquipä cayäpuśhuptiquiꞌa

nuna-masiquita ama niyaychu:

“Wälamanña cutimuy” nil.

29Anman chalapacü nuna-masiquita

ama imaymana mana allintapis lulaycuychu.

30Mana allincäta mana lulayäśhuptiquiꞌa

yanꞌal-yanꞌalpi ama ruydupayaychu.

31Juyu nunacunäpa cawsayninpi ama imbidicuychu;

ima lulayninpïpis ama wañupacuyaychu.

32Chaynu juyu nunacunätá Tayta Dios millachicunmi;

allin nunacunäwanñatacmi ichá cusca caycun.

33Juyu nunacunätá wasintintam Tayta Dios mana allinpä licaycun;

allin nunacunätañatacmi ichá wasintinta allinpä licaycun.

34Asipäcunätá Tayta Diospis quiquintamá asipan;

mana nunatucücunätam ichá llaquipayninwan licaycun.

35Yaćhayniyücá altuman juluycuśham canꞌa;

luclucunäñatacmi ichá pinꞌayman ćhulaśha canꞌa.