Nehemias 2 - Old Testament Quechua Wanca（QVW）

Mandacü Artajerjesmi Jerusalenman Nehemiasta cutichin

1Chaynu Artajerjespa ishcay ćhunca wata mandacuyninćhu Nisan quillap muyunnincunaćhümi mandacü Artajerjespa bïnunta mallilcayäpulá. Chayćhu sumä llaquisha cacuyäta licämalmi,

2mandacüca tapuycaman: “¿Imapïmi llaquisha cayanqui? Manamá ishyayanquichu. Śhunꞌuyquimá alaläśha cayan” nil.

Nimaptin-pacham sumä manchäśha cacuyal nicuyá:

3“¡Mandacüca wiña-wiñaypä cawsachun! ¿Imapïmi mana llaquicümanchu awquillücunap pampaläśhan malcaca lluy pulumäśha cayaptin, puncuncunapis cañäśha cayaptin?” nil.

4Niptïmi mandacüca: “¿Imaćhümi yanapaycucman?” niman.

Nimaptinmi janay pachäćhu cä Tayta Diosta mañacuycul nilá:

5“Mandacü taytallay, cay nunallayquita llaquipaycul yanapaycuyta munalꞌa Judaman linäpäri awniycallämay awquillücuna pampaläśhan malcacta śhalcachinäpä” nil.

6Niptïmi mandacüca walmin lädunćhu täcuyaptin niman: “¿Imaycamam camunqui? ¿Imaymi cutimunqui?” nil.

Nimaptin imaypis cutimunäta niycuptïmi linäpä mandacüca awnimäla.

7Chayćhütacmi nilá: “Mandacü taytallay, allinpä licaycallämalꞌa awniycamay Eufrates mayup chimpan malcacunap puydïninpä cartacta apachimänayquipä; chayćha chayninpa Judacama ćhäpäcunäpä mana mićhacalcämanꞌachu.

8Chaynütac malcap puncuncunapä, murällapä, jinaman yaꞌa yaćhanä wasipäpis ilucunacta uycamänanpä munti täpä nunayqui Asafpäpis cartacta apachillämay” nil.

Niptïmi Tayta Dios yanapaycamaptin lluy mañacuśhäta mandacüca uycamäla.

9Jinaman mandacüca pilyänincunap puydïnincunawan sillädancunawanmi liwshichimälalä canpis. Ñatac chay apachimäśhan cartactam Eufrates mayup chimpan malcacunaman ćhälul puydïninman uyculá.

10Ñatac Israel läducunäta yanapä ćhämuśhäta yaćhälälilmi Horon lädu Sanbalatwan Amon lädu yanapä Tobias sumä-sumä piñacälälila.

Malcap murällanta śhalcachinanpämi Nehemias callpanchan

11-12Chaynu Jerusalenman ćhälul quimsa muyun caśhäpïtam waquin nunacunawan tutanpa licä yalapäculá. Manatacmi Jerusalenpä imacta lulaycunäpä śhunꞌüman Tayta Dios ćhulaycuśhantá willalächu. Sillacuśhá uywallawantacmi liläpis.

13Chay tutallatacmi pampaman lï puncunpa yalul Dragon nishan pucyu lädunninta Muladar nishan puncucama lilá. Chayćhümi Jerusalenpa murällancuna tunïsha caśhantawan lluy puncuncunapis cañäśha caśhanta licaycamulá.

14Chaypïtam Yacu Yalamunan nishan puncup, jinaman Mandacücäpa Istanquin nishanman lilá. Ñatac sillacuśhá uywam chayninpa pasayta nï atipälachu.

15Chaymi manaläpis aylliptin wayunnintaña wichayta ishpil lluy murällacta licamulá. Chaypïta cutimulmi Pampa nishan puncup yaycamulá.

16Lluy puydïcunäñatacmi mayta lishätapis nï imacta lulaśhätapis mana yaćhapäculachu. Chaycama manalämari willalächu mayannin Juda lädumanpis, sasirdütimanpis, yaśhacunämanpis, caminaycücunämanpis nï luläcunämanpis.

17Chaypïtalämi nilá: “Amcuna tuquictam yaćhapäcunqui sasachacuyćhu caśhanchicta. Awari Jerusalenpa murällancuna pampaman muyüchishamari cayan; lluy puncuncunapis cañäśhamá cayan. Chayurá śhalculꞌari pinꞌayćhu manaña cayänapä Jerusalenpa murällanta caśhan śhalcachishun” nil.

18Jinaman Tayta Dios llaquipayninćhu yanapaycamäśhantawan mandacüca nimäśhantapis willayculämi. Chaymi paycuna: “Śhalcachiyta allaycuśhunꞌari” nicuyalcan.

Chaynüpam allaycapäcunäpä callpanchanaculcälá.

19Ñatac Horon lädu Sanbalatwan Amon lädu puydï Tobias, jinaman Arabia lädu Gesem yaćhälälilmi asipapämal jamuyayninwan nipäman: “¿Imactatá lulacuyalcanqui? ¿Mandacücäpa cuntranchun śhalcuyta munayalcanqui imatá?” nil.

20Nimaptinmi nilá: “Janay pachäćhu cä Tayta Diosmi allinman yalaycälichimanꞌa. Yaꞌa nunancunañatacmi śhalcachiyta allaycapäcuśhä. Amcunapñatacmi ichá cay Jerusalenćhu ima lulanallayquipis, nï partiquipis canchu” nil.